Lukas 14:1-35

  • Dilaki si sakit, si besar dagingna ipepalem i bas wari Sabat (1-6)

  • Jadilah tamu si meteruk rukur (7-11)

  • Undanglah kalak si la banci mere balasen (12-14)

  • Perumpaman kerna tamu-tamu si ndarami alasen (15-24)

  • Erti jadi murid-murid Jesus (25-33)

  • Sira si lanai masin (34, 35)

14  I bas kesempaten si deban, lawes Jesus man ku rumah salah sada peminpin kalak Parisi i bas wari Sabat. I je, iperdiateken kalak kel ia.  I lebe-lebena lit sekalak dilaki si sakit, besar dagingna.*  Emaka nungkun Jesus man ahli-ahli Undang-Undang Musa bage pe kalak Parisi, “Banci nge mpepalem bas wari Sabat ntah lang?”  Tapi sinik saja kalak e. Emaka ijemak Jesus dilaki ndai, ipepalemna jenari isuruhna lawes.  Kenca si e, nina man kalak e, “Ise i bas kena nari adi anakna ntah lembuna ndabuh ku bas sumur i bas wari Sabat, la mis itarikna?”  La banci ijawap kalak e.  Sanga iperdiateken Jesus uga tamu-tamu si i je milih ingan si mehamatna, iceritakenna sada perumpaman.* Nina,  “Adi iundang kalak kam ku pesta perjabun, ula kundul i bas ingan si mehamatna. Banci saja lit kalak si hamaten asangken kam iundang ka.  Kenca si e, kalak si ngundang kena duana reh janah nina, ‘Enda ingan kundulna.’ Emaka mela iakapndu janah miser kam ku pudi. 10  Tapi adi iundang kam, laweslah janah kundul arah pudi, alu bage sanga reh kalak si ngundang kam e, ikatakenna kari bandu, ‘O Teman, arah lebe kam kundul.’ Jenari datndu kehamaten i lebe-lebe kerina tamu. 11  Sebap ise pe si ipeganjangna bana ipeteruk me, janah ise pe si ipeterukna bana ipeganjang me.” 12  Kenca si e nina Jesus ka man kalak si ngundang ia, “Adi ibanndu acara man-man i bas suari ntah berngi wari, ula lebuhndu teman-temanndu ntah pe senina-seninandu ntah kade-kadendu, ntah tetanggandu si bayak. Sebap, banci saja iundangna ka kam kari guna mbalassa. 13  Tapi adi ibanndu pesta, undanglah kalak si mesera, si cacat, si lumpuh, ras si pentang. 14  Ermeriah ukur me pagi kam, sebap la ngasup kalak e mbalassa bandu. Idatndu pagi balasenna sanga kalak si benar ipekeke.” 15  Megi si enda, ngerana me sekalak i bas tamu e nari bana, “Ermeriah ukur me kalak si man i bas Kerajan Dibata.” 16  Ngaloi Jesus, “Sekalak dilaki erban pesta man berngi si mbelin, janah nterem si iundangna. 17  Sanga pesta man berngi si mbelin e nandangi ibenaken, isuruhna budakna ndahi kalak si iundang guna ngataken, ‘Mari, sebap kerina nggo isikapken.’ 18  Tapi, kerinana mulai erban alasen. Lit si ngataken, ‘Enggo kutukur selambar juma janah kunen ateku. Emaka, ula sangkut ukurndu, la banci aku reh.’ 19  Nina si deban, ‘Enggo kutukur lima pasang lembu janah kucubaken ateku guna ngenen mejile ntah lang, emaka ula sangkut ukurndu.’ 20  Nina si debanna ka, ‘Aku la banci reh, mbaru denga aku erjabu.’ 21  Emaka mulih me budak e janah ilaporkenna kerina man tuanna. Merawa tuan rumah e janah nina man budakna, ‘Mislah kam lawes ku pasar-pasar si galang ras ku gang-gang kota, baba ku jenda kalak si mesera, si cacat, si pentang, ras si lumpuh.’ 22  I bas waktuna, nina budak e, ‘O Tuan, kai si iperentahkenndu nggo kulakoken, tapi lit denga ingan.’ 23  Emaka nina tuan e man budakna, ‘Laweslah ku dalan-dalan ras ku gang-gang i kuta-kuta, iahken kalak e reh, gelah dem rumahku e. 24  Sebap, kalak si iundang ndai, la sada pe man i bas pestaku.’” 25  Sanga nterem jelma erdalan ras Jesus, itulihkenna ku kalak e, janah nina, 26  “Adi lit kalak si reh bangku janah kelengen atena bapakna, mamakna, diberuna, anak-anakna, seninana, turangna, bage pe dirina sendiri, la ia banci jadi muridku. 27  Ise pe si la maba tiang siksanna* janah la ngikutken aku, la banci jadi muridku. 28  Contohna, adi lit i bas kena nari atena mbangun sada menara, tentu kundul ia lebe janah ikirana biayana guna meteh bias nge ntah lang senna i bas ndungisa. 29  Adi la bage, banci saja pondasina ngenca terbangunna tapi la banci idungina, janah kerina kalak si ngenenca nokohi ia, 30  nina, ‘Kalak enda mbangun tapi la terdungina.’ 31  Entah, adi lit raja si erperang atena ras raja si deban, tentu kundul ia lebe janah ipindona pedah guna meteh ngasup nge ia ntah lang alu 10.000 tentera ngelawan raja si 20.000 tenterana. 32  Adi la ia ngasup, isuruhna me sada kelompok utusenna mindo perdamen sanga ndauh denga musuh ndai. 33  Bage ka pe, teklah kena, la banci kena jadi muridku adi la itadingken kena kerina erta kena. 34  “Sira tuhu mehuli. Tapi adi sira lanai masin, alu kai nari banci ipemasin? 35  E la cocok man taneh ntah pe pupuk. Iambekken kalak me e. Ise pe si ercuping, begikenlah.”

Cataten kaki

Ntah “si sakit edema,” pinakit perban mbuesa cairen bas daging.
Ntah “anding-andingen.”
Nen Kamus.