Galati 1:1-24

  • Salam (1-5)

  • La lit berita si meriah si deban (6-9)

  • Berita si meriah si ipeseh Paulus rehna i bas Dibata nari (10-12)

  • Perubahen Paulus ras pendahinna kenca si e (13-24)

1  Surat enda i bas aku nari, Paulus, si nggo jadi rasul, labo erkiteken manusia ntah pe erkelangken manusia, tapi erkiteken Jesus Kristus ras Dibata eme Bapakta si nggo mpekeke Jesus i bas si mate nari.  Surat enda kutulisken man runggun-runggun si lit i Galati. Kerina turang senina si lit ras aku kirim salam man kena:  Mbera ialoken kena lias ate si mbelin ras kedamen i bas Dibata nari eme Bapakta bage pe i bas Tuan Jesus Kristus nari.  Ikorbankenna dirina guna dosa-dosata gelah banci iselamatkenna kita i bas doni* si jahat enda nari, sue ras peraten Dibata eme Bapakta.  Mbera Dibata imuliaken rasa lalap seh rasa lalap. Amin.  Mamang kel ateku ngenen kena erkiteken pedas kel itadingken kena Ia si nggo milih kena erkelangken lias ate Kristus si mbelin, janah gundari ialoken kena berita si meriah si deban.  Situhuna, labo lit berita si meriah si deban, tapi lit piga-piga kalak si atena erban masalah ras kena alu ngubah berita si meriah kerna Kristus.  Tapi adi lit si mpeseh berita si meriah si deban si la seri ras berita si nggo ipeseh kami man kena, ia patut isumpahi, la soal ia i bas kami nari ntah pe i bas malekat i surga nari.  Bali bagi si nggo pernah ikataken kami, sekali nari kukataken: Ise pe si mpeseh berita si meriah si deban si la seri ras si nggo ialoken kena, ia patut isumpahi. 10  Situhuna ise kin si sangana kusenangken? Dibata ntah manusia? Adi kuusahaken denga erban manusia senang, aku labo budak Kristus. 11  O turang senina, ateku min gelah iteh kena maka berita si meriah si kupeseh man kena labo i bas manusia nari, 12  sebap si mereken ras si ngajarkenca man bangku labo manusia, tapi Jesus Kristus kap si mpebetehkenca man bangku. 13  Pasti nggo ibegi kena kerna perbahanenku sanga aku i bas agama Jahudi denga, mbarenda kusiksa runggun Dibata alu kejam janah kuusahaken ngkernepkenca. 14  I bas ndalanken agama Jahudi ndauh aku lebihen asangken kerina temanku si sebaya si sada bangsa ras aku, janah semangaten aku i bas ndalanken adat nini bulangku. 15  Tapi Dibata, si erban aku nggo lahir, ilebuhNa aku erkiteken lias ateNa si mbelin, janah meriah akapNa 16  nggunaken aku i bas mberitaken berita si meriah man bangsa si deban, gelah itandai kalak e AnakNa. Sanga aku ilebuh, la kupindo pedah manusia si apai pe. 17  Janah labo aku lawes ku Jerusalem guna njumpai kalak si nggo leben jadi rasul asangken aku. Tapi lawes aku ku Arab, jenari mulihken ku Damaskus. 18  Telu tahun kenca si e, lawes aku ku Jerusalem ndahi Kepas,* janah tading aku ras ia 15 wari dekahna. 19  Tapi la lit aku jumpa ras rasul-rasul si deban selain Jakup agi Tuan. 20  Kai si kutulisken enda tuhu. Ersumpah aku i lebe-lebe Dibata maka aku labo erbual. 21  Jenari lawes aku ku daerah Siria ras Kiliki. 22  Tapi kalak si lit i bas runggun-runggun i Judea si nggo ersada ras Kristus lenga pernah jumpa ras aku. 23  Kata-kata enda ngenca si ibegi kalak e, eme: “Dilaki si mbarenda niksa kita, janah si atena ngkernepken kinitekenta, gundari sangana mberitaken berita si meriah.” 24  Emaka mulai me imuliaken kalak e Dibata erkiteken aku.

Cataten kaki

Nen Kamus.
Igelari ka Petrus.