Matius 22:1-46

  • Perumpaman kerna pesta perjabun (1-14)

  • Dibata ras Kaisar (15-22)

  • Penungkunen kerna kekeken (23-33)

  • Dua perentah si mbelinna (34-40)

  • Anak Daud kin Kristus e? (41-46)

22  Sekali nari ngerana Jesus man kalak e alu perumpaman,* nina,  “Kerajan surga e banci ipeseri ras sekalak raja si erban pesta perjabun man anakna si dilaki.  Isuruhna budak-budakna ngelebuh kalak si iundang ku pesta perjabun e, tapi kalak e la nggit reh.  Isuruhna ka mulihi budak-budak si deban, nina, ‘Kataken man kalak si iundang, “Enggo kusikapken pangan, lembu-lembu ras asuh-asuhen si mbur nggo ipotong janah kerinana nggo sikap. Rehlah ku pesta perjabun e.”’  Tapi la diate kalak e janah lawes ia, deba ku jumana, si debanna ndahiken usahana.  Lit ka si nangkap budak-budak e, ipekpekina, janah ibunuhna.  “Merawa kel raja, emaka isuruhna pasukenna janah ibunuhna pemunuh e ras itutungna kota kalak e.  Kenca si e ikatakenna man budak-budakna, ‘Pesta perjabun nggo sikap, tapi kalak si iundang e la cocok* reh.  Erkiteken si e, laweslah ku dalan-dalan si nuju ku darat kota, janah undang ise pe si ijumpai kena ku pesta perjabun e.’ 10  Emaka, lawes budak-budak e ku dalan-dalan janah ipepulungna kerina si ijumpaina, si jahat bage pe si mehuli. Emaka dem tamu bas ingan acara perjabun e. 11  “Sanga reh raja guna mereksa tamu-tamu, idahna sekalak dilaki si la make baju pesta. 12  Emaka isungkunna ia, ‘O Teman, uga maka banci kam masuk ku jenda alu la make baju pesta?’ Sinik saja ia. 13  Emaka nina raja man pelayan-pelayanna, ‘Iket tan ras nahena janah ambekken ia ku darat, ku bas kegelapen. I je me kari ia tangis janah erderep ipenna.’ 14  “Sebap nterem si iundang, tapi sitik si ipilih.” 15  Kenca si e lawes kalak Parisi janah arih-arih kalak e gelah banci njebak Jesus alu rananna. 16  Emaka isuruh kalak e murid-muridna radu ras pengikut partai Herodes ndahi Jesus, nina, “O Guru, iteh kami maka kam ngataken kai si benar janah ngajarken dalan Dibata alu benar, bage pe la idaramindu ngena ate manusia, erkiteken la inenndu penampilen kalak arah kai si teridah. 17  Kataken min man kami, menurutndu, banci ntah lang nggalar pajak kepala man Kaisar?” 18  Tapi iteh Jesus la mehuli ukur kalak e, emaka nina, “O kalak si munapik, ngkai maka icubai kena aku? 19  Cidahken man bangku sen logam guna pajak e.” Ibereken kalak e man bana sada dinar.* 20  Nina man kalak e, “Gambar ras gelar ise enda?” 21  Ijawap kalak e, “Kaisar.” Jenari nina man kalak e, “Adi bage, bereken man Kaisar kai si memang jadi bagin Kaisar, tapi man Dibata kai si memang jadi bagin Dibata.” 22  Megi si e, jengang kalak e, jenari lawes ia nadingken Jesus. 23  I bas wari e ka pe, kalak Saduki si la tek maka lit kekeken reh ndahi Jesus janah nungkun, 24  “O Guru, nina Musa, ‘Adi lit sekalak dilaki mate tapi la lit anakna, senina si mate e arus ngempoi ndeharana e guna mereken kesusuren man seninana ndai.’ 25  Lit pitu kalak si ersenina. Sintua erjabu dungna mate, la lit kesusurenna, emaka iempoi senina si mate e ndeharana e. 26  Bage ka si terjadi man si peduaken ras si peteluken seh ngayak si pepituken. 27  Dungna diberu e pe mate. 28  Adi bage, i bas kekeken, ndehara ise nge ia pagi arah si pitu e? Sebap kerinana nggo pernah ngempoi ia.” 29  Ijawap Jesus, “Enggo salah kena e, erkiteken la iangkai kena Kitap si Badia ntah pe kuasa Dibata. 30  Sebap paksa kekeken, dilaki ntah pe diberu la erjabu bage pe la ipejabuken, tapi kalak e bali bagi malekat si i surga. 31  Kerna kekeken kalak mate, lenga kin pernah ibaca kena kai si ikataken Dibata man kena, nina, 32  ‘Aku kap Dibata Abraham, Dibata Isak, ras Dibata Jakup’? Ia labo Dibata kalak mate tapi Dibata kalak si nggeluh.” 33  Jengang jelma si nterem e megi pengajarenna. 34  Kenca ibegi kalak Parisi maka nggo sinik kalak Saduki ndai iban Jesus, ras-ras kalak Parisi njumpai Jesus. 35  Sekalak i bas kalak e nari si ahli i bas Undang-Undang Musa ncubai ia, nina, 36  “O Guru, perentah si apai nge si mbelinna i bas Undang-Undang Musa?” 37  Ngaloi ia, “‘Arus ikelengindu Jahwe Dibatandu alu kerina kegeluhenndu,* pusuhndu, ras perukurenndu.’ 38  Enda me perentah si mbelinna ras si pentingna. 39  Si peduaken bali ras si ndai, eme, ‘Arus ikelengindu kalak si deban bagi kam ngkelengi dirindu.’ 40  Dua perentah enda me si jadi dasar kerina Undang-Undang Musa ras Ajaren Nabi-Nabi.” 41  Sanga kalak Parisi pulung denga, isungkun Jesus kalak e, 42  “Uga pendapat kena kerna Kristus? Anak ise ia?” Ngaloi kalak e, “Anak Daud.” 43  Nungkun ia, “Adi bage, ngkai maka igelari Daud ia Tuan? Sebap Daud si ipengaruhi kesah si badia ngataken, 44  ‘Nina Jahwe man Tuanku, “Kundullah arah kananKu seh asa Kutamaken musuh-musuhndu i teruh nahendu”’? 45  Adi igelari Daud ia Tuan, uga maka ia anakna?” 46  Ise pe la banci njawap ia, janah mulai jenari ise pe lanai pang nungkun man bana.

Cataten kaki

Ntah “anding-andingen.”
Ntah “metunggung.”
Sen logam pirak kalak Roma.
I bas bahasa Junani, psykhe. Nen Kamus.