Heber 11:1-40

  • Erti kiniteken (1, 2)

  • Usihen kiniteken (3-40)

    • Adi la erkiniteken la banci erban Dibata senang (6)

11  Kiniteken eme tek kel maka kai si iarapken pasti terjadi, bukti si jelas maka kai si la teridah e tuhu-tuhu lit.  Perban erkiniteken, kalak si nggeluh i bas jaman si nai ndatken ngena ate Dibata.*  Perban erkiniteken, siangkai maka doni* enda iciptaken arah kata Dibata, alu bage kai si teridah e lit arah kai si la teridah nari.  Perban erkiniteken, ipersembahken Abil korban si terulin man Dibata asangken korban si ipersembahken Kain. Perban erkiniteken, idat Abil kesaksin maka ia ikataken benar erkiteken ialoken Dibata pemerena. Aminna pe ia nggo mate, ngerana denga ia arah kinitekenna.  Perban erkiniteken, Enoh ipindahken gelah la ngidah kematen, janah i japa pe la banci ia ijumpai perban nggo ipindahken Dibata. Ope lenga ipindahken, idatna kesaksin maka nggo isenangkenna Dibata.  Adi la kin erkiniteken, ise pe la banci erban Dibata senang perban kalak si reh ndahi Dibata arus tek maka Dibata e lit janah iupahiNa kalak si tuhu-tuhu ndarami Ia.  Perban erkiniteken, kenca ndatken perentah i bas Dibata nari, ipatuhi* Nuah me Dibata janah ibangunna bahtra guna nelamatken keluargana. Alu kinitekenna, ibuktikenna maka doni enda patut iukum, janah perban kinitekenna e ia ikataken benar.  Perban erkiniteken, patuh Abraham sanga ilebuh Dibata janah lawes ia ku ingan si ialokenna jadi warisen. Berkat ia aminna pe la itehna ku ja ia lawes.  Perban erkiniteken, tading ia i negri si ijanjiken e selaku kalak asing,* tading ia i kemah-kemah radu ras Isak bage pe Jakup, si ikut jadi ahli waris i bas janji si seri. 10  Si e ilakokenna erkiteken itimai Abraham kota si paguh pondasina, si iban* ras si ibangun Dibata. 11  Perban erkiniteken, hamil Sara* aminna pe ia nggo metua, sebap tek ia maka Dibata si mereken janji e setia kap. 12  Emaka arah sekalak dilaki si nggo lanai banci lit kesusurenna,* lahir me nterem anak bagi bintang i langit ras bagi kersik i pantai si la terkira buena. 13  Kerina kalak enda erkiniteken seh asa mate. Aminna pe lenga ialoken kalak e si nggo ijanjiken, tapi tempa-tempa nggo idahna arah dauh-dauh nari, ialo-alona, janah ipebetehkenna man kalak si deban maka kalak e kalak asing* janah kentisik ngenca tading i negri e. 14  Kalak si bage rananna, mbuktiken maka tuhu-tuhu idaramina denga inganna tading guna dirina sendiri. 15  Bicara lalap inget kalak e ingan si nggo itadingkenna, banci saja kalak e mulih. 16  Tapi iusahaken kalak e ndatken ingan si terulin, eme si lit hubungenna ras surga. Emaka la mela Dibata igelari jadi Dibata kalak e, janah nggo isikapkenNa sada kota man kalak e. 17  Perban erkiniteken, sanga Abraham iuji, tempa-tempa nggo ipersembahkenna Isak. Abraham si ngaloken janji-janji e alu ermeriah ukur, nggit ngkorbanken anakna si tonggal, 18  aminna pe nggo ikataken man bana, “Kesusuren* si ijanjiken man bandu e rehna pagi arah Isak nari.” 19  Tapi tek ia maka ngasup Dibata mpekeke anakna i bas si mate nari, janah ialokenna anakna e tempa-tempa i bas si mate nari, si enda ncidahken kai si terjadi i bas wari si pepagi. 20  Perban erkiniteken ka me Isak maka ipasu-pasuna Jakup ras Esau, janah ikatakenna man kalak e kerna kai si terjadi i bas wari si pepagi. 21  Perban erkiniteken, sanga ia menam mate, ipasu-pasu Jakup me anak-anak Jusup janah isembahna Dibata janahna njemak tongkatna. 22  Perban erkiniteken, sanga Jusup nandangi mate, icakapkenna kerna kalak Israel si ndarat arah Mesir nari janah iberena petunjuk* kerna tulan-tulanna.* 23  Perban erkiniteken, kenca Musa lahir, ibuniken orang tuana me ia sedekah telu bulan, sebap merupa kel kapna anakna e janah la kalak e mbiar man perentah raja. 24  Perban erkiniteken, kenca Musa dewasa, la ia nggit ikataken anak putri Paro, 25  padin iakapna ngenanami kiniseran ras umat Dibata asangken ngenanami kesenangen si kentisik i bas dosa nari, 26  sebap pangen kapna ihina selaku Kalak si Ipilih,* e me si jadi kebayaken si ndauh ulin asangken kerina erta Mesir, janah semangat kel ia natap pasu-pasu si pagin ialokenna. 27  Perban erkiniteken, itadingkenna Mesir, labo perban mbiar ia man pernembeh raja. Tetap ia paguh, tempa-tempa idahna Dibata si la teridah. 28  Perban erkiniteken, irayakenna Paskah janah ipirpirkenna dareh, gelah anak sintua bangsa Israel si dilaki la ibunuh* malekat Dibata. 29  Perban erkiniteken, isebrangi kalak e Lawit Merah tempa-tempa erdalan i datas taneh si kerah, tapi kalak Mesir e gedap sanga icubakenna ikut nyebrang. 30  Perban erkiniteken, tembok Jeriho runtuh kenca ikelilingi bangsa Israel pitu wari dekahna. 31  Perban erkiniteken, diberu si dahinna jadi pelacur, eme Rahap, ialo-alona mata-mata bangsa Israel alu mehuli, emaka la ia ikut ikernepken ras kalak si la patuh. 32  Ise nari kin si perlu kuceritaken? La bias waktuku adi kuceritaken kerna Gideon, Barak, Simson, Jepta, Daud, Samuel, bage pe nabi-nabi si deban. 33  Perban erkiniteken, italuken kalak e kerajan-kerajan, idalankenna kai si benar, ialokenna kai si nggo ijanjiken, itutupna babah singa-singa, 34  imatekenna api si gurlah, selamat ia i bas pedang nari, jadi megegeh ia aminna pe ndai ia lemah, janah ipelawesna pasuken musuh si nerang. 35  Ialoken diberu-diberu mulihi keluargana si ipekeke i bas si mate nari, tapi kalak si deban isiksa perban la nggit ngaloken keselamaten arah tebusen, gelah ialoken kalak e kekeken si terulin. 36  Si debanna icubai alu ihina, iligas, lit ka si irante ras ipenjaraken. 37  Lit ka si ibenteri alu batu seh asa mate, icubai, ipotong alu gergaji, ibunuh alu pedang, janah kulit biri-biri ras kulit kambing ngenca si man paken kalak e. Mesera geluhna, dem alu kiniseran, janah iperlakoken alu la mehuli. 38  La cocok doni enda jadi ingan kalak e tading. Tading kalak enda i gurun, i deleng, i gua, bage pe i lubang si lit bas teruh taneh. 39  Aminna pe nggo ibereken Dibata kesaksin maka ngena ateNa kalak e perban erkiniteken, tapi kerina kalak e la ngaloken kai si nggo ijanjiken, 40  sebap nai nari nggo ersura-sura Dibata mereken si terulin man banta gelah ula kalak e jadi sempurna adi la kin kita ikut.

Cataten kaki

As. “ndatken kesaksin kerna diri kalak e.”
Nen Kamus.
Ntah “ihamati.”
Ntah “kalak pertandang.”
Ntah “si irancang.”
Ntah “ialoken Sara gegeh gelah banci lit kesusurenna.”
Ntah “si tempa-tempa nggo mate.”
Ntah “kalak pertandang.”
As. “Benih.”
Ntah “perentah.”
Ntah “penguburenna.”
As. “Kristus.”
As. “idadap.”