Matius 20:1-34

  • Si erdahin i kebun anggur ndatken upah si seri (1-16)

  • Kematen Jesus inubuatken ka (17-19)

  • Mindo keduduken i bas Kerajan (20-28)

    • Jesus jadi tebusen man nterem jelma (28)

  • Dua kalak si pentang ipepalem (29-34)

20  “Kerajan surga e bali bagi tuan rumah si ndarat paksa erpagi-pagi guna ndarami si erdahin i bas kebun anggurna.  Kenca ersada arihna ras kalak si erdahin e maka upahna sada dinar* per wari, isuruhna kalak e ku kebun anggurna.  Kira-kira jam siwah erpagi-pagi* ndarat ka ia janah idahna kalak si la lit pendahinna bas pajak.  Nina man kalak e, ‘Kena pe berkatlah ku kebun anggurku. Kubereken kari upah si cocok man kena.’  Emaka lawes me kalak e. Kira-kira jam 12 ciger* ras jam 3 karaben,* ndarat ka ia mulihi janah ilakokenna ka bagi si ndai.  Dungna, kira-kira jam lima karaben* ndarat ia janah jumpa ras kalak si deban si cinder-cinder saja, janah nina man kalak e, ‘Engkai kena la erdahin janah cinder saja i jenda sada wari ben?’  Ijawap kalak e, ‘Perban la lit kalak si ndilo kami.’ Nina ngaloi, ‘Kena pe berkatlah ku kebun anggurku.’  “Paksa nggo berngi, nina si mada kebun anggur e man mandorna, ‘To dilo kalak si erdahin e janah galari upahna, si pudin erdahin lebe bereken upahna janah si leben erdahin pudin bereken.’  Paksa reh si erdahin jam lima karaben, tiap kalak ngaloken sada dinar.* 10  Emaka, paksa reh si leben erdahin, iakapna ialokenna terbuen, tapi kalak e pe igalari sada dinar.* 11  Kenca ialokenna, mulai kalak e jungut-jungut man tuan rumah e, 12  nina, ‘Kalak si pudin enda sada jam ngenca erdahin. Tapi ipeserindu kami ras ia, kami erdahin pagi-pagi nari seh ben janah kena las matawari!’ 13  Ngaloi tuan e man sekalak i bas kalak e nari, ‘O Teman, labo aku salah man bandu. La kin nggo sada arihta adi upahndu sada dinar?* 14  Buat upahndu janah laweslah. Kubereken ateku upah man si pudin reh seri ras upahndu. 15  Me ate-ateku nge adi jangku? Entah cian kin atendu* perban aku bujur?’* 16  Emaka, si perpudi pagi jadi si perlebe, janah si perlebe jadi si perpudi.” 17  Sanga lawes ku Jerusalem, ibaba Jesus 12 murid-muridna nerapken bana janah nina man kalak e, 18  “Begiken! Kita i bas perdalanen ku Jerusalem, janah iserahken me Anak manusia man imam-imam kepala ras ahli Undang-Undang Musa guna iukum mate. 19  Iserahken pagi ia man kalak i bas bangsa si deban nari guna ihina, iligasi, janah ibunuh i tiang.* I bas wari si peteluken ipekeke me ia.” 20  Kenca si e, reh me nande anak-anak Sebedeus radu ras dua anakna ndeheri Jesus, jenari erjimpuh janah mindo man bana. 21  Nina Jesus, “Kai atendu?” Ijawapna, “Ban min gelah dua anakku enda banci kundul i sampingndu i bas Kerajanndu, sada arah kananndu janah sada nari arah kirindu.” 22  Ngaloi Jesus, “La kap iangka kena kai si ipindo kena e. Ngasup kin kena minem tare calung* si nandangi kuinem?” Ijawap kalak e, “Ngasup.” 23  Ngaloi ia, “Payo, minem nge kena pagi tare calungku. Tapi, kerna ise si kundul arah kanan ras kiriku, labo aku si nentukenca. Bapakku nggo nikapkenca man kalak si itentukenNa.” 24  Paksa ibegi murid-murid si sepuluh kalak nari kerna si enda, merawa ia man dua kalak si ersenina e. 25  Tapi idilo Jesus kalak e, nina, “Iteh kena maka penguasa bangsa-bangsa ngkuasai rayatna, janah pejabat pe erkuasa nandangi kalak e. 26  Tapi, kena la banci bage. Ise pe si atena jadi si mbelin i bas kena arus jadi pelayan kena, 27  janah ise pe si atena jadi si perlebe i bas kena arus jadi budak kena. 28  Bali bagi Anak manusia reh labo guna ilayani, tapi guna ngelayani, janah mereken kegeluhenna selaku tebusen jadi penukar man nterem jelma.” 29  Paksa kalak e ndarat Jeriho nari, nterem kel jelma ngikutken ia. 30  Lit dua dilaki si pentang kundul i tepi dalan, janah ibegina maka Jesus paksana lewat. Emaka nina alu sora megang, “O Tuan, Anak Daud, mekuah min atendu kami!” 31  Tapi, isergangi jelma si nterem e ia, isuruhna sinik. Amin gia bage, reh gangna kalak e ngerana, nina, “O Tuan, Anak Daud, mekuah min atendu kami!” 32  Emaka ngadi Jesus, ilebuhna kalak e, nina, “Kai kin ate kena si kulakoken man kena?” 33  Ijawap kalak e, “O Tuan, buka min mata kami.” 34  Erkiteken mekuah ate Jesus, idadapna mata kalak e. Minter kalak e erpengidah janah ikutken kalak e Jesus.

Cataten kaki

Sen logam pirak kalak Roma.
I bas kalak Jahudi, enda jam si peteluken.
I bas kalak Jahudi, enda jam si peenemken.
I bas kalak Jahudi, enda jam si pesiwahken.
I bas kalak Jahudi, enda jam si pesepulusadaken.
Sen logam pirak kalak Roma.
Sen logam pirak kalak Roma.
Sen logam pirak kalak Roma.
As. “Entah jahat kin matandu.”
Ntah “aku nggit mere.”
Ntah “kayu.”
Ntah “cangkir.” Enda ngertiken peraten Dibata guna mpediat Jesus mate alu tuduhen ihinana Dibata.