Lukas 19:1-48

  • Jesus ndahi Sakeus (1-10)

  • Perumpaman kerna sepuluh mina (11-27)

  • Jesus ialo-alo alu ermeriah ukur sanga masuk ku Jerusalem (28-40)

  • Ingandungi Jesus Jerusalem (41-44)

  • Ibersihken Jesus rumah pertoton (45-48)

19  Jenari masuk Jesus ku Jeriho, ibentasina kota e.  I je lit sekalak dilaki si bayak gelarna Sakeus, ia kepala pengalo cuke.  Iusahakenna ngenen ise kin Jesus e, tapi la banci erkiteken ia gendek janah nterem ka jelma.  Emaka kiam ia ngelebei kalak e janah inangkihina batang ara* guna ngidah Jesus, sebap arah e kari Jesus lewat.  Sanga seh Jesus i je, itatapna ku datas, janah nina, “O Sakeus, pedasken nusur, sebap arus aku tading i rumahndu gundari.”  Emaka mis ia nusur janah meriah kel ukurna ngalo-ngalo Jesus i rumahna.  Tapi jungut-jungut kalak si nterem ngidahsa, nina, “Tading atena i rumah kalak perdosa.”  Cinder Sakeus, janah nina man Tuan, “O Tuan, setengah arah ertaku kubereken kari man kalak mesera janah kai pe si nggo kukompas* i bas kalak nari kuulihken kari empat kali lipat.”  Emaka nina Jesus bana, “I bas wari enda reh me keselamaten ku rumah enda, perban ia pe kesusuren Abraham kap. 10  Sebap Anak manusia reh guna ndarami ras nelamatken kalak si papak.” 11  Sanga murid-murid megiken si enda, iceritaken Jesus perumpaman* si deban, sebap nggo ndeher ia ku Jerusalem. Kalak e erpengakap Kerajan Dibata mis reh* seh kenca Jesus i je. 12  Emaka nina, “Sekalak bangsawan lawes ku negri si ndauh guna ndatken kuasa selaku raja, kenca si e mulih me ia. 13  Sope ia berkat, idilona sepuluh budakna, iberena kalak e sepuluh mina* janah nina, ‘Pakelah sen enda erban usaha ngayak aku mulih.’ 14  Tapi segat ate penduduk negri e ia janah ikirim kalak e sada kelompok utusen guna ngataken man bana, ‘La ate kami dilaki enda jadi raja kami.’ 15  “Kenca ia jadi raja, mulih me ia. Ilebuhna budak-budakna si nggo iberena sen* gelah itehna asa kai asil usaha kalak e. 16  Reh me budak si pertama janah nina, ‘O Tuan, nggo kudat untungna sepuluh mina arah sada mina si iberekenndu.’ 17  Nina man budakna e, ‘Merandal. Kam budak si mehuli! Erkiteken setia kam i bas si kitikna, kubereken ikuasaindu sepuluh kota.’ 18  Kenca si e, reh budak si peduaken, nina, ‘O Tuan, nggo kudat untungna lima mina arah sada mina si iberekenndu.’ 19  Nina ka man budak enda, ‘Kam pe kuasaindulah lima kota.’ 20  Tapi reh me budak si deban, nina, ‘O Tuan, enda minandu mbarenda, kubuniken i bas uis. 21  Bagenda, mbiar aku bandu, sebap kam kalak jahat. Ibuatndu kai si labo itabungndu janah iperanindu kai si la isuanndu.’ 22  Nina man budak e, ‘O Budak si jahat! Kuhakimi kam alu kata-katandu ena. Itehndu aku kalak jahat, kubuat kai si la kutabung janah kuperani kai si la kusuan. 23  Adi bage, ngkai maka la itamandu senku bas bank? Gelah kenca aku mulih, banci kubuat sen e ras bungana.’ 24  “Jenari nina man kalak si cinder i je, ‘Buat sen mina si lit bas ia, bereken man budak si sepuluh sen minana.’ 25  Tapi nina kalak e bana, ‘O Tuan, nggo sepuluh kap minana!’ 26  Nina ngaloi, ‘Kalak si lit bas ia ibereken terbuen, tapi man kalak si la lit bas ia, si lit i bas ia e pe ibuat i bas ia nari. 27  Gundari, baba musuh-musuhku ku jenda, si la atena aku jadi rajana, janah bunuh kalak e i lebe-lebeku.’” 28  Kenca iceritaken Jesus kerina enda, lawes ia leben ku Jerusalem. 29  Sanga nggo ndeher ia ku Betpage ras Betani i deleng si igelari Deleng Saitun, isuruhna dua muridna, 30  nina, “Laweslah ku kuta si arah lebe ah. Kenca masuk kena ku je, idapeti kena kari sada anak kelede si iiket si lenga pernah inangkihi kalak. Lepaskenlah janah baba ku jenda. 31  Tapi adi lit si nungkun, ‘Engkai maka ilepasken kena?’ arus ikataken kena, ‘Perlu Tuan.’” 32  Emaka lawes me kalak si isuruh ndai janah idapeti kalak e bagi si nggo ikataken Jesus. 33  Tapi sanga ipulahi kalak e anak kelede ndai, nungkun si mpuna kelede e, “Engkai maka ipulahi kena?” 34  Ngaloi kalak e, “Perlu Tuan.” 35  Kenca si e, ibaba kalak e man Jesus, janah itamaken kalak e uisna si arah darat ku datas anak kelede e, jenari inangkihi Jesus. 36  Sanga Jesus lewat, ikimbangken kalak e uisna si arah darat i dalan. 37  Seh kenca ia i deher dalan si ngincuah arah Deleng Saitun, kerina muridna si seh kel teremna ermeriah ukur janah ipujina Dibata alu sora si megang erkiteken kerina perbahanen si dem kuasa si nggo idah kalak e, 38  nina, “Ipasu-pasu me ia si reh selaku Raja i bas gelar Jahwe! Dame i surga, janah imuliakenlah Dibata si lit i bas ingan si meganjangna!” 39  Tapi, piga-piga kalak Parisi si lit i bas jelma si nterem e ngerana man Jesus, “O Guru, rawai min murid-muridndu e.” 40  Tapi ngaloi ia, “Adi tetap kalak e sinik, batu-batu enda me si ersurak.” 41  Sanga nggo ndeher ku Jerusalem, itatapna kota e janah itangisina, 42  nina, “Bicara itehndu kai si banci maba dame bandu, tapi gundari ibuniken e i bas matandu nari. 43  Sebap reh me warina sanga musuh-musuhndu mbangun benteng kayu si ntelap i sekelilingndu jenari ikepungna kam janah iserangna kam arah japa pe. 44  Ikernepken kalak e pagi kam ras anak-anakndu, janah la pagi itadingkenna sada batu pe i datas batu si debanna, sebap kam nggo ihakimi* tapi la isadarindu.” 45  Jenari masuk Jesus ku rumah pertoton janah mulai ipelawesna kalak si erbinaga i je, 46  nina man kalak e, “Lit tertulis, ‘RumahKu pagi igelari rumah pertoton,’ tapi iban kena jadi gua perampok.” 47  Tiap wari Jesus ngajar i rumah pertoton. Janah imam-imam kepala, ahli Undang-Undang Musa, ras peminpin kalak Jahudi iusahakenna munuh ia. 48  Tapi la idat kalak e cara ngelakokenca, sebap kerina kalak terus ngikutken ia guna megiken ia.

Cataten kaki

Ntah “ara-murbei.”
Ntah “kukompas alu tuduhen palsu.”
Ntah “anding-andingen.”
Ntah “teridah.”
Sen mina Junani beratna 340 gram, ergana kira-kira 100 drakhma.
As. “pirak.”
As. “ipereksa.”