Markus 15:1-47

  • Jesus i lebe-lebe Pilatus (1-15)

  • Ihina i lebe-lebe jelma si nterem (16-20)

  • Ipakuken i bas tiang i Golgota (21-32)

  • Kematen Jesus (33-41)

  • Penguburen Jesus (42-47)

15  Paksa erpagi-pagi si lampas, arih-arih me kerina anggota Pengadilen Agama Jahudi,* eme imam-imam kepala, peminpin-peminpin, ras ahli Undang-Undang Musa. Jenari iket kalak e Jesus janah ibabana ia, kenca si e iserahkenna man Pilatus.  Isungkun Pilatus ia, “Kam kin Raja Kalak Jahudi?” Ijawapna, “Kam sendiri si ngatakenca.”  Tapi imam-imam kepala mereken melala tuduhen kerna ia.  Jenari mulihi isungkun Pilatus ia, nina, “La nge atendu ijawapndu? Nenlah seh kel buena tuduhen si ibereken kalak e man bandu.”  Tapi lanai ijawap Jesus, emaka mamang ate Pilatus.  Tiap Perayan Paskah, biasana ibebasken Pilatus sekalak tahanen si ipindo jelma si nterem.  Paksa si e, sekalak dilaki si igelari Barabas sangana ipenjaraken ras pemberontak si debanna si ngelakoken pemunuhen sanga ngelawan pemerentah.  Emaka reh me jelma si nterem janah mulai ipindona bagi si biasa ilakoken Pilatus man kalak e.  Nina Pilatus, “Nggit nge kena adi kubebasken Raja Kalak Jahudi enda?” 10  Sebap iteh Pilatus perban cian nge ate imam-imam kepala maka iserahkenna ia. 11  Tapi iajuk-ajuk imam-imam kepala jelma si nterem e gelah ipindona Barabas saja si ibebasken. 12  Ijawap Pilatus ka kalak e, “Adi bage, kai si arus kulakoken man kalak si igelari kena Raja Kalak Jahudi e?” 13  Sekali nari serko kalak e, “Bunuh ia bas tiang!”* 14  Tapi nungkun Pilatus, “Engkai? Kejahaten kai kin si ilakokenna?” Tapi terus reh gangna sora kalak e serko, “Bunuh ia bas tiang!”* 15  Erkiteken ibuat Pilatus atena ukur jelma si nterem e, ibebaskenna me Barabas man kalak e. Kenca isuruhna Jesus iligasi, iserahkenna ia gelah iukum mate i tiang.* 16  Ibaba prajurit-prajurit e Jesus ku halamen ingan tading gubernur, janah ilebuh kalak e kerina pasuken gelah pulung. 17  Ipakeken kalak e man Jesus jubah si warna terong, iban kalak e mahkota i bas peren duri nari janah itama kalak e ku takal Jesus. 18  Jenari nina, “Mejuah-juah, o Raja Kalak Jahudi!” 19  Ipekpeki kalak e ka takal Jesus alu buluh janah icidurina, jenari erjimpuh kalak e man bana. 20  Dungna, kenca ihina kalak e, itangtangi kalak e jubah si warna terong e, jenari ipakeken kalak e uis Jesus si arah darat man Jesus. Kenca si e ibaba kalak e Jesus gelah ipakuken i bas tiang.* 21  Janah ipaksa kalak e kalak si lewat eme Simon kalak Kireni si rehna arah kuta nari, bapak Aleksander ras Rupus, guna maba tiang siksan* Jesus. 22  Emaka ibaba kalak e ia ku ingan si igelari Golgota, si adi iterjemahken ertina “Ingan Tengkorak.” 23  I je, icubaken kalak e mere anggur si icampur ras mur man Jesus, tapi la ia nggit nginemsa. 24  Ipakuken kalak e ia i bas tiang* janah ibagi-bagiken kalak e uisna si arah darat alu erban undi guna nentuken baginna sekalak-sekalak. 25  Paksa si e jam siwah erpagi-pagi,* ipakuken kalak e ia i bas tiang.* 26  Janah lit ka tulisen si nuduh ia, si isina: “Raja Kalak Jahudi.” 27  Selain si e, ipakuken kalak e dua perampok i bas tiang* i sampingna, sada arah kananna, janah sada nari arah kirina. 28  *—— 29  Kalak si lewat ngupirken takalna janah melasken ranan si nghina ia, nina, “Oh! Kam si atendu ngeruntuhken rumah pertoton janah ibangunndu bas telu wari, 30  selamatkenlah bandu janah nusurlah arah tiang siksan* e nari.” 31  Bage ka pe, imam-imam kepala ras ahli Undang-Undang Musa nghina ia, nina, “Kalak si deban iselamatkenna, tapi dirina la terselamatkenna! 32  Pediatlah Kristus, Raja Israel e nusur gundari i bas tiang siksan* nari, gelah banci siidah janah tek kita.” Kalak si ipakuken i sampingna pe nghina ia ka. 33  Sanga jam 12 ciger,* kerina daerah e jadi gelap seh asa jam 3 karaben.* 34  Paksa jam telu karaben, erlebuh Jesus alu sora si megang, nina, “Eli, Eli, lama sabakhtani?” si ertina adi iterjemahken, “O Dibataku, Dibataku, ngkai maka itadingkenNdu aku?” 35  Megi si e, piga-piga kalak si cinder i je mulai ngataken, “Nen! Ilebuh-lebuhna Elia.” 36  Kenca si e, lit sekalak si kiam, irendamna sada bunga karang i bas anggur si macem, itamana e ku bas buluh, kenca si e iberekenna man Jesus gelah inemna. Jenari nina, “Pediat saja ia! Sinen ntah reh kin Elia mpenusursa.” 37  Tapi nderkuh Jesus alu megang dungna mate. 38  Janah tirai bas ingan si badia merigat jadi dua datas nari seh ku teruh. 39  Sanga perwira si cinder njagai ia ngidah kerina kejadin paksa Jesus mate, nina, “Ia pasti Anak Dibata.” 40  I je nterem diberu si ngenenca dauh-dauh nari, piga-piga eme Maria Magdalena, Maria nande Jakup si Kitik ras Joses, bage pe Salome, 41  si biasa nemani Jesus guna nampati ia sanga ia i bas Galilea, janah nterem diberu si deban si reh ras ia ku Jerusalem. 42  Kenca nggo ben wari, erkiteken e wari Persikapen, eme wari ope lenga Sabat, 43  reh me Jusup arah Arimatea nari, ia sekalak anggota si ihamati i bas Pengadilen Agama Jahudi.* Ia pe sangana nimai Kerajan Dibata. Pang ia ngadap Pilatus janah ipindona mayat Jesus. 44  Tapi ragu denga Pilatus maka Jesus nggo mate, emaka idilona perwira e janah isungkunna nggo nge Jesus mate ntah lang. 45  Emaka kenca ipastikenna arah perwira ndai, iberekenna mayat e man Jusup. 46  Kenca itukurna uis linen si halus, ipenusurna mayat Jesus, ibalutina ia alu uis linen halus jenari iamparkenna i bas kuburen si nggo ikurak i uruk batu. Kenca si e, igulingkenna sada batu guna nutupi kuburen e. 47  Tapi Maria Magdalena ras Maria nande Joses terus inenna ingan Jesus iamparken e.

Cataten kaki

As. “Sanhedrin.”
Ntah “kayu.”
Ntah “kayu.”
Ntah “kayu.”
Ntah “kayu.”
Nen Kamus.
Ntah “kayu.”
I bas kalak Jahudi, enda jam si peteluken.
Ntah “kayu.”
Ntah “kayu.”
Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
Nen Kamus.
Nen Kamus.
I bas kalak Jahudi, enda jam si peenemken.
I bas kalak Jahudi, enda jam si pesiwahken.
Ntah “Sanhedrin.”