Epesus 6:1-24

  • Pedah man anak-anak ras orang tua (1-4)

  • Pedah man budak ras tuan (5-9)

  • Kerina perlengkapen perang i bas Dibata nari (10-20)

  • Salam pendungi (21-24)

6  O anak-anak, patuhilah orang tua kena sue ras peraten Tuhan, sebap si e benar kap.  “Hamatilah bapakndu ras mamakndu.” E kap perentah si pertama si mere pasu-pasu enda:  “Gelah berhasil kam janah gedang umurndu i doni enda.”  O perbapan, ula ban merawa anak kena, tapi pebelinlah kalak e alu disiplin ras pengajaren Jahwe.  O budak-budak, bali bagi kena patuh man Kristus, patuhilah tuan kena si lit i doni i bas pusuh kena nari alu mbiar ras gentar,  labo saja sanga lit si ngidahsa gelah erban manusia senang, tapi selaku budak Kristus, lakokenlah peraten Dibata alu bulat ukur.  Erdahinlah man tuan kena alu meriah ukur, bali bagi man Jahwe, labo man manusia,  erkiteken iteh kena maka tiap kalak, eme budak ntah pe kalak si bebas, ialokenna nge balasen i bas Jahwe nari erkiteken perbahanenna si mehuli.  O kena si jadi tuan, bage ka lah ban perbahanen kena nandangi budak kena, ula ancam kalak e, perban iteh kena maka Tuan kena bage pe Tuan budak e sada kap, eme si lit i surga janah Ia labo erpilihen. 10  Dungna, teruslah datken kuasa i bas Tuhan nari, sebap kuasaNa e seh kel hebatna. 11  Pakekenlah kerina perlengkapen perang i bas Dibata nari, gelah ngasup kena tedis alu nteguh guna ngelawan akal Iblis si jahat, 12  sebap perjuangenta labo ngelawan manusia,* tapi ngelawan pemerentah, peminpin, penguasa doni si gelap enda, bage pe malekat-malekat jahat si lit i deher surga. 13  Emaka, pakelah kerina perlengkapen perang i bas Dibata nari, gelah ngasup kena ngelawan sanga lit serangen i bas si jahat nari janah tetap denga kena tedis alu paguh kenca ilakoken kena kerina si arus ilakoken. 14  Emaka, paguhlah kena tedis alu makeken ikat pinggang kebenaren, janah makeken pelindung tenten, eme perbahanen si benar. 15  Selain si e, pakelah sepatu si jadi tanda maka kena nggo ersikap guna mberitaken berita si meriah kerna kedamen. 16  Selain si e kerina, banlah kiniteken jadi ampang-ampang* kena, gelah banci imateken kena kerina anak panah si gara i bas si jahat nari. 17  Bage ka pe, alokenlah pelindung takal eme keselamaten ras pedang si ibereken kesah si badia eme kata Dibata. 18  Janah teruslah ertoto alu bimbingen kesah si badia i bas tiap kesempaten alu erbage toto ras pemindon. Teruslah erjaga-jaga janah ertoto guna kepentingen kalak si badia. 19  Totoken ka lah aku, gelah sanga kubuka babahku, ngasup aku ngerana alu pang i bas mberitaken rahasia si badia kerna berita si meriah. 20  Guna berita si meriah e aku jadi utusen si igari. Totokenlah aku gelah pang aku ngerana kerna berita e bagi si arusna aku ngerana. 21  Tikikus, turang senina si ikelengi ras si setia man Tuan, ipebetehkenna kari kerina man kena kerna aku ras kerna keadanku. 22  Kusuruh ia ndahi kena gelah iteh kena keadan kami, janah banci iapulina pusuh kena. 23  Mbera lit i bas turang senina kedamen, kekelengen, ras kiniteken si rehna i bas Dibata nari eme Bapakta, bage pe i bas Tuan Jesus Kristus nari. 24  Mbera lias ate Dibata si mbelin lit i bas kena eme kalak si tuhu-tuhu ngkelengi Tuan Jesus Kristus.

Cataten kaki

As. “dareh ras daging.”
Ntah “jadi si ngelindungi kerina bagin daging.”