Jakup 3:1-18

  • Erban dilah jadi melemuk (1-12)

    • Labo kerina si arus jadi guru (1)

  • Kepentaren si rehna surga nari (13-18)

3  O turang seninaku, labo kerina kena arus jadi guru. Bagi si nggo iteh kena, kalak si jadi guru, beraten kap pagi penghakimenna.  Kerina kita rusur erban salah.* Adi lit kalak si la pernah salah i bas ngerana, sempurna kap ia janah banci ikuasaina dirina.  Adi siban sangam bas babah kuda gelah patuh ia man banta, kita kap si ngkuasai kuda e.  Bage pe kerna kapal. Aminna pe kapal e galang kel janah iembus angin si meter, banci iatur juru mudi dalanna ku japa pe alu kemudi si seh kel kitikna.  Bage ka pe kerna dilah. Dilah eme bagin si kitik i bas dagingta, tapi banci ia tual ngerana. Kerangen si mbelang banci itutung alu api si seh kel kitikna!  Dilah pe bali ras api. Dilah eme bagin dagingta si dem alu kejahaten, perban banci inajiskenna kerina dagingta janah ikernepkenna kegeluhenta, bali bagi Gehena.*  Manusia ngasup erban kerina binatang jadi melemuk, janah nggo ibanna melemuk binatang si merawa, perik, binatang si njoler,* bage pe si lit i bas lawit.  Tapi ise pe la ngasup pelemuk dilah. Dilah e berbahaya janah la terkuasai, dem racun si maba kematen.  Dilah e sipake guna muji Jahwe, Bapakta. Tapi sipake ka guna numpahi kalak si deban, si nggo iciptaken “bali ras sipat Dibata.” 10  Arah babah si seri, sibereken pujin janah sisumpahi ka kalak. O turang seninaku, si enda kerina arusna la terjadi. 11  Banci kin ndarat lau si entebu ras lau si pagit arah sada sumber lau si seri? 12  O turang senina, me labo banci batang ara nghasilken buah saitun, janah batang anggur nghasilken buah ara? Sumber lau si masin pe labo banci ngasilken lau si entebu. 13  Ise i bas kena nari si pentar ras erpengangka? Arus ibuktikenna maka perbahanenna mehuli, janah kepentarenna e erban ia ngelakoken kerinana alu lembut. 14  Tapi adi lit ate cian i bas pusuh kena janah nggit rubati,* ula megah kap kena kerna kepentaren kena e, janah ula erbual. 15  Kepentaren enda labo rehna arah surga nari, tapi arah doni si sipatna bagi binatang ras malekat jahat. 16  I ja lit cian ate ras nggit rubati,* i je lit keadan si kacau janah erbage-bage kejahaten. 17  Tapi kepentaren si rehna arah surga nari, si pertama eme bersih, jenari nggit erdame, masuk akal, patuh, dem perkuah ate janah ngelakoken si mehuli, la mbeda-bedaken, la munapik. 18  Selain si e, buah perbahanen si mehuli isuan* i bas keadan si dame man kalak si ngena atena kedamen.

Cataten kaki

As. “rusur tertuktuk.”
Nen Kamus.
Ntah “merayap.”
Ntah banci saja “mentingken bana.”
Ntah banci saja “mentingkan bana.”
Ntah banci saja “isuan kalak si ngena atena kedamen i bas keadan si dame.”