Matius 6:1-34

  • KHOTBAH I DELENG (1-34)

    • Ula ngelakoken si benar gelah iperdiateken (1-4)

    • Cara ertoto (5-15)

      • Contoh toto (9-13)

    • Erpuasa (16-18)

    • Erta i doni ras i surga (19-24)

    • Ula nai kuatir (25-34)

      • Terus pelebe Kerajan (33)

6  “Hati-hatilah, ula sempat ilakoken kena kai si benar i lebe-lebe kalak gelah iperdiatekenna. Adi bage, la kari idat kena upah i bas Bapak kena si i surga nari.  Emaka, adi mere kam man kalak mesera, ula lebe iembusndu trompet,* bali bagi si ilakoken kalak si munapik i bas ingan-ingan pulung kalak Jahudi* bage pe i dalan gelah ipuji kalak. Situhuna, nggo ialoken kalak e kerina upahna.  Tapi, adi mere kam man kalak mesera, ula sempat iteh tanndu si kiri kai si ilakoken tanndu si kanan,  gelah kai si iberekenndu man kalak mesera la iteh kalak. Alu bage, Bapakndu si ngenen i bas ingan si terbuni nari masu-masu kam.  “Bage ka pe, adi ertoto kena, ula bagi kalak si munapik, si meriah iakapna ertoto janahna cinder i bas ingan-ingan pulung kalak Jahudi* bage pe i persimpangen dalan si mbelin gelah idah kalak. Situhuna, nggo ialoken kalak e kerina upahna.  Tapi adi ertoto kam, laweslah ku bas kamarndu janah tutup pintuna, kenca si e ertotolah man Bapakndu si la teridah. Alu bage, Bapakndu si ngenen i bas ingan si terbuni nari masu-masu kam.  Sanga ertoto, ula terus ulih-ulihi kata-kata si seri bali bagi si ilakoken kalak i bas bangsa-bangsa si deban nari. Iakapna banci ia ibegi erkiteken totona si gedang e.  Emaka ula bagi kalak e, sebap iteh Bapak kena kai si iperluken kena aminna pe lenga ipindo kena.  “Bagendalah kena ertoto: “‘O Bapak kami si i surga, ipebadia min gelarNdu. 10  Rehlah min KerajanNdu.* Jadilah min peratenNdu i doni bali bagi i surga. 11  Berekenlah man kami pangan* i bas wari enda, 12  janah ampuni min dosa-dosa* kami, bali bagi kami nggo ngampuni kalak si erdosa* man kami. 13  Ula min pediat kami nyerah i bas percuban,* tapi selamatken min kami i bas si jahat* nari.’ 14  “Adi iampuni kena kesalahen kalak si deban, kena pe iampuni Bapak kena si i surga. 15  Tapi adi la iampuni kena kesalahen kalak si deban, Bapak kena pe la ngampuni kesalahen kena. 16  “Sanga kena erpuasa, ula nai cidahken ayo si erceda ate bagi kalak si munapik, si alu sengaja la iurusna dirina* gelah banci idah kalak ia erpuasa. Situhuna, nggo ialoken kalak e kerina upahna. 17  Tapi sanga kam erpuasa, minaki bukndu ras erduhaplah kam, 18  gelah ise pe la ngidahsa kam erpuasa, selain Bapakndu si la teridah e. Alu bage, Bapakndu si ngenen i bas ingan si terbuni nari masu-masu kam. 19  “Ula nai ipepulungndu erta i doni, perban serangga* ras karat banci ncedaisa janah pinangko banci nangkosa. 20  Tapi, pepulunglah ertandu i surga, perban i je serangga ras karat la banci ncedaisa, janah pinangko la banci nangkosa. 21  Sebap i ja ertandu, i je ka me ukurndu. 22  “Mata kap lampu man daging. Adi terang* pengidahndu, kerina dagingndu pe terang. 23  Tapi adi matandu percian,* kerina dagingndu jadi gelap. Adi terang si lit i bas kam e pe kepeken kegelapen, seh nari nge gelapna e! 24  “Ise pe la banci jadi budak man dua tuan. Erkiteken pasti nembeh atena si sekalak janah ikelengina si deban, ntah pe setia ia man si sekalak tapi la diatena si deban. La kena banci jadi budak man Dibata bage pe man Kebayaken. 25  “Erkiteken si e, ula nai kena kuatir kerna kegeluhen kena, kerna kai si ipan kena ntah kai si inem kena, kerna daging kena ntah kerna kai si ipake kena. La kin ergan kegeluhen asangken pangan, ras ergan dagingta asangken paken? 26  Perdiateken min perik-perik i langit. La ia nuan benih ntah pe rani ntah pe nimpan i bas lumbung, tapi ibere Bapak kena si i surga nge ia man. La kin ergan kena asangken perik-perik e? 27  Ise i bas kena nari si banci nambahi sitik umurna alu perasan kuatir?* 28  Janah, ngkai kena kuatir kerna paken? Erlajarlah i bas bunga* nari si turah i bas taneh si la iurus. La ia erdahin, la ia njait, 29  tapi Salomo si seh kel muliana pe, pakenna la bagi salah sada bunga e jilena. 30  Jadi, adi ibereken Dibata paken si bage man bunga-bunga si turah bage saja, si wari enda lit janah pagi itutung, terlebih ka kena, kalak si kitik kinitekenna! 31  Emaka, ula pernah kuatir janah ngataken, ‘Kai si ipan kami?’ ntah, ‘Kai si inem kami?’ ntah pe, ‘Kai si ipake kami?’ 32  Sebap kerina e iayaki bangsa-bangsa alu semangat. Iteh Bapak kena si i surga maka iperluken kena kerina e. 33  “Teruslah pelebe Kerajan ras kai si benar menurut Dibata, emaka kerina si debanna ibereken kari man kena. 34  Jadi ula pernah kuatir kerna wari si pepagi, erkiteken wari si pepagi lit ka kekuatirenna sendiri. Bias me tiap wari lit masalahna sendiri.

Cataten kaki

Ntah “imomokenndu.”
As. “sinagoga.” Nen Kamus.
As. “sinagoga.” Nen Kamus.
Ntah “KinirajanNdu.”
As. “roti.”
Ntah “utang.”
Ntah “rutang.”
As. “Ula min baba kami ku bas percuban.”
Maksudna, Setan.
Ntah “ipemejin-mejinna ayona.”
Ntah “nget-nget.”
As. “sederhana.”
As. “jahat.”
Ntah “aru ate.”
Ntah “lili.”