Lukas 24:1-53

  • Jesus ipekeke (1-12)

  • I bas perdalanen nuju ku Emaus (13-35)

  • Jesus njumpai murid-muridna (36-49)

  • Jesus terangkat ku surga (50-53)

24  Pagi-pagi si lampas i bas wari pertama minggu e, lawes kalak e ku kuburen maba rempah-rempah si nggo isikapkenna.  Tapi idapetina batu si nutupi kuburen e nggo igulingken.  Janah sanga kalak e masuk, lanai lit mayat Tuan Jesus i je.  Sanga kalak e kemamangen, rempet lit dua dilaki si uisna ersinar tedis i deher kalak e.  Mbiar kel diberu-diberu e janah terus kalak e nungkuk, emaka ngerana dua kalak dilaki ndai nina, “Engkai maka idarami kena kalak si nggeluh i tengah-tengah kalak mate?  La ia i jenda, tapi nggo ipekeke. Ingetlah kai si ikatakenna sanga ia i Galilea denga,  maka Anak manusia arus iserahken ku tan kalak perdosa janah ibunuh i bas tiang* jenari keke i bas wari si peteluken.”  Inget kalak e me kata-katana e.  Emaka mulih kalak e i kuburen nari janah iceritakenna kerina si terjadi man 11 rasul bage pe man kerina muridna. 10  Si ngatakenca man rasul-rasul e eme Maria Magdalena, Johana, Maria nande Jakup, ras diberu-diberu si deban si ikut ras kalak e. 11  Tapi rasul-rasul ras kerina murid si deban la tek nandangi kai si ikataken diberu-diberu e perban la iakapna masuk akal. 12  Tapi mis kiam Petrus ku kuburen, janah sanga itungkirna ku bas, uis linen ngenca idahna i je. Emaka lawes ia janah tersungkun-sungkun i bas pusuhna kai si nggo terjadi. 13  I bas wari e, lit dua kalak murid si sangana lawes ku kuta Emaus, dauhna kira-kira 11 kilometer arah Jerusalem nari. 14  Kalak e paksana ercakap-cakap kerna kerina si nggo terjadi. 15  Sanga icakapken kalak e kerna si e, reh me Jesus ndeheri kalak e janah erdalan ia ras. 16  Idah si dua kalak e nge Jesus, tapi la itandaina. 17  Nina Jesus man kalak e, “Kai nge si sangana icakapken kena e?” Ngadi me kalak e janah teridah erceda ate. 18  Sekalak i bas kalak e gelarna Keleopas, ialoina Jesus nina, “Kalak pertandang nge kam i bas Jerusalem enda maka la itehndu kai si terjadi pudi wari enda?” 19  Nungkun Jesus, “Kai kin?” Ngaloi kalak e, “Kerna Jesus kalak Nasaret. Ia sekalak nabi janah erkuasa i bas kata ras perbahanen i lebe-lebe Dibata bage pe kerina kalak. 20  Imam-imam kepala ras penguasa-penguasa kami nerahken ia guna iukum mate janah ipakuken i bas tiang.* 21  Padahal iarapken kami maka ia me si mbebasken Israel. Sendah me wari si peteluken kenca kerina e terjadi. 22  Lit ka piga-piga diberu teman kami si erbanca kami sengget. Ndai pagi-pagi si lampas, lawes kalak e ku kuburen, 23  tapi la idapetina mayat Jesus. Iceritakenna ka maka idahna malekat-malekat si ngataken Jesus nggo nggeluh. 24  Erkiteken si e, piga-piga i bas kami nari lawes ku kuburen janah idapeti kalak e tuhu bagi si ikataken diberu-diberu ndai, lanai idahna Jesus.” 25  Jenari nina Jesus man si dua kalak e, “O Bodoh, mesera kel kena tek nandangi kai si ikataken nabi-nabi! 26  La kin arus inanami Kristus kiniseran gelah ia imuliaken?” 27  Jenari mulai iceritakenna kerina kerna dirina si itulis i bas Kitap si Badia, mulai tulisen Musa ras kerina Ajaren Nabi-Nabi. 28  Kenca seh kalak e i kuta si man dahinna, Jesus tempa-tempa nerusken perdalanenna. 29  Tapi mindo kel kalak e bana, nina, “I jendalah kita, sebap wari nggo ben janah nandangi gelap.” Emaka tading me ia ras kalak e. 30  Sanga ia man ras kalak e, ibuatna roti, itotokenna, icepik-cepikkenna, janah ibagikenna man kalak e. 31  Sadar me kalak e janah itandaina Jesus. Tapi rempet lanai idah kalak e Jesus. 32  Nina si dua kalak e sapih-sapih ia, “Balosam malem kel ateta ngerana ras ia bas dalan ndai paksa ijelaskenna Kitap si Badia man banta!” 33  Emaka minter kalak e mulih ku Jerusalem, janah idapetina 11 rasul ras murid-murid si deban pulung i je, 34  si ngataken, “Tuhu-tuhu Tuan nggo ipekeke janah icidahkenna bana man Simon!” 35  Jenari iceritaken si dua kalak ndai kerna kai si terjadi bas dalan janah uga kalak e nandai Jesus paksa icepik-cepikkenna roti. 36  Sanga icakapken kalak e kerna si e, rempet lit Jesus cinder i tengah-tengah kalak e janah nina, “Mbera lit kedamen i bas kena.” 37  Tapi perban kalak e sengget janah mbiar, iakap kalak e si idahna begu. 38  Emaka nina man kalak e, “Engkai maka kena mbiar? Engkai maka kena ragu? 39  Enda aku, nenlah tan ras naheku. Dadap aku janah nen, begu la lit daging ras tulanna, tapi aku lit daging ras tulanku bagi si idah kena.” 40  Sanga ia ngerana, icidahkenna tanna ras nahena man kalak e. 41  Tapi lenga kalak e tek perban riahna akapna janah mamang denga atena. Emaka nungkun Jesus, “Lit pangan kena?” 42  Ibereken kalak e sada potong ikan si nggo ipanggang. 43  Ibuat Jesus janah ipanna i lebe-lebe kalak e. 44  Jenari nina Jesus man kalak e, “Sanga aku ras kena denga pernah kukataken maka kerina si tertulis i bas Undang-Undang Musa, Ajaren Nabi-Nabi, ras Masmur arus terjadi.” 45  Emaka ibukana perukuren kalak e gelah tuhu-tuhu ngangkai erti Kitap si Badia. 46  Nina ka, “Lit tertulis maka inanami Kristus pagi kiniseran janah ipekeke i bas si mate nari i bas wari si peteluken, 47  janah i bas gelarna berita kerna pertobaten* guna pengampunen dosa, iberitaken pagi man kerina bangsa mulai Jerusalem nari. 48  Kena me si jadi saksi i bas kerina enda. 49  Kubereken kari man kena kai si nggo ijanjiken Bapakku. Tapi arus itimai kena i bas kota enda seh asa ialoken kena kuasa arah surga nari.” 50  Jenari ibabai Jesus kalak e ku Betani. I je iangkatna tanna janah ipasu-pasuna kalak e. 51  Sanga ipasu-pasuna kalak e, terangkat ia ku surga janah itadingkenna kalak e. 52  Erjimpuh kalak e man bana janah mulih ku Jerusalem alu dem keriahen ukur. 53  Gedang-gedang wari ipuji kalak e Dibata i bas rumah pertoton.

Cataten kaki

Ntah “kayu.”
Ntah “kayu.”
Ntah “jera dingen robah.”