2 Petrus 1:1-21

  • Salam (1)

  • Pastiken diri kena tetap jadi kalak si idilo (2-15)

    • Sipat-sipat si iperluken selain kiniteken (5-9)

  • Reh tekna man kata-kata nubuat (16-21)

1  Simon Petrus, sekalak budak bage pe rasul Jesus Kristus, itulisna surat enda man kalak si nggo erkiniteken man kebenaren si meherga, si lit ka i bas kami arah Dibatata bage pe arah Juru Selamatta, Jesus Kristus.  Mbera ialoken kena terbuen lias ate si mbelin ras kedamen, erkiteken lit i bas kena pemeteh si benar kerna Dibata ras kerna Jesus, Tuanta.  Alu kuasa Dibata, nggo ibereken man banta kerina si iperluken kita guna nggeluh nembah man Dibata. Sidatken si e alu gratis erkiteken nggo sialoken pemeteh si benar kerna Dibata, si nggo ndilo kita erkiteken kemulian ras kiniulinNa.  Arah kemulian ras kiniulinNa e, nggo iberekenNa man banta janji-janji si meherga ras luar biasa alu gratis. Alu bage, kenca itadingken kena kejahaten si lit i bas doni si rehna i bas sura-sura si jahat nari, kena bage pe Dibata, imuliaken selaku mahluk roh.  E me sebapna, selain erkiniteken, usahakenlah asa ngasup kena gelah lit si mehuli i bas kena. Selain kai si mehuli, pemeteh.  Selain pemeteh, penguasan diri. Selain penguasan diri, megenggeng. Selain megenggeng, nembah man Dibata.  Selain nembah man Dibata, kekelengen man turang senina. Selain kekelengen man turang senina, kekelengen.  Adi si enda kerina lit i bas kena janah seh kel buena, idalanken kena me pemeteh kerna Tuanta Jesus Kristus alu tepat. Alu bage, kena la jadi kalak si la aktip ntah pe la erbuah.  Pentang kap kalak si la lit i bas ia kerna si enda. Itutupna matana arah terang nari.* Janah lupa ia maka dosa-dosana si mbarenda nggo ibersihken. 10  Emaka o turang senina, kena si nggo idilo ras si ipilih Dibata, usahakenlah asa ngasup kena gelah tetap setia. Adi terus ilakoken kena si enda, kena labo pernah ndabuh. 11  Alu bage, melala kel idat kena pasu-pasu, janah masuk ku bas Kerajan si la ermasap-masap, eme Kerajan Tuanta ras Juru Selamatta, Jesus Kristus. 12  E me sebapna maka rusur ateku mpersingeti kena kerna si enda, aminna pe nggo iteh kena janah nggo paguh kena i bas kebenaren si nggo ialoken kena. 13  Tapi, sanga aku i bas dagingku* denga, perlu denga kuakap mpersingeti kena kerna si enda kerina, 14  sebap kueteh maka kentisik nari kernep me dagingku* enda, sue ras si nggo ikataken Tuanta Jesus Kristus alu terus terang man bangku. 15  Terus kuusahaken asa ngasupku gelah kenca aku lawes banci inget kena kerna si e. 16  Iceritaken kami man kena kerna kuasa ras kerehen Tuan Jesus Kristus. Si e labo iceritaken kami erpalasken cerita si iban-ban manusia. Tapi, mata kami nge si ngidah kemulianna e. 17  Sanga ikataken Dibata si mulia man bana, “Enda me AnakKu, si Kukelengi. Ia me si ngena ateKu,” paksa si e me nggo ialokenna kehamaten ras kemulian i bas Dibata nari, Bapakta. 18  Ibegi kami sora e arah langit nari sanga kami radu ras ia i deleng si badia. 19  Erkiteken si e, reh tekna kami man kata-kata nubuat. Seh kel ulina adi iperdiateken kena nubuat-nubuat e, si bali bagi lampu si ersinar i bas ingan si gelap i bas pusuh kena, seh asa reh terang bage pe bintang erpagi-pagi. 20  Pasti iteh kena maka la lit nubuat i bas Kitap si Badia si rehna i bas perukuren jelma nari. 21  Nubuat la pernah rehna arah peraten manusia nari, tapi kai si ikataken manusia, rehna i bas Dibata nari, perban kalak e itegu-tegu kesah si badia.

Cataten kaki

Ntah banci saja “pentang, lanai idahna si ndauh.”
As. “kemahku.”
As. “kemahku.”