Matius 17:1-27

  • Salih rupa Jesus (1-13)

  • Kiniteken bali bagi biji sawi (14-21)

  • Kematen Jesus inubuatken ka (22, 23)

  • Igalari pajak alu sen logam arah babah ikan nari (24-27)

17  Enem wari kenca si e, ibaba Jesus me Petrus ras Jakup bage pe Johanes seninana, kalak e saja ngenca ku das deleng si meganjang.  Kenca si e, salih rupa Jesus i lebe-lebe kalak e. Ayona ersinar bagi matawari, janah uisna si arah darat jadi terang* kel.  Rempet idah kalak e Musa bage pe Elia ercakap-cakap ras Jesus.  Emaka nina Petrus man Jesus, “O Tuan, meriah ukur kami i jenda. Adi nggit kam, banci kuban telu kemah i jenda: sada man bandu, sada man Musa, janah sada nari man Elia.”  Sanga ia ngerana, rempet lit embun si terang nutupi kalak e, janah terbegi sora arah embun e, “Enda me AnakKu, si Kukelengi. Ia me si ngena ateKu. Begikenlah ia.”  Megi si e, erjimpuh murid-murid perban seh kel biarna.  Emaka ideheri janah idadap Jesus kalak e, nina, “Tediskenlah, ula mbiar.”  Paksa inen kalak e, ise pe la idahna selain Jesus ngenca.  Sanga nusur arah deleng e nari, iperentahken Jesus kalak e, “Ula kataken man ise pe kerna kai si nggo idah kena e seh asa Anak manusia ipekeke i bas si mate nari.” 10  Tapi, nungkun murid-murid bana, “Dage, ngkai maka ahli-ahli Undang-Undang Musa ngataken maka Elia arus reh leben?” 11  Nina Jesus ngaloi, “Payo, reh me Elia janah ipesikapna kerinana. 12  Elia nggo reh, tapi la itandai kalak e ia janah iperlakoken kalak e ia bagi ate-atena saja. Alu bage ka me, Anak manusia pagi ngenanami kiniseran i bas tan kalak e.” 13  Dungna iangkai murid-murid maka Johanes Peridiken nge si icakapkenna. 14  Paksa idahi kalak e jelma si nterem, reh sekalak dilaki ndeheri Jesus janah erjimpuh i lebe-lebena, nina, 15  “O Tuan, mekuah min atendu anakku si dilaki, perban ia sawanen janah mekelek kel keadanna. Rusur ia ndabuh ku bas api bage pe ku bas lau. 16  Enggo kubaba ia man murid-muridndu, tapi la banci ipepalemna.” 17  Ngaloi Jesus, “O kena kalak si la erkiniteken ras jahat, asa kai nari dekahna aku arus terus ras kena? Asa kai nari dekahna aku arus sabar man kena? Baba ia ku jenda.” 18  Emaka isergang Jesus malekat jahat e, dungna ndarat me ia i bas anak e nari. Minter ia malem. 19  Kenca si e, paksa la lit kalak si deban i je, reh me murid-murid ndeheri Jesus, janah nina, “Engkai maka la banci ipelawes kami?” 20  Nina ngaloi, “Perban kitik kiniteken kena. Situhuna, adi lit kin kiniteken kena asa biji sawi lah gia, banci ikataken kena man deleng enda, ‘Miser jenda nari ku jah,’ maka miser me ia, janah kai pe banci ilakoken kena.” 21  *—— 22  Paksa kalak e pulung i Galilea, ikataken Jesus man kalak e, “Anak manusia ihianati pagi bas tan musuhna, 23  janah ibunuh kalak e me ia. I bas wari si peteluken, ipekeke me ia.” Emaka ceda kel ate kalak e. 24  Kenca seh kalak e i Kapernaum, kalak si mpepulung pajak dua drakhma* ndeheri Petrus janah nina, “Igalari guru kena nge pajak dua drakhma?” 25  Ijawap Petrus, “Igalarina.” Tapi, paksa masuk ia ku rumah, leben Jesus ngerana man bana nina, “Uga menurutndu, Simon? I bas ise nari nge raja-raja doni ngaloken iuren ntah pe pajak kepala? I bas anak-anakna nari ntah kalak si deban?” 26  Sanga ikatakenna, “I bas kalak si deban nari,” nina Jesus bana, “Adi bage, situhuna anak-anak kalak e bebas pajak. 27  Tapi, perban la ateta erban kalak e tertuktuk, laweslah ngkawil ku lawit janah buat ikan si pertama si idatndu. Paksa ibukandu babahna, datndu kari i je sada logam pirak.* Buatndulah e janah bereken man kalak e guna pajakta duana.”

Cataten kaki

Ntah “mbentar.”
Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
Enda seri ras upah dua wari.
Enda ergana seri ras 4 drakhma.