Ketangkasen 7:1-17

  • Empat malekat nagangi angin si ngkernepken (1-3)

  • Si 144.000 imeteraiken (4-8)

  • Sada kelompok jelma si nterem make jubah mbentar (9-17)

7  Kenca si e, kuidah empat malekat tedis i empat ujung doni. Itagangi kalak e empatna angin i doni enda, gelah ula lit angin si rembus ku doni, ku lawit, ntah pe ku batang kayu si apai pe.  Jenari, kuidah ka malekat si deban nangkih arah timur* nari maba meterai si ialokenna i bas Dibata si nggeluh. Alu sora megang erlebuh ia man empat malekat e si nggo ibereken ijin guna ncedaken doni ras lawit,  nina, “Ula cedaken doni, lawit, ntah pe batang kayu, seh asa dung itamaken kami meterai i perdempaken budak-budak Dibatata.”  Kubegi maka kalak si imeteraiken e buena lit 144.000 kalak. Kalak e ibuat i bas tiap suku Israel nari:  Arah suku Juda nari lit 12.000 si imeteraiken,arah suku Ruben nari lit 12.000,arah suku Gad nari lit 12.000,  arah suku Aser nari lit 12.000,arah suku Naptali nari lit 12.000,arah suku Manase nari lit 12.000,  arah suku Simeon nari lit 12.000,arah suku Lewi nari lit 12.000,arah suku Isasar nari lit 12.000,  arah suku Sebulon nari lit 12.000,arah suku Jusup nari lit 12.000,arah suku Benyamin nari lit 12.000 si imeteraiken.  Jenari, lit kuidah sada kelompok jelma si nterem. Ise pe la ngasup ngkira jumlahna. Kalak e rehna arah kerina bangsa, suku, umat, ras bahasa. Kerina kalak e tedis i lebe-lebe tahta bage pe i lebe-lebe Anak Biri-Biri e janah ipake kalak e jubah mbentar ras ijemak kalak e dahan batang kayu. 10  Terus kalak e ersurak alu sora megang, “Keselamatenta reh i bas Dibatata nari, e me si kundul i tahta e bage pe i bas Anak Biri-Biri e nari.” 11  Kerina malekat tedis i sekeliling tahta e, pertua-pertua, bage pe empat mahluk si nggeluh e. Erjimpuh kalak e i lebe-lebe tahta janah nembah man Dibata, 12  nina, “Amin! Mbera pujin, kemulian, kepentaren, pengatan bujur, kehamaten, kuasa, bage pe gegeh, ibereken man Dibatata rasa lalap seh rasa lalap. Amin.” 13  Jenari sekalak i bas pertua-pertua e isungkunna aku, nina, “Ise kerina kalak si erjubah mbentar enda, janah i ja nari kin ia?” 14  Minter kujawap, “O Tuanku, kam me si meteh jawapenna.” Nina ka man bangku, “Kalak enda me si selamat ngelewati kiniseran si mbelin e. Enggo icucina jubahna janah ibanna mbentar alu dareh Anak Biri-Biri. 15  Eme sebapna kalak e lit i lebe-lebe tahta Dibata. Ibereken kalak e pelayanen si badia man baNa suari ras berngi i bas rumah pertotonNa. Ia si kundul i tahta e ngkimbangken kemahNa guna ngelindungi kalak e. 16  Lanai kalak e muas ntah pe melihe. Matawari ntah pe las matawari la erban kalak e meseng. 17  Sebap ipermakani Anak Biri-Biri si lit i deher tahta e pagi kalak e. Ibabana pagi kalak e ku sumber lau kegeluhen. Janah iapusi Dibata me kerina iluh kalak e.”

Cataten kaki

Ntah “matawari pultak.”