Lukas 13:1-35

  • Ertobat ntah kernep (1-5)

  • Perumpaman kerna batang ara si la erbuah (6-9)

  • Diberu si mbengkong ipepalem i bas wari Sabat (10-17)

  • Perumpaman kerna biji sawi ras ragi (18-21)

  • Perlu erjuang gelah banci masuk arah pintu si sempit (22-30)

  • Herodes, “kalak si licik” (31-33)

  • Sedih kel Jesus erkiteken Jerusalem (34, 35)

13  Paksa si e, piga-piga kalak si i je mere laporen man Jesus kerna kalak Galilea si ibunuh Pilatus sanga kalak e mereken korban.  Ngaloi Jesus, “Erkiteken si enda terjadi man kalak Galilea, akap kena kin keleken dosana asangken kerina kalak Galilea si debanna?  Lang, tapi adi la kin kena ertobat,* kerina kena pagi kernep ka bagi kalak e.  Entah, uga kerna 18 kalak si mate perban idabuhi menara Siloam, akap kena kin belinen kesalahen kalak e asangken kerina kalak si debanna si tading i Jerusalem?  Lang, tapi adi la kena ertobat,* kerina kena pagi kernep ka bagi kalak e.”  Kenca si e, iceritakenna perumpaman* enda, “Lit me sekalak dilaki si mpuna batang ara i kebun anggurna, janah reh ia ndarami buahna tapi la lit datna kai pe.  Jenari nina man si erdahin kebun e, ‘Enggo telu tahun aku reh ndarami buah ara i bas batangna enda, tapi la lit kudat. Tabah sajalah! La lit ertina ia turah i je.’  Ngaloi si erdahin e, ‘O Tuan, pediat ia turah sada tahun nari. Kukurak kari taneh si lit i sekelilingna janah kutama pupuk.  Adi erbuah kari ia, merandal. Tapi adi lang, sitabah saja.’” 10  Kenca si e, ngajar Jesus i bas salah sada ingan pulung kalak Jahudi* i bas wari Sabat. 11  I je lit sekalak diberu si sakit, malekat jahat erbanca, dekahna nggo 18 tahun. Mbengkong ia janah adi tedis lanai banci pinter dagingna. 12  Sanga idah Jesus diberu e, ilebuhna ia, nina, “Ibebasken kam i bas penakitndu nari.” 13  Itama Jesus tanna ku datasna, emaka mis pinter dagingna, jenari imuliakenna Dibata. 14  Tapi merawa kel kepala ingan pulung kalak Jahudi* e sebap Jesus mpepalem kalak i bas wari Sabat. Nina man jelma si nterem, “Lit enem wari guna erdahin, i jelah kena reh ras ipepalem, ula bas wari Sabat.” 15  Tapi, ngaloi Tuan, “O kalak munapik, i bas wari Sabat, la kin ipulahi kena lembu ntah pe kelede kena i bas karangna nari janah ibaba kena gelah ibere minem? 16  Apai ka diberu enda, ia kesusuren Abraham janah nggo 18 tahun ia iiket Setan, me patut ia ipulahi arah iketen e nari bas wari Sabat?” 17  Megi si e, mela me kerina si nentang ia, tapi kerina jelma si nterem e ermeriah ukur erkiteken kerina perbahanenna si luar biasa. 18  Emaka nina Jesus, “Uga kin Kerajan Dibata e, janah alu kai banci ipeseri? 19  E bali bagi sada benih sawi si ibuat kalak janah isuanna bas jumana, turah ia jadi batang kayu, janah perik-perik i langit rasar i bas dahan-dahanna.” 20  Nina ka, “Alu kai banci ipeseri Kerajan Dibata e? 21  E bali bagi ragi si ibuat sekalak diberu janah iadukna ras 10 kilo tepung ngayak kembang kerinana.” 22  I bas perdalanen Jesus ku Jerusalem, singgah ia arah kota ku kota bage pe arah kuta ku kuta janah ngajar i je. 23  Nina sekalak dilaki man bana, “O Tuan, sitik kin ngenca kalak si iselamatken?” Nina Jesus ngaloi kalak e, 24  “Usahakenlah asa ngasupndu masuk arah pintu si sempit, sebap nterem pagi kalak masuk atena, tapi la banci. 25  Kenca ikunci tuan rumah pintu, cinder kena i darat, ituktuki kena pintuna, ning kena, ‘O Tuan, buka min.’ Tapi ngaloi ia, ‘La kena kutandai.’ 26  Jenari ning kena, ‘Radu kita man ras minem, janah ngajar kam i bas dalan-dalan kami si galang.’ 27  Tapi nina man kena, ‘La kena kutandai. Laweslah i bas aku nari, o kalak jahat!’ 28  I je me kena tangis janah erderep ipen kena sanga idah kena Abraham, Isak, Jakup ras kerina nabi i bas Kerajan Dibata, tapi kena sendiri ibenterken ku darat. 29  Selain si e, reh me pagi kalak arah timur, barat, utara, bage pe selatan nari, janah kundul ia guna man i bas Kerajan Dibata. 30  Kalak si terakhir jadi si pertama pagi, janah kalak si pertama jadi si terakhir pagi.” 31  I bas paksa si e, reh me piga-piga kalak Parisi janah nina, “To lawes, tadingken ingan enda, sebap ibunuh Herodes atena kam.” 32  Ngaloi Jesus man kalak e, “To kataken man kalak si licik* ah, ‘Gundari ras pagi kupelawes malekat-malekat jahat ras kupepalem kalak, janah i bas wari si peteluken dung me dahinku.’ 33  Aminna pe bage, arus kuterusken perdalanenku gundari, pagi, ras kedun, sebap sekalak nabi la banci* ibunuh i darat Jerusalem. 34  O Jerusalem, Jerusalem, pemunuh nabi-nabi ras si mbenteri* kalak si isuruh ndahi kam, seh kel rusurna ateku mpepulung anak-anakndu bali bagi indung manuk mpepulung anak-anakna i teruh kabengna! Tapi la kena nggit. 35  Rumah pertoton kena itadingken pagi. Kukataken man kena, lanai kari idah kena aku ngayak ikataken kena, ‘Ipasu-pasu me ia si reh i bas gelar Jahwe!’”

Cataten kaki

Ntah “jera dingen robah.”
Ntah “jera dingen robah.”
Ntah “anding-andingen.”
As. “sinagoga.” Nen Kamus.
As. “sinagoga.” Nen Kamus.
As. “man biang kerangen.”
Ntah “la mungkin.”
Ntah “si mbenteri alu batu.”