Ketangkasen 17:1-18

  • Ukumen man “Babilon si Mbelin” (1-18)

    • Pelacur si mbelin kundul i datas binatang si seh kel rawana si warnana megara bagi api (1-3)

    • Binatang e ‘mbarenda nggo pernah lit, gundari lanai lit, janah kentisik nari ndarat arah lubang si seh kel bagesna’ (8)

    • Ilawan si sepuluh tanduk me Anak Biri-Biri e (12-14)

    • Segat me ate si sepuluh tanduk man pelacur e (16, 17)

17  Sada i bas pitu malekat si maba pitu mangkok e reh janah ngerana man bangku, “Mari, maka kucidahken man bandu ukumen nandangi pelacur si mbelin si kundul i datas lau si melala.  Raja-raja i doni ngelakoken perbahanen seks si salah* ras pelacur si mbelin e. Kalak si tading i doni pe jadi mabuk erkiteken anggurna, eme perbahanen seksna si salah.”*  Alu kesah si badia ibaba malekat e aku ku taneh mesawang.* Kuidah sekalak diberu kundul i datas binatang si seh kel rawana e si warnana megara bagi api, lit pitu takal binatang e ras sepuluh tandukna. I bas dagingna dem alu gelar-gelar si nghina Dibata.  Uis diberu e warnana terong ras megara bagi api. Janah ipakena emas, batu permata, ras mutiara. Janah i bas tanna lit cangkir emas si dem alu kai si erban ciga ate bage pe si najis arah perbahanen seksna si salah.*  I bas perdempakenna lit tertulis sada gelar si rahasia: “Babilon si Mbelin, nande i bas kerina pelacur ras kerina si erban ciga ate i doni.”  Kuidah diberu e mabuk erkiteken dareh kalak si badia ras dareh saksi-saksi Jesus. Mamang kel ateku ngidah ia.  Emaka nina malekat e man bangku, “Engkai maka mamang atendu? Kupebetehken me man bandu rahasia kerna diberu e ras kerna binatang si seh kel rawana si maba diberu e, binatang si pitu takalna ras sepuluh tandukna ndai:  Binatang si seh kel rawana si idahndu e, nggo pernah lit mbarenda, janah gundari lanai lit. Tapi kentisik nari, minter me ia ndarat arah lubang si seh kel bagesna, jenari ikernepken me. Kemamangen me kalak si tading i doni, si gelarna la itulisken i bas buku kegeluhen si nggo lit mulai kin doni enda ijadiken,* erkiteken binatang si seh kel rawana e nggo lit mbarenda, gundari lanai lit, tapi nandangi lit ka.  “I bas si e perlu kepentaren ras kebeluhen: Pitu takal ertina pitu deleng, janah diberu e kundul i datasna. 10  Pitu e ertina pitu raja: Lima nggo ndabuh, sekalak lit denga, janah si sekalak nari lenga reh. Tapi adi reh ia, kentisik ngenca ia lit. 11  Binatang si seh kel rawana e si mbarenda nggo pernah lit tapi gundari lanai lit, eme raja si pewaluhken. Asalna arah raja si pitu ndai. Dungna binatang si seh kel rawana e ikernepken me. 12  “Sepuluh tanduk si idahndu e, ertina sepuluh raja si lenga merentah, tapi ialoken kalak e me kuasa guna merentah jadi raja-raja radu ras binatang si seh kel rawana e sedekah sada jam. 13  Sepuluh raja e ersada kerina tujunna. Kerina ia mereken gegehna ras kuasana man binatang si seh kel rawana e. 14  Erperang me kalak e ngelawan Anak Biri-Biri e, tapi italuken Anak Biri-Biri e kalak e, erkiteken ia me Tuan nandangi kerina tuan ras Raja nandangi kerina raja. Kalak e pe italuken kalak si radu ras Anak Biri-Biri e, eme kalak si idilo, si ipilih, ras si setia.” 15  Ngerana ka malekat e man bangku, “Kerna lau si idahndu, lau si jadi ingan pelacur e kundul, ertina erbage-bage bangsa, rakyat, suku, ras bahasa. 16  Sepuluh tanduk si idahndu ras binatang si seh kel rawana e, segat me ate kalak e nandangi pelacur e, janah irampasna kerina si lit i bas ia, itilanjangina, ipanganina dagingna, janah itutungna alu api seh ngayak keri. 17  Si enda terjadi erkiteken nggo itamaken Dibata i bas pusuh kalak e sura-sura guna ndalanken peraten Dibata. Iban Dibata kalak e ngelakoken tujun si seri eme mereken kerajan kalak e man binatang si seh kel rawana e, ngayak seh kai si nggo ikataken Dibata. 18  Diberu si idahndu e ertina kota si mbelin si erkuasa nandangi raja-raja i doni.”

Cataten kaki

Bahasa Junani, porneia. Nen Kamus.
Bahasa Junani, porneia. Nen Kamus.
Taneh si mbelang si jarang iingani.
Bahasa Junani, porneia. Nen Kamus.
Maksudna, kenca anak-anak Adam ras Hawa lahir.