2 Korinti 10:1-18

  • Ibela Paulus pelayanenna (1-18)

    • Senjata kami labo i bas doni enda nari (4, 5)

10  Bali bagi Kristus, aku eme Paulus mindo man kena alu lemah lembut ras melias. Lit si erpengakap maka aku lemah adi jumpa langsung ras kena, tapi perpang adi la langsung jumpa.  Ngarap aku gelah adi reh pagi aku, la perlu aku merawa man piga-piga kalak si erpengakap maka kami nggeluh menurut perukuren doni.  Aminna pe kami nggeluh i bas doni enda, la kami erperang menurut perukuren doni,  sebap senjata perang kami labo i bas doni enda nari, tapi i bas kuasa Dibata si megegeh, si ngasup ngkernepken kai pe si ibentengi alu paguh.  Iruntuhken kami cara rukur si salah bage pe kerina si erlawanen ras pemeteh kerna Dibata. Itaban kami tiap perukuren gelah tiap perukuren jadi patuh man Kristus.  Kenca icidahken kena maka kena nggo tuhu-tuhu patuh, kami pe nggo ersikap guna ngukum ise pe si la patuh.  Kena ngenen menurut kai si teridah. Adi lit kalak si erpengakap maka dirina pengikut Kristus, arus ingetna maka kami pe pengikut Kristus, bali bagi ia.  Ibere Tuan kami kuasa guna mpegegehi kena, labo erban kena lemah. Adi ermegahsa pe aku kerna si e, labo aku mela.  Labo ateku erban kena erpengakap maka kupebiar-biar kena alu surat-suratku, 10  sebap lit si ngataken, “Surat-suratna tegas ras keras, tapi adi ia ras kita, ia lemah janah kata-katana labo lit ertina.” 11  Kalak si ngataken bage perlu itehna maka kai si ikataken kami i bas surat-surat e, pasti pagi ilakoken kami sanga kami ras kena. 12  Labo kami pang mpeseri ntah pe mbandingken diri kami ras kalak si mujiken dirina. Kalak si bage la lit pengangkanna sebap inen kalak e dirina menurut perukurenna sendiri janah ibandingken kalak e dirina sapih-sapih ia. 13  Si imegahken kami labo daerah si lit i darat daerah pendahin kami, tapi si imegahken kami eme daerah si nggo itentuken Dibata man kami, janah kena pe ikut i bas si e. 14  Sanga kami reh ndahi kena, situhuna kai pe la ilakoken kami i darat daerah pendahin kami, sebap kami me si pertama meritaken berita si meriah kerna Kristus man kena. 15  Labo imegahken kami kerja keras kalak si deban si lit i darat daerah pendahin kami, tapi ngarap kami gelah kiniteken kena terus reh tambahna, alu bage asil kerja keras kami pe reh tambahna i daerah pendahin kami. Daerah si idahiken kami pe reh belangna, 16  emaka banci iberitaken kami berita si meriah ku negri-negri si terdauhen arah ingan kena nari. Jadi, la kami ermegah erkiteken asil pendahin kalak si deban i bas daerahna. 17  “Ise pe si ermegah, ermegahlah ia kerna Jahwe.” 18  Kalak si ngena ate Jahwe, labo kalak si muji dirina sendiri tapi kalak si ipujiken Dibata nge.

Cataten kaki