Heber 5:1-14

  • Ganjangen Jesus asangken imam si mbelin (1-10)

    • Imam si bali bagi Malkisedek (6, 10)

    • Erlajar patuh arah kiniseran (8)

    • Mereken keselamaten si rasa lalap (9)

  • Ula mulihken jadi kalak si merluken susu (11-14)

5  Tiap imam si mbelin si rehna i tengah-tengah manusia nari, ipilih guna kepentingen manusia, eme guna ngurus kai pe si lit hubungenna ras Dibata, gelah banci ipersembahkenna persembahen ras korban guna dosa.  Sekalak imam si mbelin banci rate mekuah man kalak si kurang pemetehna ras si erban salah, erkiteken ia pe ngadapi kelemahenna sendiri.  Eme sebapna arus ipersembahkenna korban guna dosana sendiri bali bagi si ilakokenna guna dosa bangsa e.  La lit sekalak pe si banci ngelantik dirina sendiri guna dahin si mulia enda. Dibata ngenca si banci ngelantiksa, bali bagi Arun nai.  Bage ka me Kristus, labo imuliakenna dirina sendiri alu jadi imam si mbelin. Tapi ia imuliaken Dibata si ngataken man bana, “Kam kap anakKu, gundari Aku jadi Bapakndu.”  Nina ka i bas ayat si deban, “Kam kap imam seh rasa lalap, bali bagi Malkisedek.”  Sanga Kristus nggeluh i doni, tutus atena ertoto janah serko ia alu iluh mambur mindo man Dibata si banci nelamatken ia i bas kematen nari. Ibegiken me totona e erkiteken mbiar ia man Dibata.  Aminna pe ia Anak Dibata, erlajar patuh ia arah kiniseran si inanamina.  Kenca ia jadi sempurna, ertanggung jawap ia mereken keselamaten si rasa lalap man kerina kalak si patuh man bana, 10  erkiteken ia nggo ipilih Dibata jadi imam si mbelin bali bagi Malkisedek. 11  Melala denga si ate kami si ikataken kami kerna ia, tapi mesera kap kami njelaskenca erkiteken kena nggo melet i bas ngangkai.* 12  Aminna pe gundari kena arusna nggo jadi guru, iperluken kena denga sekalak jelma guna ngajar kena mulai tangtangna nari kerna ajaren dasar si lit bas kata-kata si badia i bas Dibata nari, janah mulihken ka kena merluken susu, labo pangan si keras. 13  Ise pe si terus minem susu ngenca, labo iangkana kata kebenaren sebap ia anak si kitik denga. 14  Tapi pangan si keras eme pangan man kalak si dewasa, si kengasupen rukurna rusur ipakena, alu bage terlatih ia i bas mbedaken kai si benar ras kai si salah.

Cataten kaki

Ntah “megi.”