Matius 2:1-23

  • Reh ahli-ahli bintang (1-12)

  • Lawes ku Mesir (13-15)

  • Ibunuh Herodes anak dilaki si kitik denga (16-18)

  • Mulih ku Nasaret (19-23)

2  Kenca Jesus lahir i Betlehem si lit i Judea paksa Herodes* jadi raja, ahli-ahli bintang* arah Timur nari reh ku Jerusalem,  nina kalak e, “I ja kin raja kalak Jahudi si nggo lahir e? Idah kami bintangna paksa kami i Timur janah reh kami guna erjimpuh man bana.”  Megi si e, la tenang Raja Herodes ras kerina kalak Jerusalem.  Emaka ipepulungna kerina imam kepala ras kalak si ahli bas Undang-Undang Musa, isungkunna kalak e i ja Kristus* lahir.  Ngaloi kalak e, nina, “I Betlehem si lit i Judea bagi si nggo itulisken nabi,  ‘O kam Betlehem i taneh Juda, kam labo kota si la meherga i bas kerina penguasa Juda, sebap i bas kam nari reh me sekalak peminpin si mpermakani bangsaKu Israel.’”  Kenca si e, alu erbuni-buni ilebuh Herodes ahli-ahli bintang e guna mastiken ndigan kin bintang e mulai teridah.  Paksa isuruhna kalak e lawes ku Betlehem, nina, “Berkatlah, darami anak e alu megermet janah adi nggo jumpa kena, kataken man bangku gelah aku pe ku jah guna erjimpuh man bana.”  Kenca ibegi kalak e perentah Raja, berkat kalak e janah kepeken bintang si idah kalak e paksa i Timur nggo ngelebei kalak e janah ngadi i datas ingan anak e. 10  Meriah kel ukur kalak e ngidah bintang e. 11  Paksa masuk kalak e ku rumah e, idahna anak si kitik e ras mamakna, Maria. Kenca si e, erjimpuh kalak e man bana janah ibuat kalak e emas, kemenyan, ras mur guna ibereken jadi hadiah. 12  Tapi, perban ipersingeti Dibata kalak e arah nipi gelah ula mulihken ku Herodes, emaka mulih kalak e ku negrina arah dalan si deban. 13  Kenca kalak e berkat, reh me malekat Jahwe i bas nipi Jusup janah nina, “Medakken, baba anak si kitik e ras mamakna janah kiamlah ku Mesir. Tadinglah kam i jah seh asa aku erkata man bandu, sebap idarami Herodes atena anak e guna munuh ia.” 14  Emaka, medak Jusup janah i bas berngi e ibabana anak si kitik e ras mamak anak e ku Mesir. 15  I je me ia tading seh asa mate Herodes. Alu bage, terjadi me kai si ikataken Jahwe arah nabiNa, “Arah Mesir nari Kulebuh anakKu.” 16  Kenca iteh Herodes maka ia nggo itipu ahli-ahli bintang ndai, merawa kel ia. Isuruhna gelah kerina anak dilaki si lit i Betlehem ras si lit i sekelilingna ibunuh, eme anak si umurna dua tahun ku teruh. Enda sue ras waktu si nggo ipastikenna arah ahli-ahli bintang e. 17  Emaka, terjadi me kai si ikataken arah Nabi Jeremia, 18  “Lit terbegi sora nderkuh ras tangis i Rama. Itangisi Rahel anak-anakna janah la ia nggit iapuli sebap anak-anakna nggo lanai lit.” 19  Kenca mate Herodes, reh me malekat Jahwe i bas nipi Jusup sanga ia i Mesir. 20  Janah nina, “Medakken, baba anak si kitik e ras mamakna ku negri Israel, perban kalak si ndarami anak e guna munuhsa nggo mate.” 21  Emaka medak ia janah ibabana anak si kitik e ras mamakna ku negri Israel. 22  Tapi, paksa ibegina maka Arkelaus si merentah Judea guna nggantiken Herodes eme bapakna, mbiar ia lawes ku je. Selain si e, perban idatna persinget Dibata arah nipi, emaka lawes ia ku daerah Galilea. 23  Seh me ia i bas kota si igelari Nasaret janah tading i je, emaka terjadi me kai si nggo ikataken arah nabi-nabi, “Igelari pagi ia kalak Nasaret.”*

Cataten kaki

Nen Kamus.
Ntah “kalak si meteh wari alu ngenen bintang.”
Ntah “Mesias; Kalak si Ipilih.”
I bas cakap Heber, enda banci saja ertina “tunas.”