Heber 4:1-16

  • “Ndigan pe kalak e labo masuk ku bas wari istirahatKu” (1-10)

  • Nasehat gelah masuk ku bas wari istirahat Dibata (11-13)

    • Kata Dibata e nggeluh (12)

  • Jesus, imam si mbelin si mulia (14-16)

4  Emaka erkiteken lit denga janji guna masuk ku bas wari istirahat Dibata, arus kita hati-hati gelah ula lit sekalak pe i bas kita nari ianggap la cocok masuk ku bas.  Enggo sialoken berita si meriah bali bagi kalak e, tapi kata si ibegi kalak e la erguna man bana sebap kinitekenna la seri ras kiniteken kalak si matuhisa.  Kita si nggo erkiniteken, masuk ku bas wari istirahat e. Tapi man kalak si la patuh, nina Dibata, “Merawa Aku janah ersumpah, ‘Ndigan pe kalak e labo masuk ku bas wari istirahatKu,’” aminna pe dahinNa nggo dung kenca doni iciptaken* tangtangna nari.  I bas sada ayat, pernah ikatakenNa kerna wari pepituken, “I bas wari pepituken, istirahat Dibata arah kerina pendahinNa nari.”  Janah nina Dibata ka, “Ndigan pe kalak e labo masuk ku bas wari istirahatKu.”  Kalak si leben megiken berita si meriah e la banci masuk perban la patuh, tapi lit denga kalak si banci masuk.  Eme sebapna ndekah kenca si e, nina Dibata i bas masmur Daud, bali bagi si nggo pernah ikataken i bas surat enda, “Wari enda, adi ibegiken kena soraKu, ula ban piher ukur kena.” Alu bage itetapken Dibata sekali nari wari si igelari “Wari enda.”  Bicara nggo ibaba Josua kalak e ku bas ingan istirahat e, lanai bo min ndai icakapken Dibata kerna wari si deban.  Emaka lit denga wari istirahat guna umat Dibata bali bagi wari sabat. 10  Kalak si nggo masuk ku wari istirahat Dibata, ia pe nggo ka istirahat arah dahinna nari, bali bagi Dibata si istirahat arah dahinNa nari. 11  Emaka, siusahakenlah asa ngasupta gelah masuk ku bas wari istirahat e, alu bage la lit sekalak pe jadi la patuh bagi kalak ndai. 12  Kata Dibata e nggeluh janah dem alu kuasa, telapen asangken pedang si dua babahna, mbages kel penebakna seh maka isirangkenna kai si teridah arah darat ras si lit i bas pusuh sekalak jelma, bage pe isirangkenna sendi ras sumsum, janah banci itehna perukuren ras sura-sura si lit bas pusuh sekalak jelma. 13  I bas Dibata la lit si iciptaken si terbuni. Tapi, kerinana terbuka ras jelas teridah i lebe-lebeNa, si man baNa kita ertanggung jawap. 14  Erkiteken lit kap imamta si mbelin si mulia, si nggo masuk ku surga, eme Jesus Anak Dibata, emaka teruslah siceritaken kerna ia i lebe-lebe jelma si nterem. 15  Imamta si mbelin e labo imam si mbelin si la banci ngangkai* kelemahenta. Ia nggo iuji i bas kerinana bali bagi kita, tapi ia la erdosa. 16  Emaka marilah sideheri tahta Dibata si mereken lias ate si mbelin, janah ertotolah man baNa alu bebas ngerana. Alu bage sialoken perkuah ate ras lias ateNa si mbelin si nampati kita i bas waktu si tepat.

Cataten kaki

Maksudna, kenca lahir anak-anak Adam ras Hawa.
Ntah “rate mekuah nandangi.”