Lukas 9:1-62

  • Ibere petunjuk man 12 rasul kerna pelayanen (1-6)

  • Mamang ate Herodes perban Jesus (7-9)

  • Ibere Jesus 5.000 kalak man (10-17)

  • Iakui Petrus maka Jesus e Kristus (18-20)

  • Kematen Jesus inubuatken (21, 22)

  • Murid situhu-tuhu (23-27)

  • Salih rupa Jesus (28-36)

  • Anak si kerasuken ipepalem (37-43a)

  • Kematen Jesus inubuatken ka (43b-45)

  • Murid-murid Jesus sijawapen kerna ise si mbelinna (46-48)

  • Kalak si la ngelawan kita ras kita nge (49, 50)

  • Jesus la ialoken anak kuta Samaria (51-56)

  • Cara ngikutken Jesus (57-62)

9  Kenca si e, ilebuh Jesus 12 rasul, jenari iberekenna gegeh ras kuasa man kalak e guna mpelawes kerina malekat jahat bage pe mpepalem pinakit.  Isuruhna kalak e mberitaken Kerajan Dibata ras mpepalem kalak sakit,  nina, “Ula baba kai pe bas perdalanen, ntah e tongkat, ingan pangan, roti, sen,* ras baju ganti.*  Tapi ku rumah ise pe kena masuk, tadinglah i je ngayak kena lawes je nari.  Janah i japa pe kari kena adi la ialoken, paksa kena lawes arah kota e, kisamken abu si lit bas nahe kena gelah jadi kesaksin man kalak e.”  Jenari berkat me kalak e, lawes ia ku kerina kuta si lit bas daerah e guna mberitaken berita si meriah ras mpepalem kalak.  Herodes* penguasa daerah e megi kerina si terjadi, mamang kel atena erkiteken piga-piga ngataken adi Johanes nggo ipekeke i bas si mate nari.  Tapi si deban ngataken adi Elia nggo reh, janah si debanna ka ngataken maka sekalak i bas nabi-nabi si nai nggo keke.  Nina Herodes, “Johanes nggo kupotong kerahungna. Adi bage, ise dage dilaki e si melala kubegi kerna ia?” Emaka iusahakenna ngenen ia. 10  Sanga rasul-rasul mulih, iceritaken kalak e man Jesus kerina si nggo ilakokenna. Erkiteken si e, ibaba Jesus kalak e nerapken bana ku kota si igelari Betsaida. 11  Tapi sanga iteh jelma si nterem, ikutken kalak e Jesus. Ialo-alo Jesus kalak e alu mehuli janah iceritakenna kerna Kerajan Dibata ras ipepalemna kerina si perlu ipepalem. 12  Sanga wari nandangi ben, idahi 12 rasul e Jesus, nina, “Suruhlah jelma si nterem e lawes ku kuta-kuta si ndeher jenda nari guna ndarami ingan erberngi ras pangan, sebap i jenda melungen kel.” 13  Tapi nina Jesus, “Kena saja si mere kalak e man.” Ngaloi kalak e, “Kai pe la lit bas kami selain lima roti ras dua ikan ngenca, pala lawes kami lebe nukur pangan man kerina kalak enda.” 14  I je lit kira-kira 5.000 dilaki. Tapi nina Jesus man murid-muridna, “Suruhlah kalak enda kundul erkelompok-kelompok, kira-kira 50 sada kelompok.” 15  Isuruh murid-murid me kerinana kundul. 16  Ibuat Jesus lima roti ras dua ikan e, jenari itatapna ku langit janah ertoto ia. Kenca si e, icepik-cepikkenna roti e janah mulai iberekenna man murid-murid gelah ibagiken man jelma si nterem. 17  Emaka kerina kalak e man ngayak besur, janah ipepulung kalak e sisana lit 12 keranjang. 18  I bas pudi wari, sanga Jesus ertoto sisada, reh me murid-muridna. Nungkun ia man kalak e, “Menurut jelma si nterem, ise kin aku?” 19  Ngaloi kalak e, “Johanes Peridiken, deba ngatakenca Elia, janah lit ka si ngatakenca salah sada arah nabi si nai si nggo nggeluh mulihi.” 20  Kenca si e nina man kalak e, “Adi menurut kena, ise kin aku?” Ngaloi Petrus, “Kristus i bas Dibata nari.” 21  Jenari, alu tegas ilarangna kalak e gelah ula ngataken man ise pe kerna si e, 22  tapi nina, “Anak manusia arus ngenanami melala kiniseran janah itulak peminpin-peminpin ras imam-imam kepala bage pe ahli Undang-Undang Musa. Jenari ibunuh, kenca si e ipekeke i bas wari si peteluken.” 23  Nina ka man kalak e kerina, “Ise atena ngikutken aku, lanai ia banci nggeluh man dirina sendiri janah tiap wari arus iangkatna tiang siksanna* ras terus ikutkenna aku. 24  Sebap ise pe si atena nelamatken kesahna* kebenen kesahna nge pagi, tapi ise pe si kebenen kesahna erkiteken aku iselamatken nge pagi. 25  Situhuna, kai kin gunana adi sekalak jelma ndatken kerina si lit bas doni enda tapi kebenen kesahna ntah pe kernep? 26  Sebap ise pe si mela nandangi aku ras kata-kataku, Anak manusia pe mela ka nge pagi nandangi ia sanga reh Anak manusia e i bas kemulianna, kemulian Bapana, ras malekat-malekat si badia. 27  Situhuna kukataken man bandu, lit piga-piga kalak si tedis i jenda si la pagi ngenanami kematen sope idahna lebe Kerajan Dibata.” 28  Kira-kira waluh wari kenca ibelaskenna kata-kata enda, ibabana Petrus, Johanes, ras Jakup nangkih deleng guna ertoto. 29  Sanga ia ertoto, salih me rupana janah uisna jadi mbentar ersinar. 30  Rempet lit dua kalak si ercakap-cakap ras Jesus, eme Musa ras Elia. 31  Kalak e reh alu kemulian janah mulai ngerana-ngerana kerna uga Jesus lawes, si nandangi terjadi kari i Jerusalem. 32  Paksa si e, Petrus ras teman-temanna sangana medem. Tapi sanga kalak e medak, idahna kemulian Jesus bage pe dua kalak dilaki cinder ras ia. 33  Sanga si dua kalak ndai nandangi lawes, ngerana Petrus man Jesus, “O Guru, meriah iakap kami i jenda. Emaka pediat kami erban telu kemah: sada man bandu, sada man Musa, janah sada nari man Elia.” La isadarina kai si ikatakenna e. 34  Sanga ia ngerana, reh me embun nutupi kalak e, dungna mbiar kalak e. 35  Jenari terbegi sora arah embun e, nina, “Enda me AnakKu, ia me si nggo Kupilih. Begikenlah ia.” 36  Sanga terbegi sora e, sisada nari ngenca Jesus idah kalak e. Piga-piga waktu dekahna tetap kalak e sinik janah la ikatakenna man ise pe kerna kai si nggo idahna. 37  Pepagina, sanga kalak e nusur i bas deleng nari, nterem kel jelma njumpai Jesus. 38  Sekalak dilaki i bas jelma si nterem e nari serko, “O Guru, mindo kel aku, nen min sitik anakku si dilaki, sebap ia ngenca anakku. 39  Irasuki malekat jahat ia, rempet-rempet ia serko, ibanna dagingna kejang-kejang janah rugup ka babahna. Mesui kel atena janah malekat jahat e la nggit ndarat i bas anakku e nari. 40  Enggo kupindoken man murid-muridndu mpelawessa, tapi la kalak e ngasup.” 41  Ngaloi Jesus, “O kena kalak si la erkiniteken ras jahat, asa kai nari dekahna aku arus terus ras kena janah sabar nandangi kena? Baba anakndu ku jenda.” 42  Tapi aminna pe nggo ideheri anak e Jesus, ientamken malekat jahat e ia ku taneh janah kejang-kejang ibanna dagingna. Emaka isergang Jesus malekat jahat e janah ipepalemna anak e, jenari iberekenna man bapana. 43  Jengang kel kalak e kerina ngidah kuasa Dibata si luar biasa. Sanga kalak e jengang denga nandangi kerina si ilakoken Jesus, nina man murid-muridna, 44  “Begiken alu megermet janah ingetlah kata-kata enda: Anak manusia ihianati pagi bas tan musuhna.” 45  Tapi la iangkai kalak e kai si icakapken Jesus. Situhuna, e ibuniken i bas kalak e nari gelah la iangkaina, tapi mbiar kalak e nungkun man Jesus kerna kai si icakapkenna ndai. 46  Kenca si e, erjengil me kalak e kerna ise si mbelinna i bas kalak e. 47  Iteh Jesus kai si lit i bas pusuh kalak e, emaka ilebuhna sekalak anak-anak, ipecinderna i sampingna, 48  janah nina, “Ise pe si ngaloken anak-anak enda i bas gelarku, ialokenna ka nge aku. Janah ise pe si ngaloken aku ialokenna ka Ia si nuruh aku. Sebap ise si perbahanenna selaku kalak si kitikna i bas kena kerina, ia me si mbelinna.” 49  Ngaloi Johanes, “O Guru, lit idah kami sekalak jelma mpelawes malekat jahat alu make gelarndu, emaka icubaken kami ngambati ia erkiteken la ia ikut ras kita.” 50  Tapi nina Jesus, “Ula cubaken kena ngambati ia, sebap ise pe si la ngelawan kena, ras kena nge.” 51  Sanga nggo reh deherna waktuna Jesus iangkat, itetapkenna ukurna guna lawes ku Jerusalem. 52  Emaka isuruh Jesus piga-piga persuruhen ngelebei ia. Lawes me kalak e janah masuk ku kuta kalak Samaria guna erban persikapen man bana. 53  Tapi la ialoken anak kuta e Jesus, erkiteken nggo itetapken Jesus ukurna lawes ku Jerusalem. 54  Sanga murid-muridna, Jakup ras Johanes, ngidah si enda, nina, “O Tuan, setuju nge kam adi isuruh kami api nusur arah langit nari guna ngkernepken kalak enda?” 55  Tapi itulihken Jesus kalak e janah ipersingetina. 56  Emaka lawes Jesus ras murid-muridna ku kuta si deban. 57  Sanga kalak e bas perdalanen, lit si ngataken bana, “Ikut ateku ras kam ku japa pe kam lawes.” 58  Tapi nina Jesus, “Biang kerangen lit liang inganna, perik-perik lit asarna, tapi Anak manusia la lit inganna ngamparken takalna.” 59  Kenca si e, nina man si deban, “Jadilah pengikutku.” Ngaloi kalak e, “O Tuan, pediat min aku lebe ngkuburken bapakku.” 60  Tapi nina Jesus bana, “Pediatlah kalak mate ngkuburken kalak mate, tapi kam laweslah janah beritakenlah Kerajan Dibata ku japa pe.” 61  Nina si deban ka, “Kuikutken ateku kam Tuan, tapi pediatlah ngata aku lebe man keluargaku.” 62  Nina Jesus bana, “Kalak si nggo njemak tenggala janah ngenen ku pudi, la cocok man Kerajan Dibata.”

Cataten kaki

As. “pirak.”
As. “dua baju.”
Maksudna, Herodes Antipas. Nen Kamus.
Nen Kamus.
Ntah “kegeluhenna.”