Heber 12:1-29

  • Jesus Si Erban Sempurna kinitekenta (1-3)

    • Enterem saksi si bali bagi embun (1)

  • Ula sepeleken disiplin arah Jahwe (4-11)

  • Pinterlah ban perdalan nahe kena (12-17)

  • Reh ku Jerusalem si i surga (18-29)

12  Erkiteken nterem kel i bas kita saksi si bali bagi embun i sekelilingta, marilah siambekken kerina baban ras dosa si menukah niding kita, janah marilah kita kiam alu megenggeng i bas perlumban si itetapken man banta,  janah sitataplah Kalak si Ipilih guna mere kegeluhen ras Si Erban Sempurna kinitekenta, eme Jesus. Erkiteken keriahen ukur si itama i lebe-lebena, ngasup ia megenggeng i tiang siksan,* la kapna mela, janah gundari kundul ia i sebelah kanan tahta Dibata.  Megenggeng ia ngadapi kalak erdosa si ngelawan ia alu ranan si ngerugiken diri kalak e sendiri. Ukurilah alu mbages kerna ia gelah ula latih ukur kena janah la kena putus asa.  I bas erjuang ngelawan dosa e, lenga pernah kena erjuang seh asa ngamburken dareh.  Tuhu-tuhu nggo ilupaken kena nasehat Dibata man kena selaku anak-anakNa, eme, “O anakKu, ula sepeleken disiplin i bas Jahwe nari, ntah pe ula putus asa sanga ipersingetiNa,  sebap idisiplin Jahwe kerina kalak si ikelengiNa, janah iligasNa tiap kalak si ialokenNa jadi anak.”  Arus kena megenggeng sebap si e bagin disiplin* i bas Dibata nari guna kena. Iban Dibata kena bagi anakNa, janah anak si apai kin si la idisiplin bapakna?  Tapi adi kerina kena la ngaloken disiplin e, berarti kena anak haram, labo anakNa.  Selain si e, bapakta si lit bas doni pe rusur nge idisiplinna kita, janah sihamati ia. Emaka la kin arus lebih patuh kita man Bapak si nggo milih kita alu kesah si badia janah si erban kita tetap nggeluh? 10  Kentisik ngenca kita idisiplin bapakta si lit bas doni enda, idisiplinna kita menurut kai si iakapna benar. Tapi idisiplin Dibata kita guna kepentingenta gelah banci kita badia bali bagi Ia. 11  Memang sanga disiplin ibereken, labo lit disiplin si erban meriah ukur, tapi erban ceda ate. Tapi kenca si e, kalak si ngaloken disiplin dungna ngelakoken kai si benar janah idatna upah, eme kedamen. 12  Emaka pegegehilah tan kena si lemah, bage pe tiwen* kena si la ergegeh. 13  Janah alu nahe kena, teruslah pinter kena erdalan gelah bagin si lemah* la reh kelekna* tapi jadi malem. 14  Usahakenlah erdame ras kerina kalak janah usahakenlah gelah badia. Ise pe si la badia labo banci ngidah Tuan.* 15  Hati-hatilah gelah ula sekalak pe gagal i bas ngaloken lias ate si mbelin i bas Dibata nari, alu bage la turah urat si lit racunna jenari erban masalah janah erban nterem kalak jadi najis. 16  Hati-hatilah gelah ula lit i tengah-tengah kena kalak si ngelakoken perbahanen seks si salah* ntah pe si la ngergai kai si badia bagi Esau si nukarken hak-hakna selaku anak sintua erkiteken sada mangkok pangan. 17  Iteh kena maka i bas pudi wari sanga iwarisina atena pasu-pasu, itulak me ia. Aminna pe icubakenna mindo man bapakna alu tangis teriluh gelah berubah ukurna, si e sia-sia kerina. 18  La kena reh ku deleng si banci idadap bage pe si gurlah alu api, deleng e ikelilingi alu embun si gelap si seh kel gelapna janah i je lit angin meter, 19  sora trompet si megang, bage pe sora kalak si sangana ngerana, janah sanga ibegi bangsa e sora e, minter ipindona gelah ngadi sora e ngerana man kalak e. 20  Lanai kalak e ngasup megi perentah, “Binatang si merawa pe adi idadapna deleng e, arus ibenteri alu batu seh asa mate.” 21  Kai si teridah i je erban mbiar kel, seh maka Musa pe ngataken, “Nggirgir kel aku perban biarna.” 22  Tapi idahi kena Deleng Sion bage pe kota Dibata si nggeluh, eme Jerusalem si lit i surga. I je lit melala* malekat 23  si pulung, lit ka perpulungen anak sintua si gelarna nggo itulisken i surga, lit ka nggeluh kalak si benar si lahir erkiteken kesah si badia si nggo iban jadi sempurna, lit ka Dibata si jadi Hakim nandangi kerina, 24  lit ka Jesus si jadi kelang-kelang i bas perjanjin si mbaru, bage pe dareh si ipirpirken si ulin ngerana asangken dareh Abil. 25  Ula la ibegiken kena sora si ngerana e. Sebap adi kalak si la megiken persinget Dibata si ipeseh i doni saja pe la selamat, apai ka kita adi la sibegiken sora si ngerana arah surga nari! 26  Paksa si e, mugur-ugur doni perban soraNa, tapi gundari nggo erjanji Ia, “Sekali nari Kuban denga nge mugur-ugur doni, labo ngenca doni, tapi langit pe.” 27  Kata “sekali nari” ncidahken maka ikernepken Dibata me kai si mugur-ugur si labo Ia erbanca, emaka si la mugur-ugur e tetap nge lit. 28  Erkiteken sialoken me Kerajan si la banci mugur, teruslah sialoken lias ate Dibata si mbelin si nampati kita mereken pelayanen si badia man baNa alu mbiar ras mehamat sue ras cara si erban Ia senang. 29  Dibatata bali kap bagi api si ngkernepken.

Cataten kaki

Nen Kamus.
Ntah “pelatihen.”
Ntah “tihun.”
Ntah “si pengkar.”
Ntah “la ndarat arah sendina.”
Bahasa Junani, Kyrios. Ntah banci saja “Tuhan.”
Bahasa Junani, porneia. Nen Kamus.
Ntah “lit puluhen ribu.”