Matius 7:1-29

  • KHOTBAH I DELENG (1-27)

    • Ula nai nghakimi (1-6)

    • Teruslah mindo, darami, nuktuk (7-11)

    • Aturen Emas (12)

    • Gerbang si sempit (13, 14)

    • Itandai arah buahna (15-23)

    • Rumah i datas batu, rumah i datas kersik (24-27)

  • Jengang kalak si nterem ngidah Jesus ngajar (28, 29)

7  “Ula nai kena nghakimi gelah kena pe la ihakimi,  erkiteken kena kari ihakimi menurut cara kena nghakimi, janah uga perbahanen kena man kalak si deban, bage ka nge kari perbahanenna man kena.*  Emaka, ngkai idahndu rintep* i bas mata seninandu tapi la idahndu balok i bas matandu sendiri?  Entah, uga banci ikatakenndu man seninandu, ‘Pediat aku mpedarat rintep* i bas matandu nari,’ padahal lit balok i bas matandu sendiri?  O kalak munapik! Pedarat lebe balok i bas matandu nari, kenca si e banci kam ngidah alu jelas janah mpedarat rintep* i bas mata seninandu nari.  “Ula bereken kai si badia man biang, janah ula benterken mutiara man babi, gelah la iperjakina jenari mulihken ia janah iserangna kena.  “Teruslah pindo, maka pasti ibereken man kena; teruslah darami, maka pasti idat kena; teruslah tuktuk, maka pasti ibukaken man kena;  sebap ise pe si mindo pasti ngalo, ise pe si ndarami pasti idatna, janah ise pe si nuktuk pasti ibukaken.  Ise i bas kena nari si mere batu man anakna adi roti nge si ipindona? 10  Entah mere nipe adi ikan nge si ipindona? 11  Adi kena saja si erdosa iteh kena carana mere si mehuli man anak-anak kena, terlebih ka Bapak kena si i surga! Pasti iberekenNa si mehuli man kalak si mindo baNa. 12  “Kai pe si ate kena ilakoken kalak man kena, lakoken ka si bage bana. E me situhuna maksud Undang-Undang Musa ras Ajaren Nabi-Nabi. 13  “Masuklah arah gerbang si sempit, erkiteken gerbang ras dalan si mbelang e nuju ku kematen,* janah nterem kalak masuk arah e. 14  Tapi gerbang si sempit ras dalan si mesera e nuju ku kegeluhen, janah piga-piga kalak ngenca si banci ndatkenca. 15  “Hati-hatilah nandangi nabi-nabi palsu si reh man kena, si arah darat nari teridah bagi biri-biri, tapi situhuna kalak e srigala si merangap. 16  Banci itandai kena kalak e arah buahna* nari. Me labo pernah ipepulung kalak anggur i bas peren nari ntah pe buah ara i bas rambah nari? 17  Bage ka nge, batang si mejile tentu mejile ka buahna, tapi batang si la mejile tentu la ka mejile buahna. 18  Labo banci la mejile buahna batang si mejile, bage pe labo banci mejile buahna batang si la mejile. 19  Tiap batang si la mejile buahna itabah me, jenari itamaken ku bas api. 20  Jadi situhuna, arah buahna* nge maka banci itandai kena kalak e. 21  “Labo kerina kalak si erlebuh man bangku, ‘O Tuan, Tuan,’ masuk ku bas Kerajan surga, tapi kalak si ngelakoken peraten Bapakku si i surga nge. 22  I bas wari e pagi, nterem kalak ngataken man bangku, ‘O Tuan, Tuan, la kin i bas gelarndu kami ernubuat, janah i bas gelarndu kami mpelawes malekat-malekat jahat, bage pe i bas gelarndu ilakoken kami melala perbahanen si dem kuasa?’ 23  Tapi kukataken pagi man kalak e, ‘La pernah kena kutandai! Laweslah i bas aku nari, o kalak jahat!’ 24  “Ise si megi kata-kataku enda ras ndalankenca, ia bali bagi kalak pentar si majekken rumahna i datas batu. 25  Rumah e labo runtuh aminna gia reh udan si meder ras banjir, bage pe ientam angin si meter, sebap rumah e ipajekken i datas batu. 26  Tapi, ise si megi kata-kataku enda tapi la idalankenna, ia bali ras kalak motu si majekken rumahna i datas kersik. 27  Sanga reh udan si meder ras banjir, bage pe ientam angin si meter, minter runtuh janah sontar rumah e.” 28  Kenca dung ikataken Jesus kerina enda, jengang kalak si nterem ngidah carana ngajar. 29  Sebap ia ngajar selaku kalak si lit kuasana, labo bali ras guru-guru agama kalak e.

Cataten kaki

Ntah “uga sukaten si igunaken kena nukati, alu e ka nge kari isukatken man kena.”
Ntah “kai pe si kitik kel.”
Ntah “kai pe si kitik kel.”
Ntah “kai pe si kitik kel.”
As. “pengkernepen.”
Ntah “perbahanenna.”
Ntah “perbahanenna.”