Markus 1:1-45

  • Johanes Peridiken erberita (1-8)

  • Jesus iperidiken (9-11)

  • Jesus icubai Setan (12, 13)

  • Jesus mulai erberita i Galilea (14, 15)

  • Ilebuh Jesus murid-murid si pertama (16-20)

  • Malekat jahat ipelawes (21-28)

  • Enterem kalak ipepalem Jesus i Kapernaum (29-34)

  • Ertoto i bas ingan si melungen (35-39)

  • Kalak kusta ipepalem (40-45)

1  Enda me tangtangna berita si meriah kerna Jesus Kristus, Anak Dibata:  Bagi si itulisken Nabi Jesaya, “(Nenlah! Kusuruh persuruhenKu leben asangken kam, ia pagi si nikapken dalan man bandu.)  Lit si erlebuh i taneh mesawang* nari, ‘Sikapkenlah dalan man Jahwe! Pepinterlah dalan-dalanNa.’”  Johanes Peridiken lit i bas taneh mesawang,* iberitakenna kerna peridin si jadi tanda maka kalak nggo ertobat* guna pengampunen dosa.  Emaka kerina penduduk Jerusalem ras kerina daerah Judea reh ndahi ia, emaka iperidikenna* kalak e i Lau Jordan, janah iakukenna dosa-dosana alu terus terang.  Paken Johanes iban i bas mbulu unta nari janah ikat pinggangna i bas kulit nari. Panganna eme labang ras madu kerangen.  Janah iberitakenna, “Kenca aku, reh me sekalak si belinen kuasana asangken aku, mungkuk guna mbuka nali selopna pe la aku cocok.*  Kuperidiken kena alu lau, tapi ia mperidiken kena kari alu kesah si badia.”  Paksa si e, Jesus reh arah Nasaret i Galilea nari janah iperidiken Johanes ia i bas Lau Jordan. 10  Ndarat kenca bas lau nari, mis idah Jesus terbuka langit, janah nusur kesah si badia ku datasna bagi merpati. 11  Terbegi me sora i langit nari, “Kam me AnakKu, si Kukelengi. Kam me si ngena ateKu.” 12  Minter ibabai Dibata ia alu kesah si badia ku taneh mesawang.* 13  Terus ia i taneh mesawang* 40 wari dekahna, i je icubai Setan ia. Ia tading ras binatang si meliar, tapi malekat-malekat ngelayani ia. 14  Kenca Johanes itangkap, lawes Jesus ku Galilea, iberitakenna berita si meriah i bas Dibata nari, 15  janah nina, “Enggo seh me waktu si itetapken, janah Kerajan Dibata nggo ndeher. Ertobatlah,* erkinitekenlah man berita si meriah.” 16  Sanga erdalan ia i tepi Lawit Galilea, idahna Simon ras seninana Andreas paksana ngamburken jalana ku lawit, erkiteken kalak e nelayan. 17  Emaka nina Jesus bana, “Mari ikutken aku, kuban kena kari jadi si njala manusia.” 18  Mis itadingken kalak e jalana janah ikutkenna ia. 19  Kenca erdalan sitik terdauhen, idahna Jakup anak Sebedeus ras seninana Johanes, kalak e paksana mpesikap jalana i bas perahu. 20  Janah mis ilebuhna kalak e. Emaka itadingken kalak e bapakna eme Sebedeus si lit i bas perahu ras sierdahinna. Kenca si e ikutken kalak e Jesus. 21  Jenari lawes kalak e ku Kapernaum. Sanga wari Sabat, lawes ia ku ingan pulung kalak Jahudi* janah mulai ngajar. 22  Jengang kalak e nandangi carana ngajar, sebap ia ngajar selaku kalak si lit kuasana, labo bagi ahli-ahli Undang-Undang Musa. 23  I bas ingan pulung kalak Jahudi* e lit kalak si irasuki malekat jahat, janah serko ia, 24  “O Jesus kalak Nasaret, kai urusenndu ras kami? Ikernepkenndu kin atendu kami? Kuteh nge ise kam situhuna, Si Badia i bas Dibata nari!” 25  Tapi isergang Jesus ia, nina, “Sinikken, ndaratlah i bas ia nari!” 26  Kenca iban malekat jahat e daging kalak ndai kejang-kejang janah ibanna ka ia serko, ndarat me ia i bas kalak e nari. 27  Mamang kel ate jelma si nterem janah mulai icakapkenna, nina, “Kai kin enda? Pengajaren si mbaru! Lit kuasana mpelawes malekat-malekat jahat janah patuh ka malekat jahat e bana.” 28  Emaka berita kerna ia mis terberita ku japa pe i bas kerina daerah Galilea. 29  Ndarat kalak e i bas ingan pulung kalak Jahudi* e nari ras Jakup bage pe Johanes. Jenari lawes kalak e ku rumah Simon ras Andreas. 30  Mami Simon paksana ampar erkiteken demam, janah mis ikataken kalak e man Jesus kerna ia. 31  Emaka ijumpai Jesus ia, ijemakna tanna guna nampati ia tedis. Lanai ia demam, jenari isikapkenna pangan man kalak e. 32  Sanga berngi wari, kenca ndabuh* matawari, mulai ibaba kalak man Jesus kerina si sakit ras si irasuki malekat jahat. 33  Janah kerina penduduk kota pulung pas i lebe-lebe pintu. 34  Emaka ipepalemna nterem kalak si erbage-bage pinakitna, janah ipelawesna melala malekat jahat, tapi la ipediatna malekat-malekat jahat e ngerana, sebap iteh malekat jahat e ia Kristus. 35  Pagi-pagi si lampas sanga gelap denga, medak ia janah lawes ku darat ku ingan si melungen, mulai me ia ertoto i je. 36  Tapi Simon ras murid-murid si deban ndarami ia, 37  kenca jumpa, nina, “Kerina kalak ndarami kam.” 38  Tapi ngaloi ia, “Eta kita lawes ku ingan si deban, ku kota-kota si ndeher jenda nari, gelah banci ka aku erberita i je, sebap erkiteken si e me aku reh.” 39  Emaka lawes me ia erberita i bas ingan-ingan pulung kalak Jahudi* i kerina daerah Galilea janah ipelawesna malekat-malekat jahat. 40  I je reh ka sekalak si sakit kusta ndahi Jesus, erjimpuh ia janah mindo kel man bana, “Adi nggit kam, banci ipepalemndu aku.” 41  Erkiteken mekuah atena, idudurkenna tanna janah ijemakna ia, nina, “Nggit nge aku! Malemlah kam.” 42  Minter bene kustana e janah malem me ia. 43  Kenca si e, isuruh Jesus ia lawes janah alu tegas iperentahkenna ia, 44  nina, “Ula kataken man ise pe, tapi laweslah cidahken dirindu man imam. Janah berelah persembahenndu bagi si isuruh Musa, gelah jadi bukti maka kam nggo malem.” 45  Tapi kenca lawes, mulai iceritaken dilaki e kerna si e janah iceritakenna ku japa pe, emaka lanai banci Jesus terang-terangen masuk ku sada kota, tapi tading ia i darat kota i bas ingan si melungen. Tapi i ja nari pe tetap kalak rehen bana.

Cataten kaki

Taneh si mbelang si jarang iingani.
Taneh si mbelang si jarang iingani.
Ntah “jera dingen robah.”
Nen Kamus.
Ntah “metunggung.”
Taneh si mbelang si jarang iingani.
Taneh si mbelang si jarang iingani.
Ntah “Jera dingen robahlah.”
As. “sinagoga.” Nen Kamus.
As. “sinagoga.” Nen Kamus.
As. “sinagoga.” Nen Kamus.
Ntah “terbenam.”
As. “sinagoga.” Nen Kamus.