2 Tesalonika 1:1-12

  • Salam (1, 2)

  • Kiniteken runggun Tesalonika reh paguhna (3-5)

  • Balasen man kalak si la patuh (6-10)

  • Toto man runggun (11, 12)

1  Surat enda i bas Paulus, Silvanus,* ras Timotius nari. Surat enda man runggun i Tesalonika si ersada ras Dibata eme Bapakta bage pe ras Tuan Jesus Kristus:  Mbera ialoken kena lias ate si mbelin ras kedamen i bas Dibata nari eme Bapakta, bage pe i bas Tuan Jesus Kristus nari.  O turang senina, erkiteken kena, arus akap kami lalap ngataken bujur man Dibata. Enggo patut iban kami bage, sebap kiniteken kena reh paguhna janah kekelengen kena nandangi sada ras si debanna reh bagesna.  Emaka, megah akap kami mpebetehken kerna kena man runggun-runggun Dibata, erkiteken tetap kena setia ras erkiniteken i bas ngadapi kerina siksan ras kesusahen.  Enda me bukti maka keputusen Dibata benar kap, janah e erban kena jadi cocok masuk ku bas Kerajan Dibata. Erkiteken si e, inanami kena gundari kiniseran.  Erkiteken Dibata e adil, ibalasNa me alu kiniseran kalak si nggo erban kena ngenanami kiniseran.  Tapi kena si ngenanami kiniseran, ibebasken pagi kena radu ras kami, paksa icidahken Tuan Jesus kuasana arah surga nari radu ras malekat-malekatna si megegeh  i bas api si gurlah, guna mbalas kalak si la nandai Dibata ras si la patuh man berita si meriah kerna Tuanta Jesus Kristus.  Iukum Tuan pagi kalak e. Ukumenna eme ikernepken seh rasa lalap. Ipedauh pagi kalak e arah lebe-lebe Tuan nari bage pe arah kuasana si mulia. 10  Sanga reh pagi Tuan guna imuliaken radu ras umatna si badia, kerina si erkiniteken man bana termasuk kena jengang ngidah ia, sebap erkiniteken kena nandangi kai si ipeseh kami. 11  Emaka lalap itotoken kami kena, gelah cocok iakap Dibatata guna ngelebuh kena, janah gelah alu kuasaNa tuhu-tuhu ilakokenNa kerina si mehuli si ngena ateNa bage pe kerina si ilakoken kena perban erkiniteken. 12  Alu bage, gelar Tuanta Jesus imuliaken erkelangken kena janah kena pe imuliaken erkiteken ersada ras ia, sue ras lias ate si mbelin i bas Dibatata nari bage pe i bas Tuan Jesus Kristus nari.

Cataten kaki

Igelari ka Silas.