Ketangkasen 12:1-17

  • Diberu, anak dilaki, ras naga (1-6)

  • Mikael erperang ngelawan naga (7-12)

    • Naga e isampetken ku doni (9)

    • Iteh Iblis waktuna kentisik nari ngenca (12)

  • Diberu e isiksa naga (13-17)

12  Kenca si e, lit teridah sada tanda si mbelin i langit: Sekalak diberu si ruisken matawari, janah lit bulan i teruh nahena, bage pe lit mahkota i bas takalna, i bas mahkota e lit 12 bintang.  Diberu e sangana hamil, janah nderkuh ia perban suina akapna, erkiteken kentisik nari melahirken me ia.  Lit ka teridah tanda si deban i langit: Nenlah! Lit sada naga si galang, si warnana megara bagi api. Naga e pitu takalna janah sepuluh tandukna. Tiap takal lit sada mahkotana.  Alu ikurna isarenna sepertelu bintang i langit, jenari isampetkenna bintang-bintang e ku doni. Naga e tetap tedis i lebe-lebe diberu e, gelah kenca melahirken diberu e, banci minter ibendutna anakna.  Emaka ilahirken diberu e me sekalak anak dilaki, si mpermakani kerina bangsa-bangsa alu tongkat besi. Kenca lahir, minter anak e ibaba ku Dibata si lit i bas tahtaNa.  Kiam diberu e ku taneh si mesawang,* ku ingan si nggo isikapken Dibata man bana, i je me ia ibere pangan sedekah 1.260 wari.  Jenari, terjadi perang i surga. Mikael* ras malekat-malekatna erperang ngelawan naga e. Janah ngelawan ka naga e ras malekat-malekatna,  tapi talu kalak e janah lanai lit inganna i surga.  Emaka, naga si galang e isampetken ku doni. Ia me nipe si pertama, si igelari Iblis ras Setan, si nipu kerina kalak si tading i doni. Isampetken ia ku doni ras kerina malekat-malekatna. 10  Jenari kubegi sora megang i langit nari, nina, “Dibata nggo nelamatken manusia, nggo ibuktikenNa kuasaNa, nggo pajek KerajanNa, janah gundari nggo erkuasa KristusNa! Sebap si nuduh senina-seninata suari ras berngi i lebe-lebe Dibata, nggo isampetken! 11  Senina-seninata nggo naluken musuh e alu dareh Anak Biri-Biri e, bage pe alu berita si ipesehna. Janah kalak e la mbiar mate. 12  Erkiteken si e, ermeriah ukurlah surga, bage pe kerina kena si tading i je! Tapi cilaka me doni ras lawit, sebap Iblis nggo nusur ku kena, janah merawa kel ia sebap itehna maka waktuna kentisik nari ngenca.” 13  Kenca isadari naga e maka ia nggo isampetken ku doni, isiksana diberu si nggo melahirken anak dilaki ndai. 14  Tapi man diberu e ibereken dua kabeng kuliki si galang, gelah banci ia kabang ku inganna si ndauh arah nipe e, eme i taneh mesawang.* I je ia ibere pangan sedekah sada masa, dua masa, ras setengah masa.* 15  Kenca si e, isemburken nipe e arah babahna nari lau si bali bagi lau mbelin* ku diberu e, gelah mombak diberu e. 16  Tapi diberu e isampati doni. Ibuka doni babahna, jenari ibendutna lau si isemburken naga e. 17  Emaka merawa kel naga e man diberu e. Lawes me naga e erperang guna ngelawan anak-anak* diberu e si sisa denga, eme kalak si patuh man perentah Dibata ras si ngaloken dahin guna ersaksi kerna Jesus.

Cataten kaki

Taneh si mbelang si jarang iingani.
Ertina, “Ise si bali bagi Dibata?”
Taneh si mbelang si jarang iingani.
Maksudna, telu setengah masa.
Ntah “sungai.”
As. “benih.”