2 Korinti 5:1-21

  • Make kai si isikapken i surga (1-10)

  • Dahin guna ndameken mulihi (11-21)

    • Ciptan si mbaru (17)

    • Utusen-utusen Kristus (20)

5  Siteh maka ikernepken me rumahta i doni, eme dagingta si bali bagi kemah. Ibere Dibata me man banta rumah i surga si tahan rasa lalap, rumah si labo tan manusia erbanca.  Tangis teriluh kel kita tading i bas rumahta si gundari enda, emaka merhat kel kita makeken kai si nggo isikapken man banta i surga,  alu bage sanga sipakeken, lanai kita tilanjang.  Situhuna, tangis teriluh kel kita janah berat kel siakap sanga tading i bas kemah enda. Labo ate kami nadingken kemah enda, tapi sialoken ateta ingan tading si lit i surga, gelah daging si banci mate igantiken alu kegeluhen si rasa lalap.  Dibata nge si nikapken kita guna kegeluhen e, janah iberekenNa kesah si badia jadi jaminen man si nandangi reh.  Tek kel kita kerna si enda janah siteh maka sanga tading denga kita bas daging enda, kita ndauh i bas Tuan nari.  Sebap kita nggeluh menurut kiniteken, labo menurut kai si teridah.  Tek kita maka padin siakap tading ras Tuan asangken tading i bas daging enda.  Emaka la soal kita tading ras ia, ntah pe ndauh i bas ia nari, siban tujunta erban ia senang. 10  Siteh maka tedis nge kita pagi i lebe-lebe kursi penghakimen Kristus, alu bage tiap kalak ngaloken asil perbahanenna, si mehuli ntah pe si jahat, sanga ia tading denga i bas dagingna. 11  Erkiteken iteh kami kai ertina mbiar man Tuan, terus iusahaken kami erban kalak si deban tek, tapi itandai Dibata kami selaku kalak si mehuli. Aminna pe bage, ngarap kel aku gelah kami pe itandai pusuh peraten kena selaku kalak si mehuli. 12  Labo ate kami mujiken diri kami ka i lebe-lebe kena. Tapi iban kami ate kami gelah tersuruh ukur kena ermegah nandangi kami, alu bage banci ijawap kena kalak si ermegah nandangi kai si teridah labo nandangi kai si lit i bas pusuh. 13  Adi tuhu kin kami adon, guna Dibata kap e. Janah adi waras kin kami, guna kena kap e. 14  Tersuruh ukur kami erkiteken kekelengen Kristus, sebap enda kap si nggo iangkai kami: Sekalak jelma nggo mate guna kerina kalak, perban kerina kalak situhuna nggo mate. 15  Ia mate guna kerina kalak, alu bage kalak si nggeluh lanai nggeluh guna dirina, tapi nggeluh guna Kristus si nggo mate guna kalak e janah si nggo ipekeke. 16  Emaka mulai gundari nari, lanai ise pe inen kami menurut perukuren manusia. Aminna pe pernah inen kami Kristus menurut perukuren manusia, tapi gundari lanai bage cara kami ngenen ia. 17  Emaka ise pe si ersada ras Kristus, ciptan si mbaru kap. Kerina si nggo ndekah, nggo lewat kap, janah si lit gundari eme kai si mbaru. 18  Kerina e rehna i bas Dibata nari, si erban kami erdame mulihi ras Ia erkelangken Kristus janah ibereNa kami dahin guna erban kalak si deban erdame mulihi ras Ia, 19  eme dahin guna mberitaken maka erkelangken Kristus, idameken Dibata mulihi doni enda ras diriNa alu la ngkira kesalahen kalak e. Janah iberekenNa man kami dahin mberitaken berita perdamen e. 20  Emaka kami kap utusen-utusen si jadi wakil Kristus, janah erkelangken kami tempa-tempa mindo Dibata man jelma si nterem. Selaku wakil Kristus, mindo kami, “Erdamelah mulihi ras Dibata.” 21  Enggo iban Dibata ia si la erdosa jadi persembahen dosa man banta, gelah arah Kristus, banci ikataken Dibata kita benar.

Cataten kaki