Markus 3:1-35

  • Dilaki si lumpuh tanna sada ipepalem (1-6)

  • Enterem jelma i pantai (7-12)

  • Lit 12 rasul (13-19)

  • Kesah si badia ihina (20-30)

  • Nande ras senina-senina Jesus (31-35)

3  Sekali nari masuk Jesus ku ingan pulung kalak Jahudi,* i je lit sekalak dilaki si sembelah tanna lumpuh.  Emaka iperdiateken kalak Parisi kel ia guna ngenen ipepalemna nge kari dilaki e ntah lang bas wari Sabat, gelah banci ituduh kalak e ia.  Nina man kalak si lumpuh tanna e, “Cinderken, marilah ku tengah.”  Kenca si e, nungkun ia man kalak e, “Si apai kin si banci ilakoken bas wari Sabat: si mehuli nge ntah si jahat, nelamatken kegeluhen ntah munuh?” Tapi sinik saja kalak e.  Alu merawa, itatap Jesus kalak e janah ceda kel atena perban sitik pe la erpenggejapen pusuh kalak e. Jenari ikatakenna man dilaki e, “Pepinter tanndu.” Emaka ipepinterna tanna janah minter malem.  Kenca si e, ndarat kalak Parisi janah mis ia arih-arih ras pengikut partai Herodes guna munuh Jesus.  Kenca si e, lawes Jesus ku tepi lawit ras murid-muridna. Seh kel teremna kalak i Galilea ras Judea nari ngikutken ia.  Janah nterem kalak arah Jerusalem, Idumea, sebrang Lau Jordan, sekitar Tirus ras Sidon nari pe reh ndahi Jesus sanga ibegi kalak e kerna melala kel si nggo ilakokenna.  Janah isuruhna murid-muridna nikapken sada perahu si kitik man bana gelah ula ia kicat iban jelma si nterem e. 10  Erkiteken nggo nterem kalak si ipepalemna, kerina kalak si mekelek pinakitna siasak-asaken guna njemak ia. 11  Malekat-malekat jahat pe erjimpuh tiap jumpa ras Jesus janah nina alu sora megang, “Kam kap Anak Dibata.” 12  Tapi piga-piga kali alu tegas ipersingetina kalak e gelah ula iceritakenna kerna ia. 13  Nangkih Jesus ku sada deleng, ilebuhna kalak si ipilihna, janah ikutken kalak e ia. 14  Jenari ibanna* sada kelompok si buena 12 kalak, si igelarina ka rasul-rasul. Kalak enda me si nemani ia janah si isuruhna kari erberita, 15  ras iberekenna kuasa guna mpelawes malekat-malekat jahat. 16  Si 12 kalak i bas kelompok si ibanna e, eme Simon, si igelarina ka Petrus, 17  Jakup anak Sebedeus ras Johanes senina Jakup (igelarina ka kalak e Boanergis, si ertina “Anak-Anak Lenggur”), 18  Andreas, Pilipus, Bartolomeus, Matius, Tomas, Jakup anak Alpeus, Tadius, Simon kalak Kanani,* 19  ras Judas Iskariot, si bas pudi wari ihianatina Jesus. Kenca bage masuk ia ku sada rumah, 20  rehen ka me nterem jelma ku je, dungna man pe kalak e lanai sempat. 21  Sanga ibegi keluargana kerna si e, reh kalak e guna maba Jesus. Sebap nina kalak e, “Ia nggo adon.” 22  Selain si e, ahli-ahli Undang-Undang Musa si reh arah Jerusalem nari ngataken, “Lit bas ia Balsebul,* ipelawesna malekat-malekat jahat alu penampat penguasa malekat jahat e.” 23  Emaka kenca ilebuhna kalak e, ngerana ia alu perumpaman,* “Uga Setan banci mpelawes Setan? 24  Adi terjadi perpecahen bas sada kerajan, kerajan e la banci ertahan; 25  janah adi terjadi perpecahen bas sada rumah tangga, rumah tangga e labo banci ertahan. 26  Selain si e, adi Setan ngelawan dirina sendiri janah terjadi perpecahen bas kerajanna, la banci ia ertahan tapi dung me ia. 27  Ise pe si masuk ku rumah kalak si megegeh la banci nangko erta-ertana, pala iketna lebe kalak si megegeh e. Emaka banci irampokna isi rumahna e. 28  Situhuna, kerina perbahanen manusia iampuni nge pagi, la soal dosa kai si ilakokenna ras penghinan kai si ibelaskenna. 29  Tapi ise pe si ihinana kesah si badia, asa ndigan pe la banci iampuni erkiteken dosa e dosa si rasa lalap.” 30  Ikataken Jesus bage erkiteken nina kalak e, “Lit bas ia malekat jahat.” 31  Kenca si e, reh me nande ras senina-senina Jesus, cinder kalak e i darat janah isuruhna kalak ngelebuh ia. 32  Kalak si nterem si kundul i sekeliling Jesus ngataken, “Nandendu ras senina-seninandu paksana i darat ndarami kam.” 33  Tapi ngaloi ia, “Ise kin nandeku ras senina-seninaku?” 34  Kenca si e inenna kerina kalak si kundul i sekelilingna janah nina, “Enda kap nandeku ras senina-seninaku! 35  Ise pe si ndalanken peraten Dibata, ia me seninaku, turangku, ras nandeku.”

Cataten kaki

As. “sinagoga.” Nen Kamus.
Ntah “itetapkenna.”
Ntah “kalak si ergiah-giah.”
Penggelaren man Setan.
Ntah “anding-andingen.”