Johanes 18:1-40

  • Judas nghianati Jesus (1-9)

  • Igunaken Petrus pedang (10, 11)

  • Jesus ibaba ku Annas (12-14)

  • Petrus mersoken Jesus, si pertama (15-18)

  • Jesus i lebe-lebe Annas (19-24)

  • Petrus mersoken Jesus, si peduaken ras si peteluken (25-27)

  • Jesus i lebe-lebe Pilatus (28-40)

    • “Kerajanku labo bagin i bas doni enda” (36)

18  Kenca dung Jesus ertoto, lawes ia ras murid-muridna ku sada taman i sebrang Lembah Kidron.  Judas, kalak si nghianati Jesus pe meteh ingan e, perban nggo rusur Jesus pulung i je ras murid-muridna.  Emaka ibaba Judas sada pasuken tentera ras piga-piga petugas si isuruh imam-imam kepala bage pe kalak Parisi. Ibaba kalak e obor, lampu semprong, ras senjata.  Enggo iteh Jesus kerina si nandangi terjadi man bana, emaka ku lebe ia janah nina, “Ise daramen kena?”  Ngaloi kalak e, “Jesus kalak Nasaret.” Nina Jesus, “Aku kap katandu e.” Judas, si penghianat e pe cinder ras kalak e.  Tapi, sanga ikataken Jesus, “Aku kap katandu e,” mundur kalak e janah ndabuh ku taneh.  Emaka isungkun Jesus ka mulihi, “Ise daramen kena?” Ijawap kalak e, “Jesus kalak Nasaret.”  Nina Jesus, “Nggo kukataken man kena maka aku kap jelmana. Emaka adi aku kin si idarami kena, pediat kalak enda lawes.”  Bage nina gelah terjadi kata-kata si nggo pernah ikatakenna, “Kalak si iserahkenna man bangku, sada pe la bene.” 10  Jenari ibuat Simon Petrus pedangna, iserangna budak imam si mbelin, retap ibanna cupingna si arah kanan. Gelar budak e Malkus. 11  Tapi nina Jesus man Petrus, “Masukken pedangndu ena ku inganna. La kin arus aku minem arah calung* si ibereken Bapakku man bangku?” 12  Jenari prajurit-prajurit, komandan tentera, bage pe petugas-petugas kalak Jahudi nangkap Jesus janah iiket kalak e ia. 13  Tangtangna ibaba kalak e ia ku Annas. Si Annas, eme mama Kayapas, ia imam si mbelin i bas tahun e. 14  Kayapas enda me si pernah mereken pedah man kalak Jahudi maka padin sekalak jelma mate guna sada bangsa. 15  Simon Petrus ras sekalak murid si deban ngikutken Jesus. Murid e itandai imam si mbelin, emaka masuk murid e ras Jesus ku halamen rumah imam si mbelin, 16  tapi Petrus cinder i darat, i deher pintu masuk. Emaka ndarat me murid si itandai imam si mbelin ndai, ngerana ia man diberu si njaga pintu jenari ibabana Petrus masuk. 17  Kenca si e, nina si njaga pintu e man Petrus, “La kin kam pe muridna ka nge?” Ngaloi Petrus, “Lang.” 18  Erkiteken mbergeh kel wari, cudu me piga-piga budak ras petugas-petugas i deher api si iban kalak e. Petrus pe cudu ka i je. 19  Emaka isungkuni imam kepala me Jesus kerna murid-muridna ras kerna kai si iajarkenna. 20  Ngaloi Jesus, “Enggo ngerana aku i lebe-lebe jelma si nterem. Rusur aku ngajar i bas ingan pulung kalak Jahudi* bage pe i bas rumah pertoton, eme ingan kerina kalak Jahudi pulung, janah la pernah aku erbuni-buni ngerana. 21  Jadi, ngkai maka isungkunindu aku? Sungkunlah kalak si nggo pernah megi kata-kataku e. Pasti iteh kalak e kai si kukataken.” 22  Kenca bage nina Jesus, iparap sekalak petugas si cinder i je ia, janah nina, “Bage kin carandu njawap imam kepala?” 23  Ngaloi Jesus, “Adi lit kin si salah i bas pengeranaku, katakenlah i ja salahna. Tapi adi kai si kukataken e tuhu, ngkai maka iparapndu aku?” 24  Jenari isuruh Annas gelah Jesus ibaba ku Kayapas, imam si mbelin e. Paksa si e Jesus iiket denga. 25  Simon Petrus tedis denga i je i deher api janahna cudu. Emaka nina kalak si deban man bana, “La kin kam pe muridna ka nge?” Tapi merso Petrus, nina, “Lang.” 26  Jenari ngerana sekalak budak imam si mbelin, eme kade-kade si nggo retap cupingna iban Petrus, “La kin kam si kuidah ras ia i bas taman?” 27  Tapi ipersoken Petrus ka sekali nari. Kenca bage, minter tekuak manuk. 28  Kenca terang wari, paksa erpagi-pagi si lampas, ibaba kalak e Jesus arah rumah Kayapas nari ku rumah gubernur. Tapi kalak e la nggit masuk ku rumah gubernur e, gelah ula kalak e jadi cemar janah banci ikut man pangan Paskah. 29  Emaka ndarat Pilatus njumpai kalak e, janah isungkunna, “Kai kin tuduhen kena man dilaki enda?” 30  Ijawap kalak e, “Labo iserahken kami dilaki enda man bandu adi la lit salahna.”* 31  Nina Pilatus, “Kena sajalah si maba ia janah adililah ia menurut undang-undang kena.” Ijawap kalak Jahudi, “La kap lit hak kami guna munuh ise pe.” 32  Alu bage, terjadi me kai si ikataken Jesus kerna uga carana ia mate. 33  Emaka masuk ka Pilatus ku rumah gubernur, janah ilebuhna Jesus nina, “Kam kin Raja Kalak Jahudi?” 34  Ijawap Jesus, “I bas ukurndu nari kin penungkunenndu enda, ntah lit si ngatakenca man bandu kerna aku?” 35  Nina Pilatus, “Me labo aku kalak Jahudi? Bangsandu ras imam-imam kepala nge si nerahken kam man bangku. Kai kin si nggo ilakokenndu?” 36  Ijawap Jesus, “Kerajanku labo bagin i bas doni enda nari. Adi Kerajanku bagin i bas doni enda nari, pasti nggo iperjuangken pengikut-pengikutku gelah ula aku iserahken man kalak Jahudi. Tapi, Kerajanku labo bagin i bas doni enda nari.” 37  Isungkun Pilatus ka ia, “Adi bage, raja dage kam?” Ijawap Jesus, “Kam sendiri si ngatakenca maka aku raja. Arus kubereken kesaksin kerna kebenaren, perban guna si e me aku ilahirken janah reh ku doni enda. Tiap kalak si ngikutken kebenaren, ibegikenna nge soraku.” 38  Isungkun Pilatus ka ia, “Kai kin kebenaren e?” Kenca bage nina, ndarat ka Pilatus njumpai kalak Jahudi, janah nina, “Labo lit kudat salah dilaki enda. 39  Tapi menurut kebiasan kena, arus kubebasken sekalak tahanen tiap Wari Paskah. Jadi, nggit nge kena adi kubebasken Raja Kalak Jahudi enda?” 40  Ijawap kalak e alu sora si megang, nina, “Ula bebasken dilaki ena. Barabas sajalah bebasken!” Barabas e sekalak perampok.

Cataten kaki

Ntah “cangkir.” Enda ngertiken peraten Dibata guna mpediat Jesus mate alu tuduhen ihinana Dibata.
As. “sinagoga.” Nen Kamus.
Ntah “adi la kin ia penjahat.”