Jakup 5:1-20

  • Persinget man kalak bayak (1-6)

  • Ipasu-pasu Dibata kalak si megenggeng alu sabar (7-11)

  • Katakenlah “ue” adi ue (12)

  • Ertoto alu kiniteken mbelin kel pengaruhna (13-18)

  • Nampati kalak si erdosa gelah mulihken (19, 20)

5  Gundari, begikenlah kataku, o kalak bayak. Tangis ras ngandunglah kena erkiteken kiniseran si nandangi iadapi kena.  Erta kena nggo macik, janah paken kena nggo ipangani serangga.*  Emas ras pirak kena nggo karaten, janah karatna e jadi saksi maka kena nggo ersalah janah ipanganina me daging kena. Kai si isusun kena bali pagi bagi api i bas wari-wari pendungi.  Begikenlah! Kalak si erdahin guna mperani i bas juma kena terus nderkuh perban la ibereken kena upahna, janah sora nderkuhna e nggo seh ku cuping Jahwe, kepala pasuken surga.  Mewah kel geluh kena janah sibuk kena ndarami kesenangen nggeluh i doni enda. Ipebur kena diri* kena guna wari penggelehen.  Ihina janah ibunuh kena kalak si benar. La kin perban si e maka kena ilawan?  Dage o turang senina, sabarlah kena seh asa reh Tuan. Nenlah perjuma-juma, terus itimaina asil* si meherga i bas taneh nari. Sabar ia nimai musim perudan, mulai kin reh musim perudan e seh asa dung musim perudan.  Kena pe arus sabar. Petetaplah ukur kena, perban wari kerehen Tuan nggo ndeher.  O turang senina, ula kena sipandang-pandangen, gelah ula kena ihakimi. Nenlah! Hakim nggo cinder i lebe-lebe pintu. 10  O turang senina, ikutilah usihen nabi-nabi si ngerana i bas gelar Jahwe. Inanami kalak e kiniseran janah sabar ia. 11  Nenlah! Kalak si megenggeng e sikataken me ia si ermeriah ukur. Enggo ibegi kena kerna Jop si megenggeng janah idah kena pasu-pasu si ibereken Jahwe man bana, alu bage iteh kena maka Jahwe dem kekelengen ras perkuah ate si lembut. 12  O turang senina, ingetlah! I bas kerinana, si pentingna eme: Ula nai kena ersumpah. Ula kena ersumpah i bas gelar langit, ntah doni, ntah pe si debanna. Tapi katakenlah “Ue” adi ue janah “Lang” adi lang, alu bage kena labo ihakimi. 13  Lit kin i bas kena nari si sangana ngenanami kiniseran? Teruslah ia ertoto. Lit kin i bas kena nari si sangana ermeriah ukur? Endekennalah masmur guna muji Dibata. 14  Lit kin i bas kena nari si sakit? Daraminalah pertua-pertua i bas runggun, gelah itotoken janah iminaki kalak e ia i bas gelar Jahwe. 15  Pertoton si ibelasken alu kiniteken, banci erban kalak si sakit* jadi sehat, janah sehat me ia iban Jahwe. Selain si e, adina nggo kin ilakokenna dosa, iampuni me ia. 16  Emaka siakun dosalah kena alu terus terang janah totoken kenalah sada ras si debanna gelah kena ipepalem. Toto kalak si benar, mbelin kel pengaruhna. 17  Elia pe seri nge perasanna ras kita, tapi sanga tutus atena ertoto gelah ula nusur udan, la reh udan i bas negeri e telu setengah tahun dekahna. 18  Kenca ertoto ka ia mulihken, reh udan i langit nari, jenari taneh mereken asilna.* 19  O turang seninaku, adi lit i bas kena si papak arah kebenaren nari, janah isampati kalak si deban ia gelah mulihken, 20  kalak si nampati kalak si erdosa e gelah mulihken ku dalan si benar, iselamatkenna kap kalak si erdosa e arah kematen nari janah ibanna dosana si melala e iampuni.

Cataten kaki

Ntah “nget-nget.”
As. “pusuh.”
As. “buah.”
Ntah banci saja “si latih.”
As. “buahna.”