Johanes 20:1-31

  • Kuburen si kosong (1-10)

  • Jesus njumpai Maria Magdalena (11-18)

  • Jesus njumpai murid-muridna (19-23)

  • Tomas ragu tapi dungna tek (24-29)

  • Tujun gulungen enda (30, 31)

20  Pagi-pagi si lampas i bas wari pertama minggu e, lawes Maria Magdalena ku kuburen Jesus. Paksa si e, lenga terang wari. Kenca seh i kuburen, idahna batu si nutup kuburen e nggo igulingken.  Emaka kiam ia ndahi Simon Petrus bage pe murid si deban si ikelengi Jesus, janah nina, “Enggo ibuat kalak mayat Tuan i bas kuburen nari janah la iteh kami i ja ia itamakenna.”  Emaka berkat Petrus ras murid e ku kuburen.  Kiam ia duana, tapi murid si deban e pedasen asangken Petrus, emaka leben ia seh ku kuburen.  Sanga itungkirna ku bas kuburen, idahna uis linen ampar i je, tapi la ia masuk ku bas.  Dungna seh ka me Simon Petrus, jenari masuk ia ku bas kuburen. Idahna uis linen ampar i je.  Uis si ibalutken ku takal Jesus igulung tapi la ersada ras uis si mbaluti mayatna.  Jenari murid-murid si deban si leben ndai seh i bas kuburen e, masuk ka ia ku bas. Kenca idahna, tek ia.  Tapi lenga iangka kalak e ayat si ngataken maka Jesus ipekeke pagi i bas si mate nari. 10  Emaka mulih me murid-murid e ku rumahna. 11  Tapi Maria cinder denga i deher kuburen janah tangis. Janahna tangis, itungkirna ku bas kuburen, 12  idahna dua malekat si make uis mbentar, sangana kundul i bas ingan mayat Jesus iamparken, sekalak arah ingan takalna, sekalak nari arah ingan nahena. 13  Isungkun malekat-malekat e Maria, “Engkai kam tangis?” Ijawap Maria, “Lit si muat mayat Tuanku, janah la kuteh i ja ibanna.” 14  Kenca bage nina, itulihkenna janah idahna Jesus tedis i je, tapi la itehna maka Jesus kap si idahna e. 15  Nina Jesus man bana, “Engkai kam tangis? Ise si idaramindu?” Perban iakap Maria maka dilaki e tukang kebun, nina Maria bana, “O Pa, adi kam kin si muat mayatna, tolong kataken man bangku i ja itamakenndu, gelah kulegi ku je.” 16  Nina Jesus man bana, “O Maria!” Itulihken Maria, jenari ngaloi ia i bas bahasa Heber, “Rabuni!” (si ertina “Guru!”) 17  Nina Jesus, “Ula lalap aku tagangindu, perban lenga bo kudahi Bapak. Laweslah, jumpailah senina-seninaku janah kataken man kalak e, ‘Lawes me aku ndahi Bapakku bage pe Bapak kena, ndahi Dibataku bage pe Dibata kena.’” 18  Emaka lawes Maria Magdalena janah katakenna man murid-murid, “Enggo kuidah Tuan!” Jenari, iceritakenna man kalak e kerna kai si nggo ikataken Jesus bana. 19  Paksa nggo berngi, i bas wari pertama bas minggu e, pulung murid-murid janah ikuncina pintu-pintu perban mbiar kalak e man kalak Jahudi. Jenari reh Jesus janah cinder i tengah-tengah kalak e, nina, “Mbera lit kedamen i bas kena.” 20  Kenca bage nina, icidahkenna duana tanna ras tulan rangrangna. Meriah kel ukur murid-murid ngidah Tuan. 21  Nina Jesus ka, “Mbera lit kedamen i bas kena. Aku nggo isuruh Bapak, emaka kena pe kusuruh ka nge.” 22  Kenca bage nina, iembusken Jesus kesahna man murid-murid e, jenari nina, “Alokenlah kesah si badia. 23  Adi iampuni kena dosa kalak, dosana pe nggo iampuni; adi la iampuni kena dosana, dosana e pe la iampuni.” 24  Tomas, sekalak i bas murid-murid si 12 e, si igelari ka si Kembar, la ikut paksa Jesus reh. 25  Emaka ikataken murid-murid si deban man Tomas, “Enggo idah kami Tuan!” Tapi nina Tomas, “Adi lenga kin kuidah bekas paku i bas tanna, janah adi lenga kin kutamaken jari-jariku ku je, bage pe adi lenga kin kujemak tulan rangrangna, labo aku tek.” 26  Waluh wari kenca si e, pulung ka murid-murid i bas rumah, janah Tomas pe ikut i je. Aminna pe pintu nggo ikunci, reh Jesus janah tedis i tengah-tengah kalak e, nina, “Mbera lit kedamen i bas kena.” 27  Jenari nina Jesus man Tomas, “Tamakenlah jari-jarindu ku jenda, nenlah tanku, janah jemaklah tulan rangrangku. Ula nai kam ragu, tapi teklah.” 28  Ngaloi Tomas, “O Tuanku ras Dibataku!” 29  Nina Jesus bana, “Perban nggo idahndu nge aku maka kam nggo tek? Ermeriah ukurlah kalak si tek aminna pe lenga idahna.” 30  Tuhu melala denga mukjizat si iban Jesus i lebe-lebe murid-murid, tapi la itulisken i bas gulungen enda. 31  Tapi si enda itulisken gelah tek kena maka Jesus kap Kristus, Anak Dibata. Alu bage, banci ialoken kena kegeluhen arah gelarna.

Cataten kaki