Judas 1:1-25

  • Salam (1, 2)

  • Guru-guru palsu pasti ihakimi (3-16)

    • Erjengil Mikael ras Iblis (9)

    • Nubuat Enoh (14, 15)

  • Tetaplah kena i bas kekelengen Dibata (17-23)

  • Ngakui kemulian Dibata (24, 25)

 I bas Judas nari, sekalak budak Jesus Kristus ras senina Jakup. Surat enda man kalak si ipilih, si ikelengi Dibata eme Bapakta janah ilindungi guna Jesus Kristus:  Mbera reh belinna perkuah ate, kedamen, ras kekelengen si idat kena.  Turang senina si kukelengi, situhuna ateku nulisken surat man kena kerna keselamaten si nggo radu kita ndatkenca. Tapi pentingen kuakap nulisken surat si ngiahken kena, guna mperjuangken kiniteken si nggo ibereken man kerina kalak si badia sekali seh rasa lalap.  Sebap lit piga-piga kalak si nggo masuk ku tengah-tengah kena si mbarenda nari nggo itentuken Kitap si Badia guna iukum. Kalak enda me si la nghamati Dibata, perban ibanna lias ate Dibatata si mbelin jadi alasen guna ngelakoken perbahanen si la meteh mela.* Kalak e terbukti la setia man Tuanta, Jesus Kristus.  Aminna pe nggo iteh kena kerina enda, kuingetken ateku kena maka kenca iselamatken Jahwe umatNa i Mesir nari, ikernepkenNa me kalak si la erkiniteken.  Janah lit malekat-malekat si nadingken dahinna ras inganna si arusna i surga. Igariken Dibata ia kerina seh rasa lalap i bas ingan si seh kel gelapna guna ihakimi i bas wari si mbelin.  Bage ka pe, Sodom, Gomora, ras kota-kota si lit i sekelilingna ngelakoken perbahanen seks si salah* janah ngayaki kerincuhen daging si la patut. Kalak e iukum alu api si la banci mate janah enda jadi persinget man banta.  Aminna pe bage, kalak si masuk ku tengah-tengah kena e meriah iakapna mbayangken kai si la mehuli, erdosa man dagingna, la iergaina kalak si minpin ia, janah ihinana kalak si mulia.  Sanga Mikael, peminpin malekat, erjengil ras Iblis kerna mayat Musa, la ia pang nghakimi Iblis alu kata-kata si kasar, tapi nina, “Jahwe sajalah si nghakimi* kam.” 10  Ihina kalak si masuk ku tengah-tengah kena e kerina si la iangkaina. Perukuren ras kerina perbahanenna bali kap ras binatang. Enda me si ncedai kalak e. 11  Cilaka me kalak e, sebap iusihna Kain janah kurang ter akapna ngusih perbahanen Bileam si salah guna ndatken upah. Janah ikernepken me kalak e erkiteken rananna si mberontak bagi Korah! 12  Kalak e ikut bas acara man-man si iban kena guna mbuktiken kekelengenna man turang senina. Situhuna kalak e bali bagi batu si terbuni i bas lau, bagi permakan-permakan si mentingken beltekna saja si la mbiar man Dibata. Bali bagi embun si iembus angin ku jah ku je tapi la ngerehken udan. Bali bagi batang kayu si la erbuah bas musimna, si nggo tuhu-tuhu mate* janah iruah seh ku uratna. 13  Bali bagi galumbang si galang si rugup i lawit si ncidahken perbahanenna si man kemelanken. Janah bali bagi bintang-bintang si la erdalan bas dalanna, si nggo itetapken bas ingan si seh kel gelapna seh rasa lalap. 14  Enoh kesusuren Adam si pepituken, ernubuat kerna kalak e, nina, “Nenlah! Reh Jahwe ras puluhen ribu malekatNa si badia, 15  guna nghakimi kerina kalak janah ngukum kerina kalak si erdosa si la nghamati Dibata, erkiteken jahat perbahanen kalak e janah ihina kalak e Dibata.” 16  Kalak si bage rusur jungut-jungut, la ia puas nandangi geluhna, sura-surana saja si ikutkenna, tual ngerana, ipuji-pujikenna kalak gelah datna keuntungen man dirina. 17  Tapi kena o turang senina si kukelengi, ingetlah kai si nggo pernah ikataken rasul-rasul Tuanta Jesus Kristus. 18  Mbarenda bagenda nina man kena, “I bas wari-wari pendungi pagi, lit kalak si nghina kena, si ngikutken sura-surana si la mehuli.” 19  Kalak enda si erban perpecahen janah kalak e bali bagi binatang, janah la lit kesah si badia i bas ia. 20  Tapi kena o turang senina, bangunlah kiniteken kena si badia e, janah ertotolah alu kesah si badia. 21  Alu bage, tetap kena i bas kekelengen Dibata, janah nimai perkuah ate Tuanta Jesus Kristus si mereken kegeluhen si rasa lalap. 22  Selain si e, teruslah buktiken perkuah ate kena man kalak si ragu-ragu 23  janah selamatken kalak e alu ngerintak ia ndarat i bas api nari. Teruslah rate mekuah man kalak si deban janah hati-hati. Segat ka min ate kena nandangi uisna si nggo melket erkiteken sura-sura dagingna si dem alu dosa. 24  Banci ilindungi Dibata kena gelah ula tertuktuk. Banci ibabaNa kena ku adep-adepenNa alu keriahen ukur si mbelin janah la erpandangen. 25  Ia ngenca Dibata, Juru Selamatta arah Jesus Kristus Tuanta. Ia ngenca si lit hakNa guna merentah janah man baNalah kemulian, gegeh, ras kuasa, mbarenda nari, gundari, janah seh rasa lalap. Amin.

Cataten kaki

As. aselgeia. Nen Kamus.
Bahasa Junani, porneia. Nen Kamus.
Ntah “mpersingeti.”
As. “mate dua kali.”