Galati 5:1-26

  • Kebebasen Kristen (1-15)

  • Ngikutken penegu-negu kesah si badia (16-26)

    • Asil arah perbahanen daging si erdosa (19-21)

    • Asil arah kesah si badia (22, 23)

5  Ibebasken Kristus kita gelah banci sinanami kebebasen si bage. Emaka, tedislah alu paguh janah ula sempat kena iperbudak mulihi.  Aku, Paulus, kukataken man kena maka adi kena isunat, kai si ilakoken Kristus lanai lit gunana man kena.  Sekali nari kubereken kesaksin man tiap kalak si atena isunat maka arus idalankenna Undang-Undang Musa.  Adi iusahaken kena gelah ikataken benar alu undang-undang, kena terpisah kap arah Kristus nari janah nggo itadingken kena lias atena si mbelin.  Tapi sitimai gelah ikataken benar alu kesah si badia ras kiniteken.  Si pentingna man kalak si ersada ras Kristus Jesus, labo isunat ntah lang, tapi kiniteken si ibuktiken alu kekelengen.  Mbarenda mehuli perbahanen kena.* Ise kin si ngambati kena maka gundari lanai ikutken kena kebenaren?  Ajaren si bage rehna labo arah Dibata si ngelebuh kena.  Sitik ragi banci erban tepung si nggo iaduk jadi kembang. 10  Tek aku maka kena si ersada ras Tuan pasti setuju. Tapi kalak si ndarami masalah ras kena, ise pe ia, ialokenna me ukumen si patut man bana. 11  O turang senina, adi kuberitaken denga kerna sunat, la mungkin aku isiksa, janah labo lit kalak si tertuktuk nandangi ajarenku kerna kematen Jesus i tiang siksan.* 12  Ngarap aku gelah kalak si atena erban kena ndabuh, ikebirina me dirina sendiri.* 13  O turang senina, kena nggo ilebuh guna ibebasken, tapi ula ipake kena kebebasen e jadi kesempaten guna ndalanken sura-sura daging si erdosa. Tapi, layanilah sada ras si debanna erkiteken kekelengen. 14  Kerina Undang-Undang Musa ipersada* i bas sada perentah enda: “Arus ikelengindu kalak si deban bagi kam ngkelengi dirindu.” 15  Adi terus isakiti janah iserang kena sada ras si debanna, hati-hatilah gelah la ikernepken kena sada ras si debanna. 16  Tapi kukataken: Teruslah ikuti penegu-negu kesah si badia, alu bage la ikutken kena sura-sura daging. 17  Sebap sura-sura daging si erdosa erlawanen kap ras kesah si badia, janah kesah si badia erlawanen ras daging si erdosa. Erkiteken si dua enda erlawanen, la ilakoken kena kai si ate kena ilakoken kena. 18  Selain si e, adi kena itegu-tegu kesah si badia, la kena nggeluh menurut undang-undang. 19  Jelas kap teridah asil perbahanen daging, eme perbahanen seks si salah,* kai pe si najis, perbahanen si la meteh mela,* 20  nembah berhala, kai pe si lit hubungenna ras malekat jahat,* simusuhen, rubati, cemburu, merawa, erjengil, perpecahen, sekte-sekte,* 21  rate cian, mabuk, pesta pora, ras kerina si bage rupana. Sekali nari kupersingeti kena kerna si e, bagi si nggo pernah kulakoken: Kalak si terus ngelakoken si e kerina, la banci ngaloken Kerajan Dibata. 22  Tapi sipat-sipat si ihasilken kesah si badia eme kekelengen, keriahen ukur, kedamen, kesabaren, lias ate, mehuli, kiniteken, 23  lemah lembut, ras ngasup ngkuasai diri. La lit undang-undang si erlawanen ras si e kerina. 24  Kalak si jadi pengikut Kristus Jesus nggo imatekenna* kerina napsu ras sura-sura dagingna si erdosa. 25  Adi kita nggeluh sue ras penegu-negu kesah si badia, teruslah lakoken kai si sue ras penegu-negu kesah si badia. 26  Ula min kita sombong, ersaing, ntah pe sician-cianen.

Cataten kaki

As. “Mbarenda kena kiam alu mehuli.”
Nen Kamus.
Ntah “jadi kalak si la banci erjabu,” alu bage lanai ia ncukupi sarat guna ndalanken undang-undang si idukungna.
Ntah banci saja “kesimpulenna.”
Bahasa Junani, porneia. Nen Kamus.
As. aselgeia. Nen Kamus.
Nen Kamus.
Nen Kamus.
As. “ipakukenna i tiang.”