Epesus 1:1-23

  • Salam (1, 2)

  • Pasu-pasu rohani (3-7)

  • Kerinana ipepulung i bas Kristus (8-14)

    • “Sada pengaturen” i bas waktu si itetapken (10)

    • Ibereken tanda alu kesah si badia si jadi “jaminen” (13, 14)

  • Ikataken Paulus bujur man Dibata perban kiniteken kalak Epesus janah ertoto ia guna kalak e (15-23)

1  Surat enda i bas Paulus nari, sekalak rasul Kristus Jesus sue ras peraten Dibata. Surat enda man kalak si badia si lit i Epesus bage pe man kalak si setia si ersada ras Kristus Jesus:  Mbera ialoken kena lias ate si mbelin ras kedamen i bas Dibata nari eme Bapakta janah i bas Tuan Jesus Kristus nari.  Erkiteken kita nggo ersada ras Kristus, terpujilah Dibata eme Bapak Tuanta Jesus Kristus si nggo mereken pasu-pasu rohani i surga.  Ope lenga doni enda ijadiken,* nggo ipilih Dibata kita gelah ersada ras Kristus, emaka arus sibuktiken kekelengenta, kita arus badia, janah la erpandangen i lebe-lebeNa.  Tangtangna nari pe nggo itetapken Dibata gelah kita iangkat jadi anak-anakNa erkelangken Jesus Kristus, sue ras sura-suraNa ras si ngena ateNa.  Alu bage ipuji me Ia perban lias ateNa si mbelin ras mulia, ibuktikenNa si e man banta arah AnakNa si ikelengiNa.  Erkiteken seh kel belinna lias ateNa e, itebusNa kita alu dareh AnakNa. Kita ibebasken janah dosata pe iampuni.  IbuktikenNa lias ateNa si mbelin alu mereken kerina kepentaren ras pengangkan man banta,  janah ipebetehkenNa rahasia si badia kerna peratenNa. Rahasia si badia e sue ras kai si ngena ateNa bage pe tujunNa 10  guna ngelakoken sada pengaturen. Pengaturen e ilakoken adi nggo dung waktu si itetapkenNa e. Alu bage kerina si lit i surga bage pe si lit i doni ipepulung kerinana i bas Kristus. Payo, i bas ia kerinana ipepulung. 11  Ersada kami ras Kristus janah kami itetapken jadi ahli waris ras ia. Tangtangna nari, kami nggo ipilih sentudu ras peraten Dibata si ngelakoken kerinana sue ras sura-suraNa. 12  Alu bage Dibata ipuji ras imuliaken erkelangken kami, eme kalak si pertama erpengarapen man Kristus. 13  Kena pe erpengarapen man Kristus, erkiteken nggo ibegi kena kata kebenaren eme berita si meriah si mere keselamaten man kena. Kenca kena tek, ibereken me tanda man kena erkelangken Kristus alu meterai eme kesah si badia si nggo ijanjiken. 14  Kesah si badia e jadi jaminen maka sialoken me warisen si nggo ijanjiken Dibata. Ilakoken Dibata si e gelah umatNa ibebasken alu tebusen, janah alu bage Ia ipuji ras imuliaken. 15  Eme sebapna kenca kubegi kerna kiniteken kena man Tuan Jesus bage pe kekelengen kena man kerina kalak si badia, 16  la erngadi-ngadi aku ngata bujur man Dibata kerna kena. Terus kena kutotoken, 17  gelah Bapak si mulia, eme Dibata arah Tuanta Jesus Kristus, mereken kesah si badia man kena gelah banci kena pentar janah ngangkai kai si ipebetehkenNa, alu bage benar pemeteh kena kerna Ia. 18  Enggo ibuka Dibata pusuh kena gelah banci idah kena janah iteh kena kerna arapen si iberekenNa man kena. Seh kel muliana kebayaken si iberekenNa man kalak si badia, eme si jadi warisen man kalak e, 19  janah seh kel belinna kuasaNa man kita si erkiniteken. Kuasa si mbelin e teridah arah pendahinNa, 20  eme sanga ipekekeNa Kristus i bas si mate nari janah ipekundulNa ia i sebelah kananNa i surga. 21  Kedudukenna e ndauh belinen asangken kerina pemerentah, penguasa, peminpin, bage pe kerina gelar, labo saja i bas jaman* si gundari tapi pe i bas jaman si nandangi reh. 22  Iban Dibata ka kerinana jadi patuh i teruh nahe Kristus janah ijadikenNa ia takal man runggun i bas kai pe. 23  Runggun e me daging Kristus, runggun e dem alu sipat-sipat Kristus. Ibanna kerina lengkap i bas kerinana.

Cataten kaki

Maksudna, kenca anak-anak Adam ras Hawa lahir.
Ntah “doni.” Nen Kamus.