Jakup 2:1-26

  • Sipat erpilihen, dosa kap (1-13)

    • Kekelengen eme undang-undang raja (8)

  • Kiniteken si la rikutken perbahanen mate kap (14-26)

    • Malekat-malekat jahat tek janah nggirgir (19)

    • Abraham igelari teman Jahwe (23)

2  O turang seninaku, cocok kin akap kena erkiniteken man Tuanta Jesus Kristus si mulia janahna erpilihen kena man si deban?  Bicara reh kalak ku perpulungen kena alu make mbue cincin emas ras make paken si mehaga, janah lit ka kalak mesera si reh alu make paken si mejin,  hamaten nge kena man kalak si make paken si mehaga janah ning kena, “Mari kundulken i jenda i bas ingan si mehulina,” jenari ning kena ka man kalak si mesera, “Cinderken saja jena” ntah, “Kundul saja kam i jah, i deher naheku”?*  Adi bage perbahanen kena, la kin ibeda-bedaken kena kalak, janah kena jadi hakim si erban keputusen si jahat?  O turang senina si kukelengi, begikenlah. La kin nggo ipilih Dibata kalak si mesera menurut doni enda, gelah jadi kalak bayak ia i bas kiniteken ras idatna Kerajan si nggo ijanjikenNa man kalak si ngkelengi Ia?  Tapi megombang* kena man kalak si mesera. La kin isiksa kalak bayak nge kena janah ibabana ku pengadilen?  La kin ihina kalak e gelar kena si mehuli?  Adi ilakoken kena undang-undang raja si sentudu ras ayat enda, “Arus ikelengindu kalak si deban bagi kam ngkelengi dirindu,” mehuli kap si ilakoken kena e.  Tapi adi lalap ibeda-bedaken kena kalak, kena nggo erdosa janah menurut undang-undang, kena nggo ersalah. 10  Adi lit sada Undang-Undang Musa si la ipatuhi, kerina undang-undang e nggo ilanggarna. 11  Nina Dibata, “Ula erlua-lua,” janah nina ka, “Ula munuh.” Adi kena la erlua-lua tapi munuh, nggo ilanggar kena undang-undang. 12  Teruslah ngerana janah teruslah lakoken perbahanen bagi kalak si nandangi ihakimi menurut undang-undang kalak si bebas. 13  Kalak si la rate mekuah, ihakimi me pagi alu la lit perkuah ate. Perkuah ate belinen asangken penghakimen. 14  O turang seninaku, kai nge gunana adi sekalak jelma ngaku erkiniteken, tapi la teridah arah perbahanenna? Me labo banci iselamatken kinitekenna ia? 15  Adi sekalak senina ntah pe turang la lit pakenna janah la lit panganna i bas wari e, 16  kai gunana ikataken kena man bana, “Mbera sehat-sehat kam. Pake pakenndu gelah ula kam bergehen, besuri man,” tapi la ibereken kena kai si iperlukenna? 17  Bage me kiniteken. Adi kiniteken la rikutken perbahanen, mate kap. 18  Tapi banci saja lit si ngataken, “Kam lit kinitekenndu, janah aku lit perbahanenku. Cidahkenlah kinitekenndu si la rikutken perbahanen, janah kucidahken kinitekenku arah perbahanenku.” 19  Me tek nge kam maka sada ngenca Dibata? Merandal! Malekat-malekat jahat pe tek man baNa janah nggirgir ia. 20  Tapi kam o kalak si motu, nggit nge kam ngakui maka kiniteken si la rikutken perbahanen e sia-sia? 21  Ukuri kerna Abraham, bapakta. Ikorbankenna anakna Isak i datas batar-batar persembahen. La kin ia ikataken benar erkiteken perbahanenna e? 22  Jelas me, kinitekenna rikutken perbahanen, janah arah perbahanenna e, kinitekenna jadi sempurna. 23  Alu bage terjadi me ayat enda, “Abraham erkiniteken man Jahwe, emaka perban kinitekenna e, ia ikataken kalak si benar.” Ia igelari teman Jahwe. 24  Gundari nggo iangka kena maka sekalak jelma ikataken benar erkiteken perbahanenna, labo ngenca erkiteken kinitekenna. 25  Bage ka me kerna Rahap, diberu si dahinna jadi pelacur. Kenca ialo-alona mata-mata ku rumahna alu mehuli janah isampatina lawes arah dalan si deban, la kin ia ikataken benar erkiteken perbahanenna e? 26  Emaka bali bagi daging si la rikutken kesah, mate kap. Bage ka me kiniteken si la rikutken perbahanen, mate kap.

Cataten kaki

Ntah “i keset kaki.”
Ntah “ihina.”