Ketangkasen 9:1-21

  • Trompet si pelimaken (1-11)

  • Sada cilaka nggo lewat, dua nari nandangi reh (12)

  • Trompet peenemken (13-21)

9  Iembus malekat si pelimaken me trompetna. Jenari kuidah sada bintang si nggo ndabuh i langit nari ku doni. Ibereken man bana kunci guna mbuka lubang si seh kel bagesna.  Ibukana lubang si seh kel bagesna e, jenari ndarat me asap si mekapal bali bagi asap arah dapur si mbelin nari. Perban asap e matawari ras udara jadi gelap.  Ndarat me labang arah asap e nari janah nusur ku doni. Ibereken man kalak e kuasa bali bagi kuasa si ibereken man kacip gelang* i doni enda.  Ipebetehken man labang-labang* e gelah ula icedakenna peren, batang kayu, ras sinuan si meratah si apai pe si lit i doni. Manusia si la lit meterai i bas perdempakenna ngenca si banci isiksana.  Labang-labang e la banci munuh manusia, tapi banci isiksana manusia sedekah lima bulan. Suina isiksa labang e bali ras icit kalajengking.  Paksa si e, idarami manusia kematen, tapi la idatca. Merhat kel kalak e mate, tapi kematen kiam i bas kalak e nari.  Labang-labang e teridah bali bagi kuda si ersikap guna erperang. I datas takalna tempa lit bagi mahkota emas. Ayona bali bagi ayo dilaki,  tapi bukna bali bagi buk diberu, janah ipenna bali bagi ipen singa.  Lit si ngelindungi tentenna, si iban tempa arah besi nari. Sora kabengna bali bagi sora gereta-gereta kuda si lawes erperang. 10  Labang-labang e lit ikurna, janah ikurna e erbisa bali bagi bisa ikur kalajengking. I bas ikurna e lit kuasa guna niksa manusia sedekah lima bulan. 11  Labang-labang e lit rajana, eme malekat si njagai lubang si seh kel bagesna. Gelar rajana e i bas bahasa Heber, eme Abaddon,* janah i bas bahasa Junani, gelarna Apolion.* 12  Cilaka si pertama nggo lewat. Kenca si e, nandangi reh ka dua cilaka nari. 13  Iembus malekat si peenemken trompetna. Jenari, kubegi sora arah tanduk-tanduk batar-batar persembahen emas si lit i lebe-lebe Dibata, 14  ngerana sora e man malekat si peenemken si njemak trompet, “Lepasken empatna malekat si iiket i deher Lau Eprat si mbelin e.” 15  Emaka ilepasken me empatna malekat e. Malekat-malekat e nggo isikapken i bas jam, wari, bulan, bage pe tahun si nggo itentuken guna munuh sepertelu i bas kerina manusia. 16  Kubegi maka pasuken tentera si erkuda lit 200 juta buena. 17  Bagenda me si kuidah kerna kuda ras si nangkihisa: Si nangkih kuda e lit si ngelindungi tentenna, pelindungna e warna megara bagi api, biru tua, bage pe warna megersing bagi kertah. Takal kuda e bali bagi takal singa, janah arah babahna nari ndaraten api, asap, ras kertah. 18  Sepertelu manusia ibunuh alu telu bencana, eme api, asap, ras kertah si ndarat arah babahna nari. 19  Kuasa kuda-kuda e lit i bas babahna ras i bas ikurna. Ikurna bali bagi nipe janah lit takalna, alu ikurna e isiksana manusia. 20  Tapi manusia si deban si la ibunuh alu bencana-bencana e, la nggit ertobat* arah perbahanenna.* Tetap isembah kalak e malekat-malekat jahat, berhala-berhala si iban arah emas, pirak, tembaga, batu, ras kayu nari si la erpengidah, la erpemegi, janah la banci erdalan. 21  Kalak e pe la ertobat* arah dosa-dosana, eme munuh, ndalanken perbahanen kai pe si lit hubungenna ras malekat jahat,* ngelakoken perbahanen seks si salah,* bage pe nangko.

Cataten kaki

Ntah “kalajengking.”
Ntah “belalang-belalang.”
Ertina “Kernep.”
Ertina “Si Ngkernepken.”
Ntah “jera dingen robah.”
As. “perbahanen tanna.”
Ntah “jera dingen robah.”
Nen Kamus.
Bahasa Junani, porneia. Nen Kamus.