2 Korinti 6:1-18

  • Ula sia-siaken lias ate Dibata (1, 2)

  • Pelayanen Paulus iceritaken (3-13)

  • Ula ersada ras kalak si la tek (14-18)

6  Erkiteken kami erdahin radu ras Dibata, ipindo kami gelah la isia-siaken kena lias ate Dibata si mbelin si nggo ialoken kena.  Nina Dibata, “I bas paksa si mehuli Kuakap, Kubegiken kam. I bas wari keselamaten, Kusampati kam.” Nenlah! Gundari kap paksa si mehuli e, janah gundari kap paksa keselamaten e.  I bas kai pe, la ate kami erban kalak tertuktuk, gelah pelayanen kami la banci isalahken kalak.  Tapi, i bas kai pe icidahken kami maka kami pelayan Dibata. Megenggeng kami ngadapi melala percuban, kiniseran, kekurangen, bage pe kesusahen.  Kami ipekpeki, ipenjaraken, ikeroyok, kerja keras, rusur la medem, janah rusur la man.  Bersih kegeluhen kami, perbahanen kami sue ras pemeteh kerna Dibata, sabar kami, melias, ikutken kami penegu-negu kesah si badia, janah icidahken kami kekelengen i bas pusuh nari.  Jujur kami ngerana, ernalem kami man kuasa Dibata, ijemak kami senjata-senjata kebenaren i bas tan kanan ras tan kiri kami.  Kami ihamati janah ihina, kami ipandangi janah ipuji. Jujur pe kami, ikataken kalak nge kami penipu.  Iakap kalak kami la itandai, tapi situhuna itandai, iakap kalak kami nggo mate, tapi situhuna nggeluh denga, iakap kalak kami nggo iukum, tapi situhuna la mate, 10  iakap kalak kami erceda ate, situhuna ermeriah ukur, iakap kalak kami mesera, situhuna iban kami nterem jelma jadi bayak, iakap kalak kade kami pe la lit, situhuna kai pe lit i bas kami. 11  O turang senina i Korinti, nggo ngerana kami alu terus terang man kena janah nggo ibuka kami pusuh kami. 12  Kekelengen kami man kena la lit batasna, tapi kekelengen kena man kami lit batasna. 13  Ngerana aku man kena bagi man anakku sendiri, bage ka min ban kena man kami. Arus min ipebelin kena kekelengen kena man kami. 14  Ula kena ersada* ras kalak si la tek. Sebap lit kin si seri i bas kebenaren ras kejahaten? Entah lit kin si seri i bas terang ras gelap? 15  Janah, lit kin si seri i bas Kristus ras Belial?* Entah, lit kin si seri i bas kalak si erkiniteken ras kalak si la erkiniteken? 16  Lit kin hubungen rumah pertoton Dibata ras berhala? Kita kap rumah pertoton Dibata si nggeluh, bagi si ikataken Dibata, “Tading me Aku ras kalak e janah Aku lit i tengah-tengah kalak e. Aku me Dibata kalak e, janah kalak e jadi umatKu.” 17  “‘Emaka, ndaratlah kena i bas kalak e nari janah pisahkenlah diri kena,’ nina Jahwe, ‘janah ula nai kuit kai si najis’”, “‘emaka Kualoken me kena.’” 18  “‘Aku me jadi Bapak kena, janah kena me jadi anak-anakKu si dilaki ras si diberu,’ bage me nina Jahwe Si Madakuasa.”

Cataten kaki

As. “Ula kena teriket i bas sada pasangen.”
I bas kata Heber nari maksudna “La Erguna,” itujuken man Setan.