Matius 3:1-17

  • Johanes Peridiken erberita (1-12)

  • Jesus iperidiken (13-17)

3  Paksa si e, Johanes Peridiken mulai erberita i bas taneh mesawang* i Judea,  nina, “Ertobatlah,* erkiteken Kerajan surga nggo ndeher.”  Situhuna, ia me si imaksud i bas kata-kata si ipeseh arah Nabi Jesaya, “Lit si erlebuh i taneh mesawang* nari, ‘Sikapkenlah dalan man Jahwe! Pepinterlah dalan-dalanNa.’”  Ipake Johanes paken si iban i bas mbulu unta nari janah ikat pinggangna i bas kulit nari. Panganna eme labang ras madu kerangen.  Kalak si lit i bas Jerusalem bage pe arah kerina daerah Judea ras daerah i sekeliling Lau Jordan reh ndahi ia,  emaka iperidikenna* kalak e i Lau Jordan janah iakui kalak e dosa-dosana alu terus terang.  Sanga idahna nterem kalak Parisi ras kalak Saduki reh ku je, nina man kalak e, “O kena kesusuren nipe si erbisa, ise si mpersingeti kena maka banci kena pulah arah rawa Dibata si nandangi reh?  Emaka, asilkenlah buah tanda kena ertobat.*  Ula iakap kena maka banci ikataken kena bas pusuh kena, ‘Bapak kami kap Abraham.’ Kukataken man kena maka Dibata ngasup njadiken batu-batu enda jadi kesusuren Abraham. 10  Kapak nggo itama i teruh batang kayu. Tiap batang kayu si la mejile buahna pasti itabah janah ibenterken ku api. 11  Aku, baginku, mperidiken kena alu lau perban kena nggo ertobat.* Tapi kalak si nandangi reh kenca aku, iperidikenna kena kari alu kesah si badia ras api. Belinen kuasana asangken aku janah mbuka selopna pe la aku cocok.* 12  Alat miari lit i bas tanna, janah ibersihkenna pagi inganna ngerik.* Ipepulungna pagi gandumna e ku bas lumbung, tapi itutungna pagi lapungna* alu api si la banci imateken.” 13  Kenca si e, reh Jesus Galilea nari ku Lau Jordan gelah iperidiken Johanes. 14  Tapi icubaken Johanes nulaksa alu ngataken, “Aku nge arusna si iperidikenndu, tapi ngkai maka kam si ndahi aku?” 15  Ngaloi Jesus, “Labo dalih, sebap alu bage silakoken kerina peraten Dibata.” Emaka lanai itulak Johanes ia. 16  Kenca iperidiken, mis ndarat Jesus arah lau nari. Rempet me terbuka langit janah idah Johanes kesah Dibata nusur ku datas Jesus bagi merpati. 17  Terbegi ka me sora i langit nari, “Enda me AnakKu si Kukelengi, ia me si ngena ateKu.”

Cataten kaki

Taneh si mbelang si jarang iingani.
Ntah “Jera dingen robahlah.”
Taneh si mbelang si jarang iingani.
Nen Kamus.
Ntah “jera dingen robah.”
Ntah “jera dingen robah.”
Ntah “metunggung.”
Ntah “inganna misahken buah arah tangkena.”
Ntah “buah si la risi.”