Johanes 17:1-26

  • Toto Jesus si terakhir ras rasul-rasulna (1-26)

    • Perlu nandai Dibata guna ndatken kegeluhen si rasa lalap (3)

    • Kalak Kristen labo bagin doni enda (14-16)

    • “KataNdu kap kebenaren” (17)

    • “Enggo kuban gelarNdu itandai” (26)

17  Kenca ikataken Jesus kerina si e, itatapna langit janah nina, “O Bapak, gundari nggo seh waktuna. Muliakenlah anakNdu gelah imuliaken anakNdu ka Kam.  Enggo iberekenNdu kuasa man bana nandangi kerina manusia, gelah iberekenna kegeluhen si rasa lalap man kerina kalak si iberekenNdu man bana.  Adi itandai* kalak maka Kam ngenca Dibata situhu-tuhu, janah itandaina Jesus Kristus si isuruhNdu, ialokenna me kegeluhen si rasa lalap.  Enggo kumuliaken Kam i doni enda, alu ndungi dahin si iberekenNdu man bangku.  O Bapak, gundari muliakenlah aku i adep-adepenNdu, bali bagi kemulian si lit bas aku sanga aku i sampingNdu ope lenga lit doni enda.  “Enggo kuban gelarNdu iteh kalak si lit i bas doni enda, si iberekenNdu man bangku. JangNdu kap kalak e, iberekenNdu kalak e man bangku, janah nggo ipatuhi kalak e kataNdu.  Gundari nggo iteh kalak e maka kerina si iberekenNdu man bangku rehna i bas Kam nari,  perban nggo kupeseh man kalak e kata si iberekenNdu man bangku janah nggo ialoken kalak e. Enggo iteh kalak e maka aku reh jadi wakilNdu janah nggo tek kalak e maka Kam kap si nuruh aku.  Aku ertoto guna kalak e, labo aku ertoto guna doni enda tapi guna kalak si nggo iberekenNdu man bangku perban kalak e jangNdu. 10  Kerina si lit i bas aku jangNdu kap, janah kerina si lit i bas Kam jangku kap. Aku nggo imuliaken i tengah-tengah kalak e. 11  “Lanai pagi aku i doni enda, tapi kalak e i doni enda, janah lawes ateku ndahi Kam. O Bapak si badia, jagalah kalak e guna gelarNdu si nggo iberekenNdu man bangku, gelah kalak e ersada bali bagi aku ersada ras Kam. 12  Sanga aku ras kalak e, kujaga lalap kalak e guna gelarNdu si nggo iberekenNdu man bangku. Enggo kujaga kalak e, janah sada pe la lit si kernep, selain ia si memang nandangi ikernepken, alu bage kai si nggo ikataken i bas ayat terjadi me. 13  Tapi gundari reh me aku ndahi Kam, janah kukataken kerna si enda i doni, gelah tuhu-tuhu igejapken kalak e keriahen ukurku. 14  Enggo kupeseh kataNdu man kalak e, tapi segat ate doni enda nandangi kalak e sebap kalak e labo bagin doni enda, bali bagi aku labo bagin doni enda. 15  “Labo kupindo gelah ibuatNdu kalak e i bas doni enda nari, tapi gelah ijagaNdu kalak e i bas si jahat* nari. 16  Kalak e labo bagin i bas doni enda, bali bagi aku labo bagin i bas doni enda nari. 17  Pebadiakenlah kalak e alu kebenaren. KataNdu kap kebenaren. 18  Bali bagi aku isuruhNdu ku doni enda, kusuruh ka kalak e ku doni enda. 19  Kupebadiaken diriku guna kalak e, gelah kalak e pe ipebadiaken alu kebenaren. 20  “Aku ertoto labo guna kalak e saja, tapi guna kalak si erkiniteken man bangku kenca ibegina kata-kata kalak e. 21  Alu bage, kerina kalak e jadi sada. O Bapak, bali bagi Kam ersada ras aku janah aku ersada ras Kam, kalak e pe ersada ras kita, gelah doni enda banci tek maka Kam kap si nuruh aku. 22  Enggo kubereken man kalak e kemulian si iberekenNdu man bangku, gelah kalak e jadi sada bali bagi kita pe sada. 23  Ersada aku ras kalak e, janah Kam ersada ras aku, gelah tuhu-tuhu kalak e ersada, alu bage banci iteh doni enda maka Kam si nuruh aku, janah keleng ateNdu kalak e bali bagi keleng ateNdu aku. 24  O Bapak, ateku min kalak si nggo iberekenNdu man bangku ersada ras aku i bas inganku, gelah idah kalak e kemulianku si nggo iberekenNdu man bangku, sebap keleng ateNdu aku ope lenga pe doni enda ijadiken. 25  O Bapak, Kam lalap adil. Memang la itandai doni enda Kam, tapi aku kutandai Kam janah kalak si iberekenNdu bangku enda nggo itehna maka Kam si nuruh aku. 26  Enggo kuban gelarNdu itandai kalak e janah terus kupetandaken, gelah icidahken kalak e kekelengen bali bagi kekelengen si icidahkenNdu man bangku, janah gelah ersada aku ras kalak e.”

Cataten kaki

I bas cakap Junani maksudna terus ilakoken usaha guna nandai.
Maksudna, Setan.