Kolose 1:1-29

  • Salam (1, 2)

  • Ngata bujur perban kiniteken kalak Kolose (3-8)

  • Notoken kemajun rohani (9-12)

  • Pentingna tanggung jawap Kristus (13-23)

  • Kerja keras Paulus guna runggun (24-29)

1  Surat enda i bas Paulus nari, sekalak rasul Kristus Jesus sue ras peraten Dibata, bage pe i bas turang seninata eme Timotius nari.  Surat enda man kalak si badia bage pe man turang senina si setia i bas persadan ras Kristus si lit i Kolose: Mbera igejapken kena lias ate si mbelin bage pe kedamen i bas Dibata eme Bapakta.  Sanga itotoken kami kena, rusur ikataken kami bujur man Dibata, Bapak Tuanta Jesus Kristus,  sebap nggo ibegi kami kerna kiniteken kena man Kristus Jesus bage pe kerna kekelengen kena man kerina kalak si badia.  Bage perbahanen kena perban lit arapen si nimai kena i surga. Ibegi kena kerna arapen e arah berita kebenaren eme berita si meriah  si ipeseh man kena. Erbuah me berita si meriah e janah terberita ku belang-belang doni. Bage ka me si terjadi i tengah-tengah kena, mulai kin tangtangna nari ibegi kena janah iteh kena alu tepat uga situhuna lias ate Dibata si mbelin.  Si enda ibegi kena i bas Epapras nari, turang seninata si setia ras si ikelengi kami, si ngelayani selaku budak Kristus bali bagi kami janah ia erdahin guna kami.  Iceritakenna ka man kami kerna keleng ate kena si ihasilken kesah si badia.  Eme sebapna maka mulai kin tangtangna nari ibegi kami kerna si e, la kami erngadi-ngadi notoken kena gelah lit pemeteh kena si tepat kerna peraten Dibata, kerna kerina kepentaren, ras pengangkan si ibereken kesah si badia. 10  Alu bage ngena ate Jahwe perbahanen kena janah tuhu-tuhu banci isenangken kena Ia. Emaka perbahanen kena si mehuli e ngasilken buah janah pemeteh kena si tepat kerna Dibata ertambahna. 11  Mbera kuasaNa si mulia mereken gegeh si iperluken kena gelah banci kena megenggeng ngadapi kerinana alu sabar ras ermeriah ukur, 12  janah ngata bujur man Bapak si erban kena cocok ngaloken bagin arah warisen man kalak si badia si lit i bas terang. 13  Enggo iselamatkenNa kita arah kuasa kegelapen nari janah nggo ibabaNa kita ku bas kerajan AnakNa si ikelengiNa. 14  Ibebasken AnakNa kita alu tebusen, janah e ertina dosa-dosata nggo iampuni. 15  Sipatna seri kel ras Dibata si la teridah janah ia me si pertama iciptaken Dibata arah kerina si iciptakenNa. 16  Emaka kerina si debanna iciptaken arah ia, si lit i surga bage pe si lit i doni, si la teridah bage pe si teridah, bage pe raja, peminpin, pemerentah, ntah pe penguasa. Kerina si debanna iciptaken arah ia janah guna ia. 17  Leben ia lit asangken kerina si debanna, janah arah ia, kerina si debanna jadi lit. 18  Ia me takal i bas daging e, daging e eme runggun. Ia me si tangtangna, si pertama ipekeke i bas si mate nari. Alu bage, ia lalap jadi si pertama i bas kerinana, 19  erkiteken sura-sura Dibata gelah ia lengkap i bas kerinana, 20  janah erkelangken AnakNa, idameken Dibata mulihi diriNa ras kerina si lit, si lit i doni bage pe si lit i surga. Si enda banci terjadi erkiteken dareh AnakNa si mambur i bas tiang siksan.* 21  Mbarenda sirang kena ras Dibata janah jadi musuhNa erkiteken iukuri kena kai si jahat. 22  Tapi gundari kena nggo idameken mulihi erkiteken kematenna si nggo ngkorbanken dagingna, gelah i lebe-lebe Dibata kena jadi badia, la erpandangen, janah bebas arah tuduhen nari. 23  Aminna pe bage, kena arus tetap erkiniteken, jadi paguh i datas pondasi e janah nteguh, ula ndauh i bas arapen si lit i bas berita si meriah si nggo ibegi kena, si nggo iberitaken ku kerina ciptan si lit i teruh langit. Aku, Paulus, jadi pelayan guna berita si meriah e. 24  Gundari meriah ukurku aminna pe kunanami kiniseran guna kena. Selaku anggota daging Kristus, arus denga kunanami kiniseran seh asa dung. Kiniseran enda guna daging Kristus eme runggun. 25  Aku jadi pelayan guna runggun enda, sue ras tugas si ibereken Dibata man bangku guna kena. Eme sebapna kuberitaken kata Dibata asa ngasupku. 26  Kuberitaken rahasia si badia si ibuniken arah doni* enda nari bage pe arah kalak si nggeluh i bas jaman si nai. Tapi gundari rahasia e nggo ipebetehken man umatNa si badia. 27  Meriah ukur Dibata mpebetehken man kalak e kerna rahasia si badia si nggo ipebetehken i tengah-tengah bangsa si deban. Enda me rahasia si badia si dem alu kemulian ras kebayaken: Kristus ersada ras kena, si ertina lit arapen kena guna imuliaken ras ia. 28  Siberitaken kerna ia man kerina kalak janah sipersingeti, bage pe siajari kerina kalak alu kerina kepentaren. Alu bage banci siban kerina kalak ersada ras Kristus, lengkap i lebe-lebe Dibata. 29  Guna si enda me aku kerja keras. Erjuang aku alu penampat kuasaNa si erdahin i bas diriku.

Cataten kaki

Nen Kamus.
Nen Kamus.