Markus 5:1-43

  • Malekat-malekat jahat isuruh Jesus masuk ku babi-babi (1-20)

  • Anak Jairus; idadap sekalak diberu uis Jesus si arah darat (21-43)

5  Kenca si e seh me kalak e i sebrang lawit i daerah kalak Gerasa.  Ndarat kenca Jesus i bas perahu nari, reh me sekalak dilaki si irasuki malekat jahat arah kuburen nari ndahi ia.  Ia tading i bas kuburen-kuburen janah seh ngayak paksa si e, ise pe la ngasup ngiket ia alu mekeskes aminna pe alu rante.  Nahe ras tanna nggo rusur iiket alu rante, tapi iretapkenna ras icedakenna rante e. Ise pe la ngasup naluken ia.  Janah la erngadi-ngadi, suari ras berngi, serko ia i bas kuburen-kuburen bage pe i bas deleng-deleng janah ilukaina bana alu batu.  Tapi sanga idahna Jesus ndauh nari, kiam ia janah erjimpuh bana.  Kenca si e serko ia alu sora si megang, “O Jesus, Anak Dibata Si Meganjangna, kai kin atendu? Ersumpahlah i bas gelar Dibata gelah ula isiksandu aku.”  Sebap nggo ikataken Jesus bana, “O malekat jahat, ndaratlah i bas dilaki e nari.”  Tapi isungkun Jesus ia, “Ise gelarndu?” Nina ngaloi, “Gelarku Legiun,* sebap nterem kami.” 10  Janah ipindo malekat-malekat jahat e kel man Jesus gelah ula ia ipelawes i bas daerah e nari. 11  Paksa si e lit sada rarasen babi sangana man i deleng. 12  Emaka mindo kel malekat-malekat jahat e man bana, nina, “Suruhlah kami masuk ku babi-babi ah.” 13  Emaka ipediatna me. Jenari ndarat malekat-malekat jahat e janah masuk ku babi-babi si buena lit kira-kira 2.000. Kiamen kerina babi e ku tebing jenari ndabuhen ku lawit, dungna mate gedap kerina. 14  Tapi permakan-permakan babi e kiam janah iceritakenna kerna si e i kota ras i kuta, emaka rehen kalak ngenen kai si nggo terjadi. 15  Idahi kalak e Jesus janah idahna dilaki si irasuki Legiun ndai, sangana kundul janah nggo ruis bage pe nggo jore ukurna, emaka mbiar kel kalak e. 16  Iceritaken kalak si ngidah kejadin e man kalak si reh kerna kai si terjadi nandangi kalak si kerasuken ndai ras babi-babi e. 17  Emaka mindo kel kalak e man Jesus gelah lawes ia i bas daerah kalak e nari. 18  Sanga Jesus nangkih ku perahu, dilaki si irasuki ndai mindo kel gelah ikut ras ia. 19  Tapi la ipediatna janah nina, “Mulihlah ku keluargandu, janah turiken man kalak e kerina si nggo ilakoken Jahwe bandu ras perkuah ate si nggo icidahkenNa bandu.” 20  Lawes me dilaki e janah iberitakenna i Dekapolis* kerina si nggo ilakoken Jesus bana, janah jengang kerina kalak e. 21  Jesus nyebrang mulihi alu perahu ku pantai si deban. Sanga ia i pantai denga, nterem kalak reh ndahi ia. 22  Salah sada kepala ingan pulung kalak Jahudi* si gelarna Jairus reh ku je. Sanga idahna Jesus, erjimpuh ia, 23  janah mindo kel ia, nina, “Anakku si diberu si kitik denga mekelek kel penakitna.* Rehlah min kam janah tamaken tanndu ku datasna gelah banci ia malem janah tetap nggeluh.” 24  Emaka lawes Jesus ras ia, janah nterem jelma siasak-asaken ngikutkenca. 25  I je, lit sekalak diberu si nggo 12 tahun dekahna pendarahen. 26  Enggo ertambar ia ku melala dokter, mesui kel iakapna iban kalak e. Enggo melala keri senna, amin bage la ia malem-malem tapi reh kelekna. 27  Sanga ibegina berita kerna Jesus, reh ia ku tengah-tengah jelma si nterem e, ideherina Jesus pudi nari, kenca si e idadapna uis Jesus si arah darat, 28  sebap terus ikatakenna, “Adi kudadap saja pe uisna si arah darat e, tentu malem nge aku.” 29  Janah minter ngadi pendarahenna e. Igejapkenna dagingna nggo malem i bas penakitna si mekelek e nari. 30  Mis iteh Jesus lit kuasa ndarat i bas dirina nari, emaka itulihkenna ku jelma si nterem e janah nina, “Ise si ndadap uisku?” 31  Tapi nina murid-muridna, “Idahndu nterem kalak siasak-asaken ndeheri kam, dage ngkai maka isungkunndu ka, ‘Ise si ndadap aku?’” 32  Tapi inenna ku sekelilingna guna meteh ise si ndadapsa. 33  Mbiar janah nggirgir diberu e, erkiteken itehna kai si nggo terjadi bana. Emaka reh ia janah erjimpuh i lebe-lebe Jesus janah iceritakenna uga situhuna. 34  Nina man diberu e, “O Nakku, kinitekenndu nggo erban kam malem. Laweslah alu dame, janah malemlah i bas penakitndu si mekelek e nari.” 35  Sanga Jesus ngerana denga, reh me piga-piga kalak arah rumah Jairus nari janah nina, “Anakndu nggo mate! Man kai nari ngelatihi Guru ena?” 36  Tapi kenca ibegi Jesus ranan kalak e, nina man Jairus, “Ula mbiar, erkiniteken sajalah.” 37  Ise pe la ipediatna ikut selain Petrus, Jakup, ras Johanes senina Jakup. 38  Emaka sanga seh kalak e i bas rumah Jairus, idahna nterem jelma gejek janah ngandung ras nderkuh. 39  Kenca masuk, nina man kalak e, “Engkai maka kena ngandung ras gejek? Anak enda labo mate tapi medem nge ia.” 40  Emaka itawai kalak e Jesus. Tapi kenca isuruhna kalak e kerina ndarat, ibabana bapak ras mamak anak e bage pe murid-murid si ikut ras ia guna masuk ku bas ingan anak e. 41  Sanga ijemakna tan anak e nina, “Talita kumi,” adi iterjemahken, ertina: “O anak diberu, kukataken bandu, medakken!” 42  Mis anak e medak ras erdalan. (Umurna 12 tahun.) Lanai tanggung riahna ukur kalak si i je. 43  Tapi iperentahken Jesus alu tegas* gelah ula ipebetehken kalak e man ise pe kerna si e, janah isuruhna gelah anak e ibere man.

Cataten kaki

Nen Kamus.
Ntah “Wilayah Sepuluh Kota.”
As. “sinagoga.” Nen Kamus.
Ntah “menam mate.”
Ntah “Tapi mulih-ulih iperentahkenna.”