Ketangkasen 16:1-21

  • Pitu mangkok rawa Dibata (1-21)

    • Iamburken ku doni (2), ku lawit (3), ku lau si mbelin ras sumber lau (4-7), ku matawari (8, 9), ku tahta binatang si seh kel rawana (10, 11), ku Lau Eprat (12-16), ku udara (17-21)

    • Perang Dibata i Harmagedon (14, 16)

16  Jenari kubegi sora si megang i bas ingan si badia nari ngerana man pitu malekat, “Laweslah, janah amburkenlah ku doni pituna mangkok rawa Dibata.”  Lawes me malekat si pertama, jenari iamburkenna isi mangkokna ku doni. Emaka turah me bareh si mekelek si seh kel suina man kalak si lit i bas ia tanda binatang si seh kel rawana, bage pe man kalak si nembah patungna.  Iamburken malekat si peduaken isi mangkokna ku lawit. Emaka berubah lawit e jadi dareh, bali bagi dareh kalak si ibunuh. Kerina si nggeluh i bas lawit jadi mate.  Iamburken malekat si peteluken isi mangkokna ku lau si mbelin* bage pe ku sumber-sumber lau. Emaka kerina berubah jadi dareh.  Kubegi ngerana malekat si erkuasa nandangi lau e nina, “O Kam si setia, si lit gundari, ras mbarenda nari pe nggo lit. Adil kap Kam erkiteken nggo ibanNdu keputusen enda.  Iamburken kalak e dareh kalak si badia ras nabi-nabi, emaka ibanNdu kalak e nginem dareh. Janah patut nge bage.”  Jenari kubegi sora i bas batar-batar persembahen nari, nina, “Payo, o Dibata Jahwe, keputusenNdu benar ras adil kap.”  Iamburken malekat si peempatken isi mangkokna ku matawari, janah matawari e ipediat nutung manusia alu api.  Meseng me manusia perban lasna. Kalak e la ertobat* tapi ihinana gelar Dibata janah la iberekenna kemulian man Dibata si erkuasa nandangi bencana-bencana e. 10  Iamburken malekat si pelimaken isi mangkokna ku tahta binatang si seh kel rawana e. Emaka kerajan binatang e jadi gelap janah ikarat manusia me dilahna perban suina akapna. 11  Ihina kalak e Dibata si i surga erkiteken suina akapna ras erkiteken bareh-barehna. Tapi, la kalak e ertobat* arah perbahanenna. 12  Iamburken malekat si peenemken isi mangkokna ku lau si mbelin eme Eprat, emaka kerah me lau e guna nikapken dalan man raja-raja si rehna arah timur* nari. 13  Kuidah telu roh najis si bali bagi katak ndarat arah babah naga, babah binatang si seh kel rawana, bage pe arah babah nabi palsu. 14  Situhuna, roh najis e rehna arah malekat-malekat jahat janah ibanna mukjizat-mukjizat. Lawes kalak e ndahi raja-raja si lit i doni janah ipepulungna raja-raja e guna erperang i bas wari si mbelin eme wari Dibata Si Madakuasa. 15  “Nenlah! Reh me aku bali bagi pinangko. Ermeriah ukur me kalak si tetap sadar janah bajuna si arah darat la ibuat kalak, gelah paksa idah kalak ia erdalan, la ia tilanjang janah la lit si man kemelanken.” 16  Emaka ipepulung kalak e raja-raja ku ingan si igelari i bas bahasa Heber, Harmagedon.* 17  Iamburken malekat si pepituken isi mangkokna ku udara. Jenari terbegi sora i bas ingan si badia nari, arah tahta e, nina, “Enggo dung!” 18  Emaka teridah me kilat, terbegi sora-sora, bage pe sora lenggur, janah terjadi gempa si seh kel gegehna, si lenga pernah terjadi mulai kin manusia lit i doni. 19  Kota si mbelin pecah jadi telu, janah kota-kota si lit i bas bangsa-bangsa pe jadi hancur. Jenari Babilon si Mbelin iinget Dibata, janah ibereNa ia calung* si risiken anggur rawa Dibata si mbelin. 20  Kerina pulau-pulau bage pe deleng-deleng jadi bene. 21  Jenari nusur udan batu si ngkenai manusia. Berat tiap batu e kira-kira 20 kilogram. Ihina kalak me Dibata erkiteken bencana udan batu si luar biasa e.

Cataten kaki

Ntah “sungai.”
Ntah “jera dingen robah.”
Ntah “jera dingen robah.”
Ntah “matawari pultak.”
Bahasa Junani, Har Magedon, i bas bahasa Heber ertina, “Deleng Megido.”
Ntah “cangkir.”