Markus 12:1-44

  • Perumpaman kerna perjuma si jahat (1-12)

  • Dibata ras Kaisar (13-17)

  • Penungkunen kerna kekeken (18-27)

  • Dua perentah si pentingna (28-34)

  • Anak Daud kin Kristus? (35-37a)

  • Hati-hati ras ahli Undang-Undang Musa (37b-40)

  • Dua sen logam diberu mbalu si musil (41-44)

12  Kenca si e mulai Jesus ngerana man kalak e alu perumpaman,* “Sekalak dilaki erban kebun anggur, ipagarina i sekelilingna, ikurakna ingan mereh anggur i je janah ipajekkenna sada menara. Kenca si e, erbelah ia ras perjuma si deban janah lawes ia ku luar negri.  Kenca seh paksa rani, isuruhna sekalak budakna ndahi perjuma e guna muat baginna i bas kebun anggur e nari.  Tapi itangkap kalak e ia, ipekpekina, janah ipelawesna alu la maba kai pe.  Isuruhna ka mulihi budak si deban, tapi ipekpeki kalak e takalna janah ihina kalak e.  Isuruhna ka si deban, tapi ibunuh kalak e ia. Isuruhna ka nterem budak si debanna, tapi piga-piga ipekpekina janah deba ibunuhna.  Sekalak nari ngenca si lit bas ia eme anak si ikelengina. Dungna isuruhna ia ndahi kalak e, sebap nina i bas ukurna, ‘Iergai kalak e nge kari anakku e.’  Tapi nina perjuma e sapih-sapih ia, ‘Enda kap ahli warisna. Eta sibunuh ia, gelah banta warisenna.’  Emaka itangkap kalak e ia, ibunuhna jenari ibenterkenna ku darat kebun anggur e.  Kai nge kari si ilakoken si mpuna kebun anggur e? Reh me ia janah ibunuhna kerina perjuma e, kenca si e iberekenna kebun anggur e man si deban. 10  La kin pernah ibaca kena ayat enda, ‘Batu si itulak tukang bangunen, batu enda nggo jadi batu si utama. 11  Batu e rehna i bas Jahwe nari, janah luar biasa kel e man banta.’” 12  Erkiteken si e, itangkap peminpin-peminpin agama atena Jesus, sebap iteh kalak e maka kalak e si paksana icakapken Jesus i bas perumpaman* e. Tapi mbiar kalak e man jelma si nterem, emaka lawes kalak e nadingken ia. 13  Kenca si e, isuruh kalak e piga-piga kalak Parisi ras pengikut partai Herodes ndahi Jesus guna njebak ia alu rananna. 14  Kenca seh, nina kalak e, “O Guru, iteh kami maka kam ngataken kai si benar bage pe la idaramindu ngena ate manusia, erkiteken la inenndu penampilen kalak arah kai si teridah, tapi iajarkenndu dalan Dibata sentudu ras kebenaren. Adi bage banci ntah lang nggalar pajak kepala man Kaisar? 15  Arus nge sigalari ntah lang?” Erkiteken itehna maka kalak e munapik, nina man kalak e, “Engkai maka icubai kena aku? Bereken dage man bangku sada sen logam* gelah kunen.” 16  Ibereken kalak e sada man bana, jenari nina Jesus, “Gambar ras gelar ise enda?” Ijawap kalak e, “Kaisar.” 17  Kenca si e nina Jesus, “Adi bage, bereken man Kaisar kai si memang jadi bagin Kaisar, tapi man Dibata kai si memang jadi bagin Dibata.” Emaka jengang kalak e megi rananna. 18  Reh me kalak Saduki si la tek maka lit kekeken ndahi Jesus janah nungkun, 19  “O Guru, itulisken Musa man kami adi lit sekalak dilaki mate janah nadingken ndeharana tapi la lit anakna, senina si mate e arus ngempoi ndeharana e guna mereken kesusuren man seninana ndai. 20  Lit pitu kalak si ersenina. Sintua erjabu, paksa ia mate la lit kesusurenna. 21  Janah si peduaken ngempoi diberu e tapi mate ia alu la nadingken kesusuren, janah si peteluken pe bage ka. 22  Seh ngayak si pepituken la lit si nadingken kesusuren. Dungna diberu e pe mate. 23  I bas kekeken, ndehara ise nge ia pagi? Sebap pituna nggo pernah ngempoi ia.” 24  Ijawap Jesus, “La iangkai kena Kitap si Badia ntah pe kuasa Dibata, eme sebapna maka kena nggo salah. 25  Sebap sanga kalak e keke i bas si mate nari, dilaki ntah pe diberu la erjabu bage pe la ipejabuken, tapi kalak e bali bagi malekat si i surga. 26  Tapi kerna kalak mate ipekeke, lenga kin pernah ibaca kena i bas buku Musa, kerna kejadin rambah duri? Paksa si e nina Dibata man Musa, ‘Aku kap Dibata Abraham, Dibata Isak, ras Dibata Jakup.’ 27  Ia labo Dibata kalak mate tapi Dibata kalak si nggeluh. Tuhu-tuhu kel kena nggo salah.” 28  Sekalak i bas ahli Undang-Undang Musa nari reh janah ibegina kalak e sijawapen. Sanga itehna maka nggo ibereken Jesus jawapen si mehuli, nungkun ia, “Perentah si apai nge si pentingna i bas kerinana?” 29  Ngaloi Jesus, “Enda me si pentingna, ‘Begikenlah, o Israel, Jahwe kap Dibatanta, Jahwe si sada e ngenca Dibata, 30  janah arus ikelengindu Jahwe Dibatandu alu kerina kegeluhenndu,* pusuhndu, perukurenndu ras gegehndu.’ 31  Si peduaken, ‘Arus ikelengindu kalak si deban bagi kam ngkelengi dirindu.’ La lit perentah si deban si belinen asangken enda.” 32  Nina ahli Undang-Undang e, “O Guru, payo si ikatakenndu, sentudu ras kebenaren, ‘Dibata e sada, janah la lit Dibata si deban selain Ia.’ 33  Janah, ngkelengi Ia alu kerina gegeh, pusuh, ras perukuren, bage pe ngkelengi kalak si deban bagi diri sendiri, e ndauh pentingen asangken kerina persembahen tutungen ras korban.” 34  Erkiteken idah Jesus ijawapna alu pentar, nina man bana, “Kam la ndauh i bas Kerajan Dibata nari.” Kenca si e, ise pe lanai pang nungkun man bana. 35  Tapi, sanga iterusken Jesus ngajar i rumah pertoton, nungkun ia, “Engkai maka ikataken ahli-ahli Undang-Undang Musa maka Kristus e anak Daud? 36  Alu kesah si badia, Daud sendiri ngataken, ‘Nina Jahwe man Tuanku, “Kundullah arah kananKu seh asa Kutamaken musuh-musuhndu i teruh nahendu.”’ 37  Daud sendiri nggelari ia Tuan, uga maka ia anakna?” Meriah ukur jelma si nterem megiken ia. 38  Janah sanga ia ngajar nina, “Hati-hatilah nandangi ahli-ahli Undang-Undang Musa si meriah akapna erdalan ku jah ku je make jubah janah iperkuanken atena alu mehamat i bas ingan si nterem jelma.* 39  Janah merhat ia kundul arah lebe* i bas ingan pulung kalak Jahudi* bage pe ingan si mehamat i pesta-pesta. 40  Irampokna rumah* diberu-diberu si mbalu, janah gedang banna totona gelah idah kalak.* Ialoken kalak enda pagi ukumen si terkeleken.”* 41  Kenca si e, kundul Jesus ngala ku kotak-kotak* persembahen janah mulai iperdiatekenna jelma si nterem namaken senna ku bas kotak e. Enterem kalak bayak namaken melala sen logam. 42  Reh me sekalak diberu mbalu si musil* janah itamakenna dua sen logam* si kitikna kel ergana. 43  Emaka ilebuhna murid-muridna janah nina, “Situhuna, buen nge si itamaken diberu mbalu si musil* enda asangken sen si itamaken kerina kalak ku bas kotak persembahen. 44  Sebap kerina kalak e mere arah kelebihen ertana, tapi diberu e, aminna gia musil,* itamana kerina si lit i bas ia, kerina si lit i bas geluhna.”

Cataten kaki

Ntah “anding-andingen.”
Ntah “anding-andingen.”
Cakap Junani, dinar. Eme sen logam pirak kalak Roma.
I bas bahasa Junani, psykhe. Nen Kamus.
Ntah “i bas pajak.”
Ntah “ingan si mehulina.”
As. “sinagoga.” Nen Kamus.
Ntah “erta.”
Ntah “nutupi kejahatenna.”
Ntah “terberaten.”
Ntah “ingan.”
Ntah “mesera.”
As. “dua lepton, eme sada kuadran.”
Ntah “mesera.”
Ntah “mesera.”