Heber 10:1-39

  • Dareh binatang la banci nasapken dosa (1-4)

    • Undang-Undang Musa bayangen ngenca (1)

  • Kristus ikorbanken sekali seh rasa lalap (5-18)

  • Dalan si mbaru si maba ku kegeluhen (19-25)

    • Ula kita la reh ku perpulungen (24, 25)

  • Persinget gelah ula sengaja erban dosa (26-31)

  • Megenggeng perban erkiniteken (32-39)

10  Undang-Undang Musa e bayangen ngenca kerna kai si mehuli si nandangi reh, labo kerna kai si mehuli e. Emaka erkelangken korban-korban si ipersembahken arah tahun ku tahun, undang-undang* e la banci erban kalak si ngerembakken diri ku Dibata jadi sempurna.  Bicara korban-korban e banci erban kalak e jadi sempurna, korban pe lanai perlu ipersembahken mulihi, erkiteken kenca kalak e ibersihken, lanai iakap kalak e salah bana erkiteken dosana.  Tapi, arah korban-korban si ipersembahken tahun ku tahun, enda jadi penginget man kalak e kerna dosa-dosana  erkiteken dareh lembu jantan bage pe dareh kambing la mungkin nasapken dosa.  Emaka sanga reh ia ku doni, nina, “‘Labo iarapkenNdu korban ras persembahen, tapi isikapkenNdu sada daging man bangku.  Labo ngena ateNdu persembahen tutungen bage pe persembahen dosa.’  Jenari ningku, ‘O Dibata, nggo reh aku guna ngelakoken peratenNdu, bagi si tertulis i bas gulungen kitap kerna diriku.’”  Tangtangna nina, “Labo iarapkenNdu janah labo ngena ateNdu persembahen, persembahen tutungen, bage pe persembahen dosa,” eme persembahen-persembahen si ibereken sue ras Undang-Undang Musa.  Jenari nina, “Enggo reh aku guna ngelakoken peratenNdu.” Ihapusna peraturen si pertama gelah sah peraturen si peduaken. 10  Sue ras “peraten” e, kita nggo ipebadiaken arah daging Jesus Kristus, si ipersembahken sekali seh rasa lalap. 11  Selain si e, tiap wari tiap imam i bas inganna ngelakoken pelayanen si badia janah rusur ipersembahkenna korban-korban si seri, si la banci tuhu-tuhu nasapken dosa. 12  Tapi ipersembahken Kristus sada korban guna masapken dosa seh rasa lalap, janah kundul ia i sebelah kanan Dibata, 13  janahna nimai seh asa musuh-musuhna itamaken ku teruh nahena. 14  Alu sada korban si ipersembahken, ibanna kerina kalak si ipebadiaken jadi sempurna seh rasa lalap. 15  Selain si e, sidat kesaksin arah kesah si badia alu kata-kata, 16  “‘Enda me perjanjin si Kuban ras kalak e kenca paksa si e,’ nina Jahwe. ‘Kutama me undang-undangKu ku bas pusuh kalak e janah Kutulis i bas perukurenna.’” 17  Jenari nina, “Dosa-dosa kalak e ras kesalahen-kesalahen kalak e lanai pagi Kuinget.” 18  Adi kerina e iampuni, lanai perlu lit persembahen dosa. 19  Emaka o senina-senina, erkiteken dareh Jesus, nggo pang kita ngelewati dalan guna masuk ku ingan si badia, 20  si ibukana man banta selaku dalan si mbaru si nuju ku kegeluhen arah tirai e, tirai e eme dagingna, 21  janah erkiteken lit imamta si mulia si jadi kepala i bas rumah Dibata, 22  mari sideheri Dibata alu bulat ukur janah dem kiniteken, erkiteken pusuhta nggo ibersihken arah pusuh peraten si jahat nari, janah dagingta nggo ibersihken alu lau bersih. 23  Mari terus siberitaken arapenta alu la sangsi, erkiteken si erjanji kerna arapen e setia kap. 24  Mari siperdiateken sada ras si debanna gelah siiah-iahen kita i bas ncidahken kekelengen ras perbahanen si mehuli. 25  Ula kita la reh ku perpulungen bagi si biasa ilakoken piga-piga kalak, tapi sipegegehilah sada ras si debanna, janah reh tutusna kita ngelakoken si e kerina erkiteken siidah wari e nggo reh deherna. 26  Adi sengaja kita erban dosa kenca sialoken pemeteh si tepat kerna kebenaren, lanai lit korban man dosata, 27  si man timan eme penghakimen si erban kita mbiar bage pe rawa Dibata si gurlah si ngkernepken kerina kalak si ngelawan Ia. 28  Adi lit dua ntah pe telu kalak si jadi saksi, ise pe si la matuhi Undang-Undang Musa iukum mate me alu la lit ampunen. 29  Menurut kena, la kin ukumen si ndauh beraten patut ibereken man kalak si nggo merjaki Anak Dibata, janah si la ngergai dareh perjanjin si mpebadiaken ia, janah si nghina kesah si badia padahal kesah si badia si mbuktiken lias ate Dibata si mbelin? 30  Siteh maka nina Dibata, “HakKu kap pembalasen. Kubalas pagi perbahanenna si jahat.” Lit ka tertulis, “Ihakimi Jahwe me umatNa.” 31  Seh kel ngerina adi ndabuh ku bas tan Dibata si nggeluh. 32  Tapi tetaplah inget keadan kena mbarenda. Paksa si e, kenca kena iterangi, megenggeng kena ngadapi kiniseran bage pe perjuangen si mberat. 33  Mon-mon kena ihina janah iadapi kena kiniseran i lebe-lebe jelma si nterem. Mon-mon kena pe ikut ngenanami kiniseran ras kalak si ngenanami kiniseran si bage. 34  Iperdiateken kena kalak si ipenjaraken, janah tetap kena ermeriah ukur aminna pe erta-erta kena irampas kalak, perban iteh kena maka lit erta kena si terulin janah tahan rasa lalap. 35  Emaka, teruslah kena ngerana alu pang, sebap enda mereken melala pasu-pasu. 36  Perlu kena setia, sebap kenca ilakoken kena peraten Dibata, ialoken kena me kai si ijanjiken e. 37  Sebap “kentisik” nari ngenca “seh me Ia si nandangi reh e janah labo terlambat.” 38  “Kalak si ngelakoken kai si benar, tetap nge pagi nggeluh perban erkiniteken.” Janah, “Adi itadingkenna Aku erkiteken ia mbiar, la Aku senang man bana.” 39  Kita labo kalak si nadingken Dibata erkiteken mbiar, sebap kalak si bage ikernepken me. Tapi kita kalak si erkiniteken sebap kalak si bage terus kap nggeluh.

Cataten kaki

Ntah banci saja “manusia.”