Markus 11:1-33

  • Jesus ialo-alo alu meriah sanga masuk ku Jerusalem (1-11)

  • Batang ara isumpahi (12-14)

  • Ibersihken Jesus rumah pertoton (15-18)

  • Pelajaren arah batang ara si kerah (19-26)

  • Kuasa Jesus ilawan (27-33)

11  Sanga nggo ndeher kalak e ku Jerusalem, seh me kalak e i Betpage ras Betani i Deleng Saitun, isuruh Jesus dua muridna,  nina, “Laweslah ku kuta si arah lebe ah. Kenca masuk kena ku je, idapeti kena kari sada anak kelede si itambat si lenga pernah inangkihi kalak. Pulahilah janah baba ku jenda.  Adi lit kari si nungkun, ‘Engkai maka bage ban kena?’ katakenlah, ‘Perlu Tuan, mis kari iulihkenna ku jenda.’”  Emaka lawes me kalak e janah idapeti kalak e anak kelede tertambat i lebe pintu rumah si lit i tepi dalan, jenari ipulahina me.  Tapi piga-piga kalak si cinder i je nungkun, “Engkai maka ipulahi kena anak kelede e?”  Ijawap kalak e bagi si nggo ikataken Jesus, emaka ipediatna murid-murid lawes.  Ibaba me anak kelede ndai man Jesus, janah itama kalak e uisna si arah darat ku datas kelede e, kenca si e inangkihi Jesus.  Enterem ka kalak ngkimbangken uisna i dalan, si debanna motong dahan batang kayu i bas juma nari.  Kalak si erdalan arah lebe ras si arah pudi terus ersurak, “Tolong selamatkenlah! Ipasu-pasu me ia si reh i bas gelar Jahwe! 10  Ipasu-pasu me Kerajan bapakta Daud si nandangi reh! O Dibata si lit i bas ingan si meganjangna, tolong selamatkenlah!” 11  Kenca si e, masuk ia ku Jerusalem, jenari masuk ku rumah pertoton, itatapna kerina si lit i sekelilingna. Tapi erkiteken nggo ben, lawes ia ku Betani ras 12 rasulna. 12  Pepagina, sanga lawes kalak e Betani nari, melihe Jesus. 13  Dauh nari idahna sada batang ara si mbue bulungna. Ideherina guna ngenen lit nge buahna ntah lang. Tapi seh kenca ia i je, kai pe la lit idatna selain bulungna ngenca, sebap la kin musimna buah ara. 14  Emaka nina man batang ara e, “Asa ndigan pe lanai lit kalak si man buahndu.” Murid-muridna pe megi kerna si e. 15  Seh me kalak e i Jerusalem. Masuk ia ku rumah pertoton janah mulai ipelawesna kalak si erbinaga ras si nukur i je. Itunggalingkenna meja-meja kalak si nukari sen bage pe kursi-kursi kalak si erbinaga merpati. 16  Janah la ipediatna ise pe motong dalan arah rumah pertoton sanga maba barang. 17  Iajarina kalak e janah nina, “La kin lit tertulis, ‘RumahKu pagi igelari rumah pertoton man kerina bangsa’? Tapi iban kena jadi gua perampok.” 18  Ibegi imam-imam kepala ras ahli Undang-Undang Musa kerna si e, emaka mulai idaramina cara guna munuh ia. Mbiar kalak e man bana erkiteken kerina jelma si nterem jengang nandangi pengajarenna. 19  Kenca nggo ben, lawes Jesus ras murid-muridna bas kota e nari. 20  Tapi paksa kalak e lewat erpagi-pagi si lampas, idah kalak e batang ara ndai nggo kerah seh ku uratna. 21  Inget Petrus kerna batang e, nina man Jesus, “O Guru,* nenlah! Batang ara si isumpahindu e nggo kerah.” 22  Nina Jesus man kalak e, “Erkinitekenlah man Dibata. 23  Situhuna, ise pe si ngataken man deleng enda, ‘Angkatlah bandu jenari benterken bandu ku lawit,’ janah la ia ragu i bas pusuhna ras erkiniteken maka kai si ikatakenna banci terjadi, e pasti terjadi. 24  Enda me sebapna kukataken man kena, kerina si itotoken kena ras si ipindoken kena, erkinitekenlah maka e nggo ialoken kena janah pasti ialoken kena. 25  Sanga cinder kena ertoto, ampunilah kesalahen kai pe si iban kalak man kena, gelah Bapak kena si i surga pe iampuniNa kesalahen kena.” 26  *—— 27  Mulihi ka kalak e ku Jerusalem. Sanga Jesus erdalan i rumah pertoton, reh me imam-imam kepala, ahli Undang-Undang Musa ras peminpin-peminpin, 28  janah nina, “Ja nari datndu kuasa ngelakoken kerina enda? Ise si mereken kuasa e man bandu?” 29  Ngaloi Jesus, “Aku pe lit sada penungkunenku man kena. Jawap dage aku gelah kujawap ka kari i ja nari kudat kuasa ngelakoken enda kerina. 30  Peridin Johanes e, i bas surga nari nge ntah i bas manusia nari? Jawap dage.” 31  Kalak e pe mulai ngerana sapih-sapih ia, nina, “Adi sikataken, ‘Surga nari,’ ikatakenna ka kari, ‘Engkai kena la tek man bana?’ 32  Tapi pang nge kita ngatakenca, ‘I bas manusia nari’?” Mbiar kalak e man jelma si nterem, sebap kerina kalak tek maka Johanes tuhu-tuhu sekalak nabi. 33  Emaka nina kalak e man Jesus, “La iteh kami.” Ijawap Jesus ka, “Aku pe la kukataken man kena ja nari kudat kuasa ngelakoken enda kerina.”

Cataten kaki

As. “Rabbi.”
Ayat enda la lit i bas piga-piga tulisen si nai janah kemungkinen labo bagin arah Pustaka si Badia.