Ketangkasen 10:1-11

  • Malekat si megegeh njemak gulungen kitik (1-7)

    • “Waktuna lanai bo itunda” (6)

    • Rahasia si badia nandangi terjadi (7)

  • Ipan Johanes gulungen si kitik (8-11)

10  Kuidah malekat si deban si megegeh nusur i surga nari. Malekat e itutupi embun, janah i datas takalna lit pelangi. Ayona bali bagi matawari janah nahena bali bagi tiang api.  I bas tanna lit gulungen kitik si terbuka. Nahena si kanan merjak lawit, janah nahena si kiri merjak daraten.  Jenari ngerana ia alu sora megang bali bagi singa si erngaung. Sanga ia ngerana, kubegi pitu lenggur si ngerana.  Sanga ngerana pitu lenggur e, kutulisken ateku, tapi kubegi sora arah langit nari, nina, “Rahasiakenlah* kai si ikataken pitu lenggur e, janah ula tulisken.”  Jenari, malekat si kuidah tedis i lawit ras daraten e ngangkat tan kananna ku langit,  janah ersumpah ia i bas gelar Dibata si nggeluh rasa lalap seh rasa lalap, Si njadiken langit ras kerina isina, doni ras kerina isina, bage pe lawit ras kerina isina. Nina malekat e, “Waktuna lanai bo itunda.*  Tapi sanga menam iembus malekat si pepituken trompetna, nandangi terjadi me rahasia si badia Dibata. Enda me rahasia si badia si ipeseh Dibata jadi berita si meriah man budak-budakNa, eme nabi-nabi.”  Jenari kubegi ka sora i langit nari, nina, “To buat gulungen si terbuka i bas tan malekat si tedis i bas lawit ras i daraten.”  Lawes me aku janah kudahi malekat e, jenari kupindoken gelah iberekenna gulungen si kitik e man bangku. Nina man bangku, “Buatlah jenari pan ngayak keri, janah ibanna kari beltekndu jadi pagit, tapi i bas babahndu ntebu bagi madu.” 10  Kubuat gulungen si kitik e arah tan malekat e nari, jenari kupan. I bas babahku ntebu nanamna bagi madu. Tapi kenca kubendut, berubah jadi pagit i bas beltekku. 11  Kenca si e, ikatakenna man bangku, “Arus kam ernubuat denga kerna manusia, bangsa-bangsa, bahasa-bahasa, bage pe kerna raja-raja.”

Cataten kaki

As. “Meteraikenlah.”
Ntah “icuncun.”