Ketangkasen 2:1-29

  • Pedah man Epesus (1-7), man Semirna (8-11), man Pergamon (12-17), Tiatira (18-29)

2  “Man malekat runggun i Epesus, tuliskenlah bagenda: Enda me kata i bas ia nari, si njemak pitu bintang i bas tan kananna, si erdalan i tengah-tengah pitu nahe lampu emas e:  ‘Kuteh kai si nggo ilakokenndu, uga kerja kerasndu, ras kesabarenndu. La kam nggit ngaloken kalak si jahat. Iujindu kalak si ngaku-ngaku rasul, tapi situhuna labo ia rasul, janah dungna itehndu ia perbual.  Inanamindu ka melala kiniseran erkiteken gelarku, tapi sabar kam janah la kam putus asa.  Aminna pe bage, lit kuakap si la payo i bas kam. Kekelengenndu lanai bagi si tangtangna mbarenda.  “‘Emaka ingetlah uga dauhna kam nggo ndabuh. Ertobatlah kam! Lakokenlah bagi si tangtangna ilakokenndu mbarenda. Adi la kam ertobat,* kudahi me kam janah kupedauh nahe lampundu i bas inganna nari.  Tapi lit denga si mehuli i bas kam nari: Segat atendu perbahanen sekte Nikola. Aku pe segat ateku sekte e.  Ise pe si ercuping, begikenlah kai si ikataken kesah si badia man runggun-runggun: Man kalak si nggo menang, kupediat ipanna buah batang kayu kegeluhen si turah i bas pardis Dibata.’  “Man malekat runggun i Semirna, tuliskenlah bagenda: Enda me kata i bas ia nari, ‘Si Pertama ras Si Terakhir,’ si nggo mate tapi nggo nggeluh mulihken:  ‘Kuteh nge kiniseranndu janah kuteh maka kam kalak mesera, tapi situhuna bayak kap kam. Kuteh nge kam ihina kalak si ngaku kalak Jahudi, tapi situhuna labo ia kalak Jahudi. Kalak enda anggota kelompok* Setan. 10  Ula kam mbiar kerna kiniseran si nandangi inanamindu. Nenlah! Iuji Iblis me kena janah piga-piga i bas kena nari imasukkenna ku penjara. Sepuluh wari dekahna inanami kena me kiniseran. Tapi buktikenlah kam setia man bangku aminna pe arus mate, janah kubereken me man bandu mahkota kegeluhen. 11  Ise pe si ercuping, begikenlah kai si ikataken kesah si badia man runggun-runggun: Kalak si menang lanai pagi ngenanami kematen si peduaken.’ 12  “Man malekat runggun i Pergamon, tuliskenlah bagenda: Enda me kata i bas ia nari si lit pedangna si dua matana,* si ntelap, janah gedang: 13  ‘Kuteh i ja kam tading, e me i bas tahta Setan. Tapi tetap kam setia man bangku* janah ibuktikenndu maka paguh kinitekenndu, aminna pe saksi si setia eme Antipas, nggo ibunuh i lebe-lebendu, i bas ingan Setan. 14  “‘Aminna pe bage, lit kuakap piga-piga si la payo i bas kam. Ipediatndu piga-piga pengikut ajaren Bileam lit i tengah-tengahndu. Bileam me nai si ngajari Balak gelah mabai kalak Israel erdosa alu man pangan si ipersembahken man berhala janah alu ngelakoken perbahanen seks si salah.* 15  Bage ka pe, lit piga-piga i bas kam si ngikutken ajaren sekte Nikola. 16  Emaka ertobatlah!* Adi lang, minter me kam kudahi janah kulawan me kalak si la nggit ertobat e, alu pedang si ndarat i bas babahku nari. 17  “‘Ise pe si ercuping, begikenlah kai si ikataken kesah si badia man runggun-runggun: Man kalak si nggo menang kubereken man bana manna si terbuni, janah kubereken man bana sada batu mbentar si kitik, si nggo itulis alu gelar si mbaru, si labo ise pe metehsa, selain si ngaloken batu e.’ 18  “Man malekat runggun i Tiatira, tuliskenlah bagenda: Enda me kata i bas Anak Dibata nari, si matana ersinar bagi api, janah nahena erkilat bagi tembaga si ilebur alu api: 19  ‘Kuteh kai si ilakokenndu, kekelengenndu, kinitekenndu, pelayanenndu, bage pe kerna kesabarenndu. Janah kerna kai si ilakokenndu gundari buen asangken si tangtangna mbarenda. 20  “‘Aminna pe bage, lit kuakap si la payo i bas kam. Ipediatndu diberu si bagi Isebel e, si ngakuken dirina nabi, si erban papak budak-budakku alu ajarenna, alu bage ilakoken kalak e perbahanen seks si salah,* janah ipanna pangan si nggo ipersembahken man berhala. 21  Enggo kubereken waktu man bana gelah ertobat* tapi la ia nggit ertobat* i bas ngelakoken perbahanen seks si salah* nari. 22  Nenlah! Kusampetken me ia ku bas ingan medem kalak sakit. Janah kalak si erlua-lua ras ia e pasti ngenanami kiniseran si mbelin adi la kin ia ertobat arah perbahanenna. 23  Kubunuh me anak-anakna alu pinakit si maba kematen. Alu bage iteh kerina runggun maka aku me si mereksa pusuh ras perukuren si terbuni. Kubalas me kena sekalak-sekalak menurut kai si nggo ilakoken kena. 24  “‘Tapi kukataken man kalak si lit i Tiatira, kerina si la ngikutken pengajaren enda, si la nggit meteh kerna kai si igelari “rahasia Setan,” kukataken maka lanai kutambahi baban kena. 25  Tapi tetaplah dalanken kai si mehuli si nggo lit i bas kena gundari seh asa aku reh pagi. 26  Janah man kalak si menang ras kalak si ndalanken perentahku seh ku kedungenna, kubereken pagi bana kuasa guna merentah bangsa-bangsa, 27  bali bagi kuasa si nggo kualoken i bas Bapakku nari. Ipermakanina pagi bangsa-bangsa alu tongkat besi. Alu bage kalak e pagi bali bagi kudin taneh si iperperken. 28  Kubereken pagi man bana bintang erpagi-pagi. 29  Ise pe si ercuping, begikenlah kai si ikataken kesah si badia man runggun-runggun.’

Cataten kaki

Ntah “jera dingen robah.”
As. “sinagoga.”
Ntah “dua babahna.”
As. “Tapi terus icikepndu gelarku.”
Bahasa Junani, porneia. Nen Kamus.
Ntah “jera dingen robahlah.”
Bahasa Junani, porneia. Nen Kamus.
Ntah “jera dingen robah.”
Ntah “jera dingen robah.”
Bahasa Junani, porneia. Nen Kamus.