2 Korinti 4:1-18

  • Terang berita si meriah (1-6)

    • Perukuren kalak si la tek ipepentang (4)

  • Erta i bas kudin taneh (7-18)

4  Ialoken kami pendahin pelayanen e erkiteken perkuah ate Dibata, emaka la kami nyerah.  Itulak kami perbahanen si erbuni-buni si erban mela, janah la kami nipu ntah pe la iputarbalikken kami kata Dibata. Tapi iban kami kebenaren jadi jelas. Alu bage, i lebe-lebe Dibata, kami jadi usihen man kerina kalak.*  Adi tertutup kin berita si meriah si iberitaken kami e, si e tertutup man kalak si ikernepken,  eme kalak si la tek si ukurna nggo ipepentang dibata doni* enda, alu bage la banci idah kalak e terang arah berita si meriah si mulia, eme berita kerna Kristus, si ncidahken uga kin Dibata e.  Labo iberitaken kami kerna diri kami sendiri, tapi kerna Jesus Kristus selaku Tuan, janah kami selaku budak kena guna Jesus.  Enggo pernah ikataken Dibata, “Ersinarlah terang i bas gelap nari,” janah gundari nggo iterangiNa pusuhta alu pemeteh si mulia kerna diriNa si teridah arah ayo Kristus.  Aminna pe kami bali bagi kudin taneh ngenca, tapi erta e itama i bas diri kami, alu bage jelas teridah maka kengasupen kami si luar biasa rehna i bas Dibata, labo i bas kami nari.  Arah apai pe kami itindih, tapi la kami kicat. Bingung kel kami tapi lalap nge lit jalan keluar.*  Kami isiksa tapi la itadingken. Kami ipekpeki seh ngasa ndabuh, tapi la mate. 10  Bali bagi Jesus, rusur iadapi kami bahaya kematen alu megenggeng, alu bage kegeluhen kami bali bagi kegeluhen Jesus. 11  Aminna pe kami nggeluh, tapi lalap iadapi kami kematen guna Jesus, alu bage kegeluhen kami bali bagi kegeluhen Jesus. 12  Lalap iadapi kami kematen, tapi si enda ngertiken kegeluhen man kena. 13  Lit tertulis, “Aku ngerana perban aku erkiniteken,” emaka kami pe ngerana perban seri kiniteken kami. 14  Iteh kami maka Dibata si mpekeke Jesus, ipekekeNa ka pagi kami guna ersada ras Jesus, janah ibabaNa pagi kami radu ras kena ku Jesus. 15  Kerina si enda guna kena kap, sebap adi reh teremna kalak si ngaloken lias ate Dibata si mbelin, reh teremna ka kalak si ngataken bujur man Dibata, alu bage Dibata imuliaken. 16  Enda me sebapna maka kita la nyerah. Aminna pe dagingta reh lemahna, tapi pusuh ras perukurenta iban baru tiap wari. 17  Aminna pe kiniseran* e menahang janah kentisik ngenca, tapi si e erban kita ndatken kemulian si terbelinen janah tahan rasa lalap. 18  Labo siperdiateken kai si teridah, tapi siperdiateken kai si la teridah, sebap kai si teridah e kentisik ngenca, tapi si la teridah e tahan rasa lalap.

Cataten kaki

As. “man kerina pusuh peraten manusia.”
Nen Kamus.
Ntah banci saja “tapi la sempat putus asa.”
Ntah “percuban.”