Ketangkasen 11:1-19

  • Dua saksi (1-13)

    • Ernubuat sedekah 1.260 wari make uis guni (3)

    • Ibunuh janah ipediat la ikuburken (7-10)

    • Ipegeluh kenca telu setengah wari (11, 12)

  • Cilaka peduaken lewat, cilaka peteluken nandangi reh (14)

  • Trompet pepituken (15-19)

    • Kerajan Tuhanta ras KristusNa (15)

    • Ikernepken me kalak si ncedai doni (18)

11  Kenca si e, man bangku ibereken sada buluh si bali bagi tongkat, janah nina, “Laweslah, ukurlah* ingan si badia i rumah pertoton Dibata, bage pe batar-batar persembahen. Hitunglah piga kalak si sangana ersembah i bas.  Tapi, ula ukurndu* halamen si arah darat ingan si badia e, pediat saja i je sebap bagin si e nggo ibereken man bangsa-bangsa janah iperjakina pagi kota si badia e sedekah 42 bulan.  Kusuruh pagi dua kalak saksiku make kain guni guna ernubuat sedekah 1.260 wari.”  Saksi si dua e me si imaksud dua batang saitun ras dua nahe lampu. Kalak e tedis i lebe-lebe Tuan si erkuasa nandangi doni.  Adi lit kalak si atena niksa saksi si dua e, ndarat me api arah babahna nari janah ibendutna musuh-musuhna e. Ise pe si atena niksa kalak e, ibunuh me ia bagi cara si ndai.  Duana saksi e lit kuasana guna nutupi langit gelah la nusur udan sedekah kalak e ernubuat. Lit ka kuasana guna ngubah lau jadi dareh, janah erban erbage-bage bencana ku doni. Katawari pe banci ilakokenna si e sue ras sura-surana.  Kenca dung kalak e ersaksi, ndarat me binatang si merawa arah lubang si seh kel bagesna guna nerang, naluken, janah munuh kalak e.  Mayat kalak e ipediat ampar i pasar si galang i kota si mbelin, ingan Tuan kalak e ibunuh i tiang. Kota e iumpamaken gelarna Sodom ras Mesir.  Manusia arah erbage suku, bahasa, ras bangsa ngidah mayat kalak e sedekah telu setengah wari, janah la iberekenna mayat kalak ndai itamaken ku bas kuburen. 10  Erkiteken nggo mate dua saksi si ernubuat ras si niksa kalak si tading i doni e, ermeriah ukur me kalak si tading i doni, erpesta kalak e, ras mereken hadiah sada ras si debanna. 11  Kenca telu setengah wari, iembusken Dibata kesah kegeluhen ku kalak e. Jenari tedis kalak e, janah mbiar kel kalak si ngidahsa. 12  Ibegi saksi si dua e sora si megang i langit nari ngerana man bana, nina, “Marilah ku datasken.” Sanga kalak e nangkih ku langit i bas embun, itatap musuh-musuhna kalak e. 13  Paksa si e, terjadi gempa si megegeh. Akibatna, hancur me sepersepuluh bagin kota e janah lit 7.000 kalak si mate. Mbiar kel jelma si debanna janah imuliakenna Dibata si i surga. 14  Cilaka si peduaken nggo lewat. Tapi nenlah! Minter me reh cilaka si peteluken. 15  Iembus malekat si pepituken trompetna. Jenari terbegi me sora-sora si megang i langit nari, nina, “Kerajan Tuhanta ras KristusNa nggo merentah manusia, janah merentah me Ia jadi raja rasa lalap seh rasa lalap.” 16  Kenca si e, pertua-pertua si 24 e kundul i tahtana i lebe-lebe Dibata, erjimpuh kalak e nembah man Dibata, 17  janah nina, “O Jahwe Dibata, Si Madakuasa, si mbarenda nari nggo lit bage pe gundari. Bujur ikataken kami man baNdu sebap nggo ipakeNdu kuasaNdu si mbelin, janah nggo mulai Kam merentah jadi raja. 18  Tapi, bangsa-bangsa jadi merawa, dungna Kam pe jadi merawa. Emaka seh me waktu si itetapken guna nghakimi kalak mate janah mereken upah man budak-budak si ernubuat, bage pe man kalak si badia, man kalak si mbiar man gelarNdu si termasuk kalak si biasa-biasa saja ras kalak si penting. I bas paksa si e pe, ikernepkenNdu me kalak si ncedai doni.” 19  Kenca si e, terbuka me ingan si badia i rumah pertoton Dibata si i surga, janah peti perjanjin teridah i bas ingan si badia e. Jenari, terbegi sora-sora, sora lenggur, reh kilat, terjadi gempa, bage pe udan es si luar biasa.

Cataten kaki

Ntah “sibarilah.”
Ntah “sibarindu.”