Heber 6:1-20

  • Teruslah usahaken gelah jadi dewasa (1-3)

  • Anak Dibata ipakuken ka (4-8)

  • La sangsi nandangi arapen (9-12)

  • Janji Dibata pasti terjadi (13-20)

    • Janji ras sumpah Dibata la pernah berubah (17, 18)

6  Gundari, kenca nggo dung sipelajari ajaren dasar kerna Kristus, teruslah siusahaken gelah jadi dewasa, janah ula nai kita mulihken ku ajaren dasar, eme ajaren kerna pertobaten* arah perbahanen si sia-sia, kerna kiniteken man Dibata,  kerna peridin ras kerna namaken tan ku datas kalak, kerna kekeken kalak si mate bage pe penghakimen si rasa lalap.  Enda me si nandangi silakoken adi kin ipediat Dibata.  Kalak si mbarenda nggo iterangi, si nggo nggejapken pemere i bas surga nari, si nggo ikut ngaloken kesah si badia,  janah si nggo nggejapken berita Dibata si mehuli bage pe pasu-pasu* i jaman* si nandangi reh,  tapi gundari nggo itulak kalak e ajaren kebenaren, emaka labo mungkin kalak enda isampati gelah sadar mulihi guna ertobat, perban ipakuken kalak e ka sekali nari Anak Dibata i bas tiang janah ipemelana i lebe-lebe jelma si nterem.  Taneh ndatken pasu-pasu i bas Dibata nari sanga ialokenna lau udan si rusur nusur ku datasna janah ihasilkenna sinuan-sinuan si erguna man si nuansa.  Tapi adi si ihasilken taneh e peren si erduri ras dukut-dukut, taneh e lanai erguna janah mis nge isumpahi, dungna itutung.  O turang senina si ikelengi, aminna pe bage ning kami, tek kami maka ulin keadan kena asangken kalak e, janah ilakoken kena kai pe si lit hubungenna ras keselamaten. 10  Dibata labo la adil, emaka labo ilupakenNa perbahanen kena bage pe kekelengen si ibuktiken kena guna gelarNa alu ngelayani ras terus ngelayani kalak si badia. 11  Aminna pe bage, iarapken kami gelah kerina kena tetap rajin bali bagi sedekah enda, gelah la kena sangsi nandangi arapen kena seh ku kedungenna. 12  Janah gelah ula kena jadi kisat, tapi usihlah kalak si ndatken warisen si ijanjiken Dibata perban kalak e erkiniteken janah sabar. 13  Sanga erjanji Dibata man Abraham, ersumpah Ia i bas gelarNa sendiri erkiteken la lit ise pe si terbelinen asangken Ia, 14  nina, “Pasti Kupasu-pasu kam pagi. Pasti Kuban nterem kel kesusurenndu.” 15  Emaka kenca sabar Abraham nimai, ialokenna janji e. 16  Manusia ersumpah i bas gelar kalak si belinen asangken ia, janah sumpah kalak e ndungi tiap permasalahen, erkiteken sumpah kalak e jadi jaminen si sah man kalak e. 17  Bage ka pe, sanga iperjelas Dibata man ahli waris janji e maka peratenNa labo mungkin berubah, ijaminNa si e alu sumpah. 18  Duana enda la pernah berubah janah Dibata la mungkin erbual kerna si e. Emaka kita si nggo kiam ku ingan perlindungen, banci alu paguh sijemak arapen si lit i lebe-lebeta. 19  Arapenta e pasti ras paguh, bali bagi jangkar bas geluhta, janah ibabana kita masuk ku pudi tirai e, 20  janah i je nggo lit si leben masuk guna kepentingenta, eme Jesus si nggo jadi imam si mbelin bali bagi Malkisedek guna rasa lalap.

Cataten kaki

Ntah “jera dingen robah.”
As. “kuasa.”
Ntah “doni.” Nen Kamus.